’Oa’oa ’ei pipi nā Iesu Mesia.

’Ua ’ite a’enei ’outou i te hō’ē mahana ’ino mau ? E aha tā ’outou i rave nō te fa’aitoito ? ’Ua ’ite te peresideni Uchtdorf ē « E mau māuiui, e mau manuia ’ore, ’e e mau ’oto tō tātou tāta’itahi. E fāri’i ato’a tātou i te tarapape ’e i te tahi taime ’ua tāhiti roa ».

Tāna rāve’a ’o te orara’a ïa i te mea tāna i pi’i « hō’ē orara’a pipi » : « tei ha’apa’o maita’i noa ’e tei haere noa i mua ma te fa’aro’o ». ’Ia nu’u ana’e tātou i mua ma te fa’aro’o, e ti’a ia tātou ’ia ti’aturi i te Atua, ’ia ha’apa’o i tāna mau fa’auera’a ’e ’ia tāvini ia vetahi ’ē—’e ’ia fāri’i i te ’oa’oa i roto i te tā’āto’ara’a o te reira ! Mai tā te peresideni Uchtdorf i parau : « Te feiā rā e ora nei i te hō’ē orara’a pipi… ’o te feiā ïa e rave i te mau ’ohipa ha’iha’i pinepine e riro mai ’ei maita’i ta’a ’ē rahi ».

Feruri i te hāmanira’a i te hō’ē tāpura nō te mau rāve’a nō te ora i te hō’ē orara’a pipi. ’Ei hi’ora’a, e pāpa’i ’outou i te hō’ē mana’o nō te tāvini mai te « tauturura’a i te hō’ē metua ’ia fa’aineine i te mā’a » ’aore rā hō’ē mana’o nō te ha’apa’ora’a i te mau fa’auera’a mai te « purera’a ’ia rahi te fa’aoroma’i nō tō’u mau taea’e ’e mau tuahine ». I te taime e tae mai te mana’o ’ino’ino ’e te tāhiti ’a rave i tā ’outou tāpura, mā’iti i te hō’ē mana’o ’e ’a tamata i te reira !