Hangtud sa Sunod Natong Panagkita
Balik Palihug!
Gikan sa “A Priceless Heritage,” Ensign, Nob. 1992, 85–86.
Among ablihan ang among mga bukton para kaninyo. Nagkinahanglan kami sa inyong tabang.
Para niadtong mga nangasilo o nawad-an og interes [sa Simbahan], o mibiya sa bisan unsang rason, among gidapit kamong tanan sa bug-os nga pagpakigdait uban kanamo pag-usab. Ang matinud-anong mga miyembro, uban sa tanan nilang mga sayop ug kahuyang, mapainubsanong naningkamot sa pagbuhat sa balaang buhat sa Dios sa tibuok kalibutan. Nagkinahanglan kami sa inyong tabang sa dakong pakigbisog batok sa gahum sa kangitngit nga nagdagsang sa kalibutan karon. Sa pagkahimong usa ka bahin niini nga buhat, kamong tanan makatagbaw sa labing lawom nga tinguha sa inyong mga kalag. Mahibaloan ra ninyo ang personal nga kahupayan nga makit-an pinaagi sa pagpangita sa sagrado ug balaang mga butang sa Dios. Matagamtam ninyo ang mga panalangin ug pakigsaad nga gipangalagad sa balaang mga templo. Makaangkon kamo og talagsaong kahulugan ug katuyoan sa inyong kinabuhi, bisan niining tigpasipala nga kalibutan nga atong gipuy-an. Makaangkon kamo’g kalig-on sa kinaiya aron makalihok kamo sa inyong kaugalingon ug dili angayang aghaton pa sa paglihok. (Tan-awa sa 2 Nephi 2:26.)
Mga pipila ka tuig ang milabay, ang Unang Kapangulohan sa Simbahan mihatag [niini] nga imbitasyon:
“Nasayud kita sa pipila nga dili aktibo, sa uban nga nahimong kritiko ug mangita na og sayop, ug niadtong na-disfellowship o na-excommunicate tungod sa seryusong mga kalapasan.
“Kanilang tanan motabang kita pinaagi sa gugma. Matinguhaon kita nga mopasaylo pinaagi sa Iyang espiritu kinsa miingon: ‘Ako, ang Ginoo, mopasaylo kinsa ako mopasaylo, apan kamo gikinahanglan nga mopasaylo sa tanan nga mga tawo (D&P 64:10).’
“Among giawhag ang mga miyembro sa Simbahan sa pagpasaylo niadtong mga nakasala kanila. “Niadtong mihunong sa pagkaaktibo ug niadtong nahimong mga kritiko, kami moingon, ‘Balik. Balik ug pagbusog sa talad kan-anan sa Ginoo, ug tilawi pag-usab ang mga lamian ug makatagbaw nga bunga sa pakigdait uban sa mga Santos.’
“Masaligon kami nga daghan ang nangandoy nga mobalik, apan mibati nga dili komportable sa pagbuhat niini. Mopasalig kami nga makaplagan ninyo ang mga kamot nga andam sa pagtabang kaninyo” (Church News, Dis. 22 1985, 3).
… Ako matinud-anon ug mapainubsanong mosubli niana nga hangyo. Ug among ablihan ang among mga bukton para kaninyo.