Ang Ganti sa Paglahutay og Maayo

Imahe

family praying together

Sa dihang batan-on pa ko, nagserbisyo ko sa Simbahan isip usa ka magtatambag sa usa ka maalamon nga district president. Naningkamot siya kanunay sa pagtudlo kanako. Nakahinumdom ko sa tambag nga sa makausa iyang gihatag kanako: “Kon ikaw makahimamat og tawo, tagda sila ingon nga sila anaa sa seryuso nga kasamok, ug ikaw sakto labaw sa katunga sa panahon.” Naghunahuna ko kaniadto nga siya negatibo. Karon, paglabay sa sobra sa 50 ka tuig, ako nakaamgo nga siya nakasabut pag-ayo sa kalibutan ug sa kinabuhi.

Kitang tanan adunay mga pagsulay nga atubangon—usahay, lisud kaayo nga mga pagsulay. Kita nasayud nga ang Ginoo nagtugot kanato nga masulayan aron kita makasinati og paglambo ug mahingpit aron kita makabalik uban Kaniya sa kahangturan.

Ang Ginoo mitudlo ni Propeta Joseph Smith sa Bilanggoan sa Liberty nga ang ganti sa paglahutay og maayo sa iyang mga pagsulay makatabang kaniya nga mahimong takus sa kinabuhing dayon:

“Akong anak, kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon;

“Ug unya, kon ikaw molahutay pag-ayo, ang Dios mobayaw kanimo sa kahitas-an; ikaw magmadaugon ibabaw sa imong tanan nga mga kaaway” (D&P 121:7–8).

Makasinati kita og daghang mga kalisud ug mga pagsulay nga atong masinati sa tibuok kinabuhi nga morag lisud ang makalahutay og maayo. Ingon og sama sa usa ka pamilya nga nagdepende sa mga tanom pero walay ulan. Tingali sila maghunahuna, “Hangtud kanus-a man kita makaantus?” Ingon og sama sa usa ka batan-on nga nag-atubang sa pagpakigbatok sa nagkadaghang kahugaw ug tintasyon. Ingon og sama sa usa ka batan-ong lalaki nga nakigbisog nga makakuha og edukasyon o training nga iyang gikinahanglan alang sa usa ka trabaho sa pagsuporta og asawa ug pamilya. Ingon og sama kini sa usa ka tawo nga wala makakita og trabaho o nawad-an og trabaho tungod kay nanira ang mga negosyo. Ingon og sama kini niadtong nag-atubang og pagkunhod sa panglawas ug pisikal nga kusog, nga mahimong moabut og sayo o ulahi na sa kinabuhi alang kanila o alang niadtong ilang gihigugma.

Apan ang usa ka mahigugmaong Dios wala mohatag kanato og susama nga mga pagsulay aron lang makita kon makalahutay ba kita sa kalisud apan aron makita kon makalahutay ba kita og maayo niini ug mahimong molambo.

Ang Unang Kapangulohan mitudlo ni Elder Parley P. Pratt (1807–57) sa dihang siya usa ka bag-ong natawag nga sakop sa Korum sa Napulog Duha ka mga Apostoles: “Kaninyo nga apil sa usa ka katuyoan nga nagkinahanglan sa inyong tibuok nga pagtagad; … mahimong usa ka mahamis nga puloan. … Kamo kinahanglan molahutay og daghan nga paghago, sa dako nga paghago, ug daghang kawad-on aron hingpit nga makasinati og kalamboan. … Ang inyong Langitnong Amahan nagkinahanglan niini; ang umahan Iya; ang buhat Iya; ug Siya … modasig kaninyo … ug motuboy kaninyo.”¹

Sa basahon sa mga Hebreohanon, si Pablo namulong sa bunga sa paglahutay og maayo: “Sa pagkakaron, ang tanang pagpanton daw dili makalipay, hinonoa makasakit hinoon; apan sa kapulihay kini magahatag sa bunga sa pagkamatarung ngadto kanila nga namatuto pinaagi niini” (Mga Hebreohanon 12:11).

Ang atong mga pagsulay ug ang atong mga kalisud makahatag kanato og oportunidad sa pagkat-on ug pagtubo, ug kini mahimo gani nga makausab sa atong kinaiya. Kon kita makaduol sa Manluluwas sa panahon sa atong labing lisud nga mga pagsulay, ang atong mga kalag mahashasan samtang maglahutay kita.

Busa, ang unang butang nga hinumduman mao ang pag-ampo kanunay (tan-awa sa D&P 10:5; Alma 34:19–29).

Ang ikaduhang butang mao ang pagpaningkamot kanunay sa pagsunod sa mga sugo—bisan unsa pa ang oposisyon, tintasyon o ang kagubot nga anaa sa atong palibut (tan-awa sa Mosiah 4:30).

Ang ikatulong importante nga butang nga buhaton mao ang pagserbisyo sa Ginoo (tan-awa sa D&P 4:2; 20:31).

Sa pagserbisyo sa Manluluwas, kita mahimong makaila ug mahigugma Kaniya. Mahimo nato, kon kita magpadayon sa pag-ampo ug matinud-anon nga moserbisyo, magsugod sa pag-ila sa impluwensya sa Manluluwas ug sa impluwensya sa Espiritu Santo sa atong kinabuhi. Daghan nato dunay sa usa ka panahon gihatagan niana nga serbisyo ug mibati niana nga pakig-uban. Kon hunahunaon ninyo kadto nga panahon, kamo makahinumdom nga dihay mga kausaban diha kaninyo. Ang tintasyon sa pagbuhat og dautan daw nagkakunhod. Ang tinguha sa pagbuhat og maayo mitubo. Kadtong nakaila kaninyo sa labing maayo ug naghigugma kaninyo tingali miingon: “Kamo nahimong mas mabination ug mas mapailubon. Mora og dili na kamo ang samang tawo.”

Dili na kamo ang samang tawo. kamo nausab pinaagi sa Pag-ula ni Jesukristo tungod kay kamo misalig Kaniya sa panahon sa inyong mga pagsulay.

Mosaad ko nga ang Ginoo moabut sa pagtabang kaninyo sa inyong mga pagsulay kon kamo magtinguha ug mag-alagad Kaniya ug nga ang inyong kalag mahashasan tungod niini. Mohagit ako kaninyo nga ibutang ang inyong pagsalig diha Kaniya sa inyong tanan nga mga kalisdanan.

Nasayud ko nga ang Dios Amahan buhi ug nga Siya maminaw ug motubag sa atong matag pag-ampo. Nasayud ko nga ang Iyang Anak, si Jesukristo, nag-antus sa tanan natong mga sala ug nga Siya gusto nga kita moduol Kaniya. Nasayud ko nga ang Amahan ug Anak nagbantay kanato ug nag-andam og paagi alang kanato nga makalahutay og maayo ug makapauli pag-usab.