“Sabi ng kaibigan ko, hindi raw siya naniniwala sa Diyos. Paano ko maibabahagi sa kanya ang ebanghelyo?”

Habang naghahanda ako para sa misyon, marami akong kaibigan na nagsasabing hindi sila naniniwala sa Diyos. Kapag naririnig kong sinasabi nila ito, ipinagdarasal ko sila. Maaaring hindi sila naniniwala sa Diyos habang nagdarasal tayo, pero kung talagang naniniwala tayo sa Diyos, makikita ng iba ang pagmamahal natin sa Kanya. Ang ating halimbawa ay nagpapaunawa sa iba na talagang pinagpapala tayo ng Diyos, na Siya ay buhay, at na mahal Niya tayo.

Noong bata pa ako, akala ko ang tanging paraan para maituro ang ebanghelyo ay lubos itong ipangaral, ngunit maling-mali pala ako dahil napakarami palang paraan para maibahagi ang ebanghelyo. Ngunit batay sa karanasan, natuklasan ko na kung magiging halimbawa ka lang ni Cristo sa lahat ng ginagawa mo, magugulat ka sa dami ng taong humahanga at naniniwala sa iyo. Sa maraming sitwasyon, talagang mas mabisa ang epekto ng mga kilos kaysa salita. Mamuno at magturo sa pamamagitan ng halimbawa.

Kung hindi naniniwala sa Diyos ang kaibigan mo, maaari ninyong pag-usapan ang kalikasan dahil lahat ng bagay ay nagpapatotoo na mayroong Diyos (tingnan sa Alma 30:44). Maaari mo rin siyang ipagdasal at pag-aralan ang mga banal na kasulatan na kasama niya—halimbawa, Awit 19:1. Alam ko na tutulungan siya ng Espiritu Santo na magkaroon ng patotoo tungkol sa ating Ama sa Langit.

Maibabahagi mo ang ebanghelyo sa maraming paraan. Una, ipagdasal lang sila at mag-ayuno para sa kanila para mabuksan ang puso nila sa ebanghelyo. Pagkatapos, sa susunod na makipagkita ka sa kanila, magbukas ng mga paksang hahantong sa pag-uusap tungkol sa ebanghelyo. Tiyaking yayain silang magsimba o dumalo sa mga aktibidad, at higit sa lahat, kaibiganin sila. Malay mo—baka balang-araw ay mabinyagan sila kasama ang kanilang pamilya.

Binabago ng ebanghelyo ang buhay ng mga tao. Ang isang paraan na maibabahagi mo ito sa kaibigan mo ay sabihin kung paano mo nadama na mayroong Diyos, halimbawa, sa mga himalang naranasan mo noon at nararanasan mo ngayon sa simpleng paggising mo lang sa araw-araw. Ang halimbawa mo sa kanya ay magiging malaking patotoo ng kaligayahan mong malaman ang pag-ibig ng Diyos at pamumuhay ng ebanghelyo.

Alalahanin kung bakit gusto mo siyang maniwala sa Diyos. Hindi lang tayo nagbabahagi sa mga tao dahil sa gusto natin silang maging miyembro ng Simbahan. Ginagawa natin ito dahil sila ay literal nating mga kapatid. Bakit gusto mong maniwala sa Diyos ang kaibigan mo? Tandaan mo ang tanong na iyan, manalangin para sa lakas at pag-ibig sa kapwa, maging tapat, at kung ayaw pa rin nila, maging handang igalang ang kanilang kalayaan. Baka naman hindi pa sila handa. Ngunit ipinapangako ko sa iyo na kung talagang gusto mong malaman nila ang tungkol sa Diyos, dahil kaibigan ka nila, makikinig sila. Pagkatapos niyon, nasa kanila na ang desisyon, at hindi natin sila mahuhusgahan sa desisyon nila.

Maging halimbawa sa kanya. Tulungan siyang maging mas malapit sa Diyos sa pamamagitan ng iyong mga karanasan at patotoo. Magsilbing anghel na hinahanap niya sa pamamagitan ng iyong liwanag at impluwensya. Tulungan siyang madama ang pagmamahal sa kanya ng ating Ama sa Langit, pero huwag itong ipilit sa kanya.