Te Bwauti ni mwane ae Mwaaka
E maeka te tia korokaraki i Nevada, USA.
“Rinea te kawai ae eti ao ko na kukurei. I riai n rinea te eti n taainako” (Aia Boki n Anene Ataei, 160).
“Ko reke” E taku Mandy. E riinga mwaanena ae uarereke ao ngkanne e kawaekoa ni uanako. Ana utu Mandy a tiku n te mouteero ni karokoa are a mwaing nakon mweengaia ae uarereke. E kakukurei kanakin te tiin n amwarake ae kaabueeaki n te mwaikuroweiwe ibukin te katawanou. Ao a uaua n ana tabo ni uaua te mouteero e kuri ni katoa bong!
Ma iai teuana buakakan te maeka n te mouteero. Ana aobiti te manatia n te mouteero e mena raoi iaan aia ruu, ao e taku te manatia bwa Mandy ao mwaanena ma tarina a rangi ni kaberoro. “N na kanga ni kabooa te ruu ngkai taraan ae taian nanai n erebwanti a mena ietan atuu?” e titirakin Tamau.
Imwiin te katawanou mwaanem Mandy ae uarereke Aaron e kiba mai aon te kaniwene ao ni bwaka iaontano ma te rebwetau. E ubu n raraoma Mandy ao e tararake n taraa tinana.
“Akea te kibakiba. Karaurau nakonako, taiaoka,” e taku Tinau.
Ma e a oimwii. E a tang te tareboon.
“Uh o,” e iango Mandy.
E tabeka te tareboon tinau. E ongo Mandy ana kabwarabure nakon te manatia.
E taraa ni bwara nanon tinau ngke I katuka te tareboon. “Edward ao Mandy,” e taku, “I riai ni kaweneia ni kamatuuia Aaron ao Emily. Kam kona n taiaoka ni kairiia Kristine ao Daniel n nakonako ma ngaiia?”
Ngke a toua nanon te tabo ni kaa n te mouteero, e noora te bwai teuana Mandy ae uarereke ao ni buraaun iaontano.
Bon te bwauti ni mwane. Ao iai te mwane inanona!
“Taraia, Edward!” e taku, e tabeka ieta te bwauti ni mwane.
“Ti riai ni uotia nakon ana aobiti te manatia n te tai ae waekoa,” e taku Edward.
E namakina nakobuakan birotona Mandy. Bukin tera a riai ni kaokia n te tai ae waekoa? E aki kona Tinau ao Tamau ni kaokia rimwii?
Ma Mandy e ataa te bwai ae eti ae e na karaoaki.
Ataei a kauka mataroan te aobiti ao a rin ma te maamaa. E mata bubuaka te manatia. “Um, ti kunea te bwauti ni mwane aei n te tabo are a tei iai taian kaa,” e taku Mandy. A ruru baina ngke e katokaa te bwauti ni mwane i aon te kaaunta.
Te mwaane are e tei n te kaaunta e kamwataua n taraia. “Au bwai anne,” e taku. E waekoa n taraa nanon te bwauti ni mwane. “A bane n tiku kanoana. Kam rabwa, ataei!”
E tararake Mandy n taraa te manatia. E toki matabubuakana, ao e mata ni kukurei.
Imwiin are a kitana te aobiti, e titiraki Daniel, “Arei te bwauti ni mwane ae mwaaka?”
“Bukin tera ko iangoia bwa e mwaaka?” e titiraki Edward.
“Ibukina e kakukureia te manatia!”
E ioioa atuuna Edward. “E aki mwaaka te bwauti ni mwane,” se taku. “E kukurei ibukina ti karaoa te bwai ae eti.”
Mandy e namakina te bwai ae kakawaki inanona E aki ataia ae rinean te eti e kona ni kakukureiia aomata.
Tabeua te bong imwiina, Mandy ma Tamau a nako ni kabwaka boon tikuia ibukin te wiiki. E moangare te manatia nakon Mandy. E tii tarebon n tetaina n te tai are a kunea iai te bwauti ni mwane, ao tii karabwaia ibukin aia kokoaua. E namakinna Mandy bwa e a reke temanna raoraona ae boou.
“Rinean te eti n te koaua e bon mwaaka,” e iango Mandy. E kaboo ni baina, ao e kaboo naba te manatia. Ao e aki manga ngurengure imwiin anne.”