Mga Orasan

Imahe

boy with a clock

Sa dihang akong anak, nga si Josue, mga dos anyos, nainteresado kaayo siya sa mga orasan. Kon makaagi mi og orasan sa balay, gusto siya nga mohunong ug motan-aw niini. Ganahan kaayo siya nga isimpig ang iyang dunggan ngadto sa orasan ug maminaw sa hinagtik niini. Dihay mga higayon nga dili mi makapadayon paglakaw nga dili mohunong og maminaw sa hinagtik niini.

Nakaamgo ko og pipila ka makapaikag nga mga butang gikan nianang yanong kalihokan. Una, ang orasan naghagtik sa tanang higayon, dili lang kon kita magtagad niini. Ikaduha, bisan tuod nasayud kita nga ang orasan dunay tingog, kinahanglang moduol kita niini ug maghilom aron makadungog sa hinay nga hinagtik.

Ang Espiritu Santo sama kaayo sa mga orasan nga gikagustuhan pag-ayo sa akong anak nga lalaki. Kita nga nabunyagan ug nakadawat sa gasa sa Espiritu Santo makaangkon sa Iyang kanunay nga pakig-uban kon magpuyo kita nga takus niini. Ang Espiritu Santo mag-uban nato kanunay, apan usahay gitugutan nato ang mga kasaba sa kalibutan nga motabon sa hilom nga mga pag-aghat nga Iyang gihatag kanato. Sama sa akong anak nga lalaki ug ako nga kinahanglang maghilom ug maminaw sa hinay nga hinagtik sa orasan, matag usa nato kinahanglang maghilom aron makadungog, o makabati, sa hilom nga mga pag-aghat nga ihatag sa Espiritu.

Si Presidente Boyd K. Packer (1924–2015), Presidente sa Korum sa Napulog Duha ka mga apostoles, miingon: “Ang tingog sa Espiritu gihulagway sa kasulatan nga dili ‘kusog’ o ‘pagaw.’ Kini ‘dili usa ka tingog sa dugdog, ni … [sa] nga tingog sa usa ka dako nga kaguliyang nga kasaba.’ Apan, ‘usa ka hagawhaw nga tingog nga hingpit sa kalumo, ingon nga kini usa ka hunghong,’ ug kini ‘makadulot gani ngadto sa kinahiladman sa kalag’ ug makapainit [sa mga kasingkasing]’ (3 Nephi 11:3; Helaman 5:30; D&P 85: 6–7). …

“Ang Espiritu,” mitudlo si Presidente Packer, “dili mokuha sa atong pagtagad pinaagi sa pagsinggit o pag-uyog nato gamit ang bug-at nga kamot. Hinoon mohunghong kini. Hinay kini nga mohapuhap nga kon kita busy kaayo mahimong dili gayud nato kini mabati. …

“Usahay hinay kining motandog aron kita maminaw. Apan sa kasagaran, kon dili kita maminaw sa malumo nga pagbati, ang Espiritu mopahawa ug maghulat hangtud nga kita magtinguha ug maminaw” (“The Candle of the Lord,” Ensign, Ene. 1983, 53).

Karon sa matag higayon nga ako makadungog sa hinay nga hinagtik nga tingog gikan sa orasan, dili nako tuyuon nga makahinumdom sa yanong leksyon nga gitudlo sa akong anak nga lalaki bahin sa paghilom aron makadungog sa hilom nga mga pag-aghat sa Espiritu