O Lo’u Taimi Muamua i le Malumalu
E alaala le tusitala i Cordoba, Atenitina.
Sa ou manao ou te auai patino lava i le malumalu, ae le na o le faalogo e uiga i aafiaga o isi tagata o i ai.
Ina ua 16 o’u tausaga, na fofogaina mai e le au peresitene o le siteki o le a asiasi atu la matou siteki i le malumalu i Buenos Aires, ma sa valaaulia ai a’u ou te alu. Sa ou sefeina se tupe ma galue malosi ina ia agavaa e maua se pepa faataga o le malumalu.
Ina ua ou maua le pepa faataga, sa osofaia a’u e faaosoosoga mai i itu uma, o taumafaiga uma ina ia aveesea mai ia te a’u lena agavaa. Ae sa i ai lo’u naunautaiga e auai i le malumalu. Ou te lei manao e na o le faalogo i aafiaga ma molimau a isi; Sa ou manao ina ia i ai sou lava aafiaga ma se molimau.
Na oo mai le po o le malaga. E oo lava a o lei oso i luga o le pasi, sa i ai ni o’u mafaufauga e aua ou te alu, ae ou te lei tuuina atu i lena mea. I le taimi o le malaga e 10-itula, sa ou nofo i autafa o se tagata o le Ekalesia o le sa fiafia tele ia te au. E tusa ma le 60 ia ona tausaga. Sa ia tau mai ia te au e uiga i lona soifuaga ma sa ia fiafia ona o tofotofoga na feagai ma ia.
Sa amata ona ou faamatala atu ia te ia lou olaga ma le tulaga sa ou lagonaina ai le tuua toatasi ona o le toatele o tagata ua faataumamao i latou mai ia te au ona sa ou mulimuli i le Atua. Na ia tau mai ia te au, “O le a foai mai e le Atua ia te oe se uo lelei tele, ma o lena uo o le a i ai pea iina mo oe. Aua nei galo lena mea.” Ina ua maea ona ia fai mai nei upu, sa ou lagona le toa ma le filemu aua sa ou lagonaina o le mea na ia fai mai ai ia te au e moni.
Ina ua ou ulu atu i le malumalu, sa mou ese atu le mamafatu sa ou tauaveina. Na lagona e faapei o se faamautuuga faaleagaga o loo tau mai ia te au, “Susu maia, loʼu atalii e. Sa ou faatali mo oe.”
Sa ou lagonaina o le malumalu e moni lava o le maota o le Atua, ae le na o se fale matagofie. Ina ua maea ona faia ni papatisoga ma faamauga, sa ou alu i fafo. Sa ou lagonaina le toe foi mai o avega, ae peitai ua ou lagonaina ua ou maua le malosi e faatoilalo ai i latou.
Ou te iloa o le saunia o i tatou lava ma le tuuina atu o mea uma i aao o le Atua ma le tuuina atu o le mea sili tatou te mafaia e ulufale ai i le malumalu o se mea e manaomia ai i tatou. Ona faamanuiaina tele ai lea o i tatou e le Atua.