“Ang akong higala nag-ingon nga wala siya nagtuo sa Dios. Unsaon nako sa pagpakigbahin sa ebanghelyo uban kaniya?”

Atol sa akong pagpangandam sa misyon, duna koy daghang mga higala moingon nga wala sila motuo sa Dios. Kon makadungog ako kanila nga moingon niini, ako mag-ampo alang kanila. Mahimong wala sila magtuo sa Dios samtang kita nag-ampo, apan kon nagtuo gayud kita sa Dios, ang atong gugma alang Kaniya makita ngadto sa uban. Ang atong ehemplo makatabang sa uban nga makasabut nga ang Dios mopanalangin gayud kanato, nga Siya buhi, ug Siya nahigugma kanato.

Sa dihang batan-on pa ako, aduna koy hunahuna nga ang bugtong paagi sa pagtudlo sa ebanghelyo mao ang agresibong pagsangyaw niini, apan hilabihan nakong sayopa tungod kay dili maihap ang mga paagi sa pagpakigbahin sa ebanghelyo. Apan pinaagi sa kasinatian akong nasuta nga kon ikaw mahimong usa ka ehemplo ni Kristo sa tanan nga mga butang nga imong buhaton, nan, masurprisa ka sa kadaghan sa mga tawo nga mosalig ug motuo kanimo. Sa daghan nga mga kahimtang, ang buhat tinud-anay nga mas kusog kaysa bisan unsa nga pulong. Mangulo ug magtudlo pinaagi sa ehemplo.

Kon ang imong mga higala wala motuo sa Dios, mahimo ka nga maghisgut bahin sa kinaiyahan tungod kay ang tanan nagpamatuod nga adunay usa ka Dios (tan-awa sa Alma 30: 44). Mahimo usab ka nga mag-ampo alang kaniya ug magtuon sa mga kasulatan uban kaniya—sama pananglit sa, Salmo 19:1. Nasayud ko nga ang Espiritu Santo motabang kaniya nga makadawat og pagpamatuod sa atong Langitnong Amahan.

Mahimo nimong ipakigbahin ang ebanghelyo sa daghang mga paagi. Una, pag-ampo ug pagpuasa alang kanila nga ang ilang mga kasingkasing mobukas ngadto sa ebanghelyo. Dayon sa sunod higayon nga imo silang mahimamat, pagsugod og usa ka hilisgutan ug mga hilisgutan nga mogiya ngadto sa usa ka panag-istoryahanay kabahin sa ebanghelyo. Siguroha ang pagdapit kanila sa simbahan o sa mga kalihokan, ug labaw sa tanan, magmahigalaon. Kinsay nasayud—tingali usa ka adlaw sila magpabunyag uban sa ilang pamilya.

Ang ebanghelyo makausab sa kinabuhi sa mga tawo. Usa ka paagi nga mahimo nimong ipakigbahin kini sa imong higala pinaagi sa pagsulti kon unsa ang imong gibati nga ang Dios buhi, sama pananglit, sa mga milagro nga imong nasinati pinaagi sa yanong pagmata sa kada adlaw. Ang imong ehemplo ngadto niya maoy mahimong dako nga pagpamatuod sa imong kalipay sa pagkasayud sa gugma sa Dios ug pagsunod sa ebanghelyo.

Hinumdumi kon nganong gusto nimong motuo siya sa Dios. Dili basta lang nato gipakigbahin kini sa mga tawo tungod kay gusto nato nga sila mahimong miyembro sa Simbahan. Mobuhat kita sa ingon tungod kay sila atong tinuod nga mga kaigsoonan. Nganong gusto nimo nga ang imong higala magtuo sa Dios? Ipabilin kana nga pangutana sa hunahuna, pag-ampo alang sa kalig-on ug sa gugma nga putli, pagkasinsero, ug kon sila moingon dili, nan andama ang pagtahud sa ilang kabubut-on. Lagmit dili pa nila higayon nga maandam. Apan ako mosaad kaninyo nga kon kamo sinsero gayud nga gustong makahibalo sila mahitungod sa Dios, tungod kay ikaw ilang higala, sila maminaw. Human niana, ang pagpili anaa ra kanila, ug kita dili mohukom kanila sa ilang gihimo nga pagpili.

Mahimong ehemplo ngadto kaniya. Tabangi siya nga mas mahiduol ngadto sa Dios pinaagi sa inyong mga kasinatian ug pagpamatuod. Kamo magsilbing anghel nga iyang gipangita pinaagi sa imong kahayag ug impluwensya. Tabangi siya nga makita ang gugma sa atong Langitnong Amahan alang kaniya, apan ayaw kini ipugos kaniya.