Kanuangan te Teimatoa Raoi

Tamnei

family praying together

Ngke te ataeinimwane ngai, I beku n te Ekaretia n aron taben te kauntira nakon te beretitenti n te makoro ae wanawana. E teimatoa ni kataia n reireinai. I uringa te kaetieti are e anganai: “Ngkana ko kaitibo ma temanna, karaoiia n ai aron ae ti tebo ma a mena inanon te kaangaanga ae kakaiaki, ao ko na nakoraoi riki nakon iteran am tai.” N te tai anne, I taku bwa e tataekin bwaai aika buakaka bwa ana riki. Ngkai, e riaon 50 te ririki imwina, I a tiba ataia bwa e kanga raoi n ataa aron te aonaaba ao te maiu.

Ti bane ni kaaitarai kataakira—n tabetai, kataakira aika a rang kaangaanga. Ti ataia bwa te Uea e kariaira bwa ti na kaaitara ma rinanon te taneiai inanon kaangaanga bwa ti aonga ni kona n atai rikirake ibon iroura ao ni kakororaoaki bwa ti aonga ni maeka ma Ngaia n aki toki.

Te Uea e reireiina te Burabeti Iotebwa Timiti n te karabuti i Liberty bwa te kanuanga ibukin teimatoana ni kaaitarai kataakina raoi e na buokia n tau ibukin te maiu ae akea tokina:

“Natiu temwaane, te rau e mena iaon tamneim; akea tokin te mwakuri ni kakaaitara ao akea tokin te karawawataki a na riki n te tai ae uarereke;

Ngkanne, ngkana ko teimatoa n nako raoi, Te Atua e na karietaatako ieta; ko na tokanikai iaon am bure” (D&C 121:7–8).

Ti rinanon kaangaanga ao kataaki aika mwaiti inanon maiura are e na taraa ni kaangaanga kaitarakiia raoi. E kona n taraaki n te kawai anne nakon te utu ae katine iaon aroka ngkana akea te karau. Ana kan ataia bwa, “Ana mannra aroia anne (n akean te karau)?” E kona n taraaki n te kawai anne nakon te kairake ni kaaitarai rikiraken mwaitin katei aika buakaka ao te kaririaki. E kona n taraaki te kawai anne nakon te ataeinimwaane n ikakorakora ni karekean te reirei ke kataneiai ae e kainanoia ibukin te mwakuri ni buokiia buuna ma ana utu. E kona n taraaki te kawai anne nakon te aomata ae e aki kona ni kakaea ana mwakuri ke ni kabuai ana mwakuri aika mwaiti ngke a toki mwakurin bitineti. E kona n taraaki n te kawai anne nakoia te koraki ake a kaaitara ma uarereken te marurung ao korakoran rabwataia, are e kona n roko ni moantaai ke imwiina inanon te maiu ibukiia ke koraki ake a tangiriia.

Ma te Atua n tangira e aki anganiira kataaki aikanne n ti taraia bwa ti kona n tokanikai iaon te kaangaanga ma n taraia ngkana ti kona n tokanikai iaoia ao ni kona n riki n itiaki.

Te moan Beretitenti e reireina Unimwaane Parley P. Pratt (1807–57) ngke e a tibwa weteaki bwa kain te Kooram n Abotoro n te Tengaun ma Uoman: “Ko a tia ni weteaki n te mwakuri are kainnanoa am tai ni kabane; … riki bwa te kainikatebe ae raneanea. … Ko riai n teimatoa ni karaoi mwakuri aika a kaangaanga n te tai ae maan, te mwakuri ae bati, ao a mwaiti kataaki bwa ko aonga ni kororaoi n itiaki. … Tamam are i Karawa e kainanoia; te tawana bon Ana bwai; te mwakuri bon Ana bwai; ao E na … kaungaako … ao ni boutokaiiko”¹

Inanon te boki ae Ebera, Bwauro e taetae iaon teimatoan raoi te uanikai: “Ngkai akea te kataereaki teuana ae atongaki ngkai ba te bai ni kimwareirei, ba bon te bwai ni kamaraki: ao rimwi e karika te ua n raoi ae te raoiroi ba aia bai akana reireiaki iai.” (Ebera 12:11).

Kataakira ao ara kaangaanga e anganiira te tai n reireiaki ao n rikirake, ao a na kona ni bitii naba aroarora. Ngkana ti kona ni rairaki nakon te Tia Kamaiu inanon ara tai ni kaangaanga, tamneira a kona n itiaki ngkana ti teimatoa.

Ngaia are, te moan bwai ae ko na uringnga bon te tataro n taainako (taraa D&C 10:5; Aramwa 34:19–29).

Te kauoua ni bwai bon te kekeiaki n tainako ni kawakin tuua—bwa ana tera kakaaitara, te kaririaki, ke te kiriwe ni katobibiira (taraa Motiaea 4:30).

Te katenua ni bwai ae kakawaki ni karaoia bon te beku ibukin te Uea (taraa D&C 4:2; 20:31).

N ana ibuobuoki te Mataniwi, ti roko ni kinaa ao n Tangiria. Ti na riai, ngkana ti reitinako inanon te tataro ao te kakaonimaki ni mwakuri, ni moanna ni kiinaa mwaakan te Tia Kamaiu ao mwaakan te Tamnei ae Raoiro inanon maiura. A mwaiti ibuakora ake ti a tia n anganaki te mwakuri n ibuobuoki anne ao n namwakina te iraorao anne. Ngkana ko iangoa taekan te tai anne, ko na uringnga bwa iai bitaki i roum Te kaririaki ni karaoa ae buakaka e taraa ni kerikaaki. Te nano ni kani karaoa ae raoiroi e rikirake. Koraki ake a rangi ni kinako ao n tangiriko a na kangai: “Ko a rangi n akoi ao n taotaonaki n nano riki. Ai bon tiaki ngkoe ma taraam ngkai.”

Ai bon tiaki ngkoe ngkoa. Ko bitaki rinanon Ana Mwakuri ni kamaiu Iesu Kristo ibukina ko onimakinna inanon am tai ni kataaki.

I berita nakoim bwa e na boutokaiko te Uea n am tai ni kataaki ngkana ko ukoukoria ao ni beku Irouna ao bwa tamneim e na itiaki inanon mwakuriana. I kaewenakoko bwa ko na katuka am onimaki Irouna n am kaangaanga ni kabane.

I ataia bwa te Atua te Tama e maiu ao bwa E ongo ao e kaekai ara tataro ni kabane. I ataia bwa Natina Temwaane, Iesu Kristo, e karawawataaki ibukin ara bure ni kabane ao E tangiriira bwa ti na Nakoina. I ataia bwa te Tama ao te Nati a tarataraiira ao a katauraoa te kawai ibukira n teimatoa raoi ao ni manga okira mweengara riki.