Ang Matinud-anong High Councilor
Akong nakat-unan ang usa ka bililhong leksyon mahitungod sa “pagpangusog diha sa imong gibarugan” gikan sa usa ka matinud-anong high priest sa Germany.
Niadtong Oktubre 2008, samtang ako naminaw sa sibya sa sesyon sa priesthood sa kinatibuk-ang komperensya, si Presidente Dieter F. Uchtdorf, Ikaduhang Magtatambag sa Unang Kapangulohan, namulong mahitungod sa pagserbisyo sa simbahan. Siya miistorya mahitungod kon sa unsang paagi siya ug ang pipila ka mga kaigsoonan misulay sa pagbalhin sa bug-at nga piano. Sa dihang ang tanan nga mga paningkamot napakyas, usa ka tawo miawhag kanila sa pagdug-ol sa pagbarug ug “mangusog diha sa imong gibarugan.”1
Si Presidente Uchtdorf mipadayon sa pagsulti mahitungod sa pagserbisyo sa simbahan bisan asa ikaw tawagon sa pagserbisyo. Pipila ka mga tawo mobati nga sila mas makaserbisyo og maayo kon sila tawagon sa pagbuhat og butang nga mohaum sa ilang ubay-ubay nga mga talento. Siya miingon, “Walay calling nga minos nato. Ang matag calling naghatag kanato og kahigayunan sa pag-alagad ug pagkat-on.”2
Samtang si Presidente Uchtdorf namulong, ako nakahinumdom sa usa ka higayon nga akong nahimamat ang usa ka ordinaryo nga miyembro sa Simbahan kinsa andam nga motabang bisan asa siya ibutang.
Niadtong 1985, gi-assign ko isip usa ka U.S. Army officer sa usa ka gamay nga lungsod sa Germany. Ako nakaalagad og misyon sa Germany 10 ka tuig ang nakalabay. Pag-abut nako niadtong 1983 isip usa ka sundalo uban sa akong asawa, nga si Debra, ug duha ka anak nga batan-ong babaye, kami misugod sa pagtambong sa usa ka serviceman’s branch nga may 100 ka lig-ong mga miyembro. Human sa duha ka mga tuig, kami nakahukom sa pagpahinungod sa among kaugalingon sa hingpit ngadto sa German nga kultura ug misugod sa pagtambong sa gamayng Bad Kreuznach Branch, nga adunay 12 ka mga miyembro.
Sa ikaduhang semana human mi magsugod sa pagsimba, among namatikdan nga adunay usa ka bag-ong lalaki. Mga 40 anyos kapin siya, ug among nahibaloan nga siya ang high councilor nga na-assign sa among branch. Wala siya moanha aron mopahigayon og stake business, apan sa pagbisita lang. Nakig-istorya kami niya sa makadiyot human sa pagsimba, ug sa dihang nanamilit kami, naghunahuna ko nga makita namo siya pag-usab sa unom ka bulan.
Pagkasunod semana, ang high councilor diha na usab. Nahibaloan nako nga nagpuyo siya og mga usa ka oras gikan sa among gamay nga lungsod. Sa nahibiling panahon sa iyang calling isip usa ka high councilor, miadto siya sa among branch kaduha o katulo ka higayon sa usa ka bulan. Mahigalaon siya, dili hambugero, ug maawhagon. Kanunay siyang makig-istorya sa matag miyembro sa branch. Ug, sa kagamay niana nga branch, kanunay siyang hangyoon sa pagpamulong diha sa pulpito. Nakadayeg sa iyang pagkamahalaron, sa akong hunahuna gianggaan nako siya og “ang Matinud-anong High Councilor.”
Usa ka Dominggo miabut siya sa branch service sa buntag ug dayon mibalik sa alas 6:00 sa hapon aron sa pagtambong sa bunyag. Sa tunga-tunga, miadto siya sa lain nga branch. Moadmiter ko nga dihay misulod sa akong hunahuna, “Unsay iyang gibuhat nga nakapasuko sa stake president? Ngano kaha nga siya gi-assign ngadto sa kinagamyan ug labing layo nga branch sa stake?” Tingali dili gayud siya utokan, mapainubsanon, ug tawo nga kagustuhan nga maoy akong tan-aw kaniya. Tingali wala siya ganahi sa iyang home ward ug migamit sa iyang assignment aron makalikay. Wala gyud nako mahibaloi, mao nga midawat na lang ko niini.
Pipila ka semana human niini nga bunyag, nakauli ko nga lapas na sa tungang gabii, sa Dominggo sa buntag. Nag-training ko duol sa utlanan tali sa East ug sa West Germany, ug miabut og tulo ug tunga ka oras sa pagpauli. Gikapoy kaayo ko sa dihang ako misulod sa balay. Ang akong asawa, si Debra, nagmata pa. Miingon siya nako nga “ang Matinud-anong High Councilor” mitawag. Gusto siya nga makigkita kanako. Nangutana ko, “Sa dili pa o human sa pagsimba?” Magsugod ang simba sa alas 10:00 sa buntag. Naglaum ko nga kini human sa pagsimba aron ako makatulog hangtud 8:30.
“Sa dili pa,” miingon siya.
“9:30?”
“Dili. Molakaw siya sa laing dapit tungod sa stake business. Gusto siya nga magkita mo sa iyang opisina sa Frankfurt. Miingon siya nga moadto sa Gate 5.”
Unsang orasa? Nangutana ko.
“Alas sais,” mitubag siya.
Karon naglagot ko. Naabut ko alas 12:30 na sa buntag. Aron makaabut sa sabut sa alas 6:00, kinahanglan ko nga mobangon og alas 4:30. Kana nagpasabut nga wala pay upat ka oras sa pagkatulog. Unsa man ang akong buhaton? Wala gani koy numero sa telepono aron matawgan siya sa sunod buntag sa pagsulti kaniya nga dili ko makaadto kaniya. Gibutang nako ang akong sinina tupad sa higdaanan ug mihigda nga wala i-set ang alarm clock. Samtang ako naghigda, kini misulod sa akong hunahuna:
Kon dili ko makigkita sa “Matinud-anong High Councilor,” unsa ang mahitabo? Kon dili ko moadto sa iyang opisina, sigurado ko nga siya dunay laing buhaton sa iyang panahon. Sa sunod higayon nga ako makigsulti kaniya nganong wala ko moadto, motubag siya, “Dayag nga imong gihimo ang sakto nga desisyon. Dili gyud unta ko mohangyo nimo nga moanhi kon nakahibalo pa ko nga gabii na kang nakauli. Karon na lang nato hisgutan kini.” Ug gawas pa, dili gayud ko miyembro sa branch. Oo, ang among mga rekord anaa ug magtambongan mi kada semana, apan mga langyaw kami, dili kaayo kami maayo sa pinulongan nga German, ug mobalhinay sulod sa lima o unom ka bulan.
Ang akong konsyensya klaro. Pipila na lang ka gutlo ug ako makatulog na. Dayon nahinumduman nako ang angga nga akong gihatag kaniya ug sa tanang mga panahon “ang Matinud-anong High Councilor” miadto sa branch sukad sa among pagtambong. Miadto siya sa bunyag gabii na kaayo sa Dominggo. Miabut siya sa usa ka kalihokan sa branch sa tunga-tunga sa semana. Kanunay siyang makig-istorya ngadto sa tanan nga mga miyembro ug miawhag ug midasig kanila. Dili gayud siya magmahukmanon o lain og batasan. Matinahuron siya sa presidente sa branch ug sa iyang mga paningkamot. Kon wala man siya mahimuot nga na-assign niining gamay nga branch, sigurado gayud wala unta siya magpakita.
Mibangon ko ug miadto sa aparador diin didto ang alarm clock. Gi-set nako og 4:30 sa buntag. Sa pagdesisyon nga pakigkitaan “ang Matinud-anong High Councilor” wala ako mabalaka unsay iyang isulti o hunahunaon kon dili ko moadto. Human sa tanan, tingali dili na gayud nako makita o makadungog kaniya pag-usab human sa among pagbalhin. Mihukom ko nga mobangon nga wala pay upat ka oras ug modrayb og 50 ka milya (80 km) ngadto sa iyang opisina tungod kay mitahud ako kaniya kon unsa siya, “ang Matinud-anong High Councilor.” Nganong dili man ko mosunod kaniya?
Gipahunong nako ang akong sakyanan sa Gate 5 sa alas 6:00 niana nga Dominggo sa buntag nga gisugat sa security guard nga dunay machine gun. Nakit-an niya ang akong American Armed Forces nga plaka. Tingali naghunahuna siya nga nasaag ko. Nakahukom ba “ang Matinud-anong High Councilor” nga dili magpakita? Hinoon sa wala pa molabay ang duha ka minuto, ang iyang sakyanan mihunong tupad sa akong sakyanan. Miingon siya, “Maayong buntag, Don. Adto ta sa akong opisina.” Ang gwardya miabli sa pultahan ug gipaagi kami.
Human sa pipila ka panag-istorya ug sa pagpakita kanako sa iyang opisina, siya misulti na sa iyang tuyo. Miingon siya nga siya motawag nako sa pagserbisyo isip magtatambag sa presidente sa branch. Dili ang una o ikaduha nga magtatambag—ang bugtong nga magtatambag. Sa wala pa ang akong pag-abut, dihay duha lamang ka mga tighupot sa priesthood sa branch, ug nagpulipuli sila matag pipila ka tuig tali sa pagkahimong presidente sa branch ug presidente sa elders quorum.
Gidawat nako ang tawag ug mialagad hangtud ako mibiya paglabay sa tulo ka bulan aron motambong og duha ka bulan nga training sa Estados unidos.
Atol sa akong pagkawala, ang akong asawa ug anak nga lalaki nasakit. Ang sakit sa akong anak nga lalaki nakapaadto niya sa ospital mga 60 ka milya (97 km) gikan sa among base. Isip usa ka lig-on nga asawa sa sundalo, si Debra wala gayud moreklamo o mohangyo nako nga mobalik sa Germany. Gani, wala ko makahibalo sa tinuod nga matang sa iyang sakit hangtud nakapauli ko. Human sa usa ka pagbisita sa lokal nga klinika, ang doktor maoy midrayb sa paghatud kaniya sa balay tungod kay nagtuo siya ang akong asawa dili makahimo sa pagpauli. Ang presidente sa branch ug ang presidente sa Relief Society mitanyag og tabang, apan matinahuron niyang gibalibaran. Agig dugang sa kalisud sa pinulongan ug kultura, si Debra dili gusto nga magsamok-samok sa uban.
Usa ka adlaw “ang Matinud-anong High Councilor” mitawag kaniya. Bag-o lang siyang gitawag nga presidente sa stake. Malumo siyang nagpakisayud sa iyang panglawas ug nagdumili sa pagdawat og tubag nga “Maayo ra man ko.” Ang matag kasiguroan gikan ni Debra gisugat og usa ka malumo apan epektibo nga mga pangutana ngadto sa tinuod nga kahimtang sa pamilya. Sa katapusan siya mipasabut, “Debra, kinahanglan nimong tugutan ang branch sa pagtabang kanimo. Gusto gayud sila nga motabang, ug makapasuod kini sa branch nga makatabang kanimo.” Mapasalamaton nga gidawat niya ang tabang.
Sa akong pagbalik gikan sa Estados Unidos, nagpabilin kami sa branch og dugang duha ka mga bulan sa wala pa mobalhin ngadto sa mas dako nga siyudad.
Nawala ang akong mga handumanan niadtong higayuna sa dihang miakbo ko gikan sa akong lingkuranan ug mikabig sa akong atensyon ngadto sa tingog ni Presidente Uchtdorf nga migawas gikan sa speaker system. Tinud-anay ako nadasig sa gipasabut sa iyang mensahe. Dili sama sa ubang mga panahon kon naghunahuna ko tali sa kalabutan sa mga pulong sa mamumulong ug sa personal nga buhat sa mamumulong (sa negosyo, sa militar, ug, oo bisan sa pipila ka mga pakigpulong nga akong madungog sa simbahan), wala koy pagduhaduha sa mensahe ni Presidente Uchtdorf. Dili lang ang tono ni Presidente Uchtdorf ang nakapahinumdom nako sa Germany ug sa akong kasinatian uban sa “Matinud-anong High Councilor.” Tungod kay si Presidente Uchtdorf mao “ang Matinud-anong High Councilor.” Ang industrial complex nga diin kami nagkita nianang sayo sa Dominggo sa buntag mao ang Frankfurt International Airport, diin siya mao ang Chief Pilot sa Lufthansa German Airlines.
Makasulti ko sa tinuod nga wala ko sukad makaila og tawo nga mas mapainubsanon ug mas matinud-anon sa pagbuhat unsay iyang gisangyaw. Mapasalamaton gayud ako nga nakakat-on og bililhon nga leksyon kon unsay ipasabut sa “mangusog diha sa imong gibarugan.”