Parau poro‘i a te Peresidenira’a Mātāmua, ’ātete 2017
Hō’ē orara’a pipi
E toru ’ahuru matahiti i ma’iri a’e nei i Ghana, nō te taime mātāmua roa, ’ua tomo te hō’ē pīahi nō te fare ha’api’ira’a teitei, ’o Doe te i’oa, i roto i hō’ē fare purera’a a te ’Ēkalesia. ’Ua ani te hō’ē hoa ia Doe ’ia haere mai nā muri iāna, ’e e hina’aro rahi tō Doe ’ia ’ite mai te aha ra te ’Ēkālesia.
E mau ta’ata maita’i roa ho’i ’e te fāri’i popou, ’ua ui māere a’era ’oia : « E aha teie huru ’Ēkālesia ? »
Nō te fa’ahiahia o Doe i te ’Ēkālesia, ’ua fa’aoti ’oia e ha’api’i rahi mai ā nō ni’a i te reira ’e nō ni’a i tōna mau melo tei ’ī i te ’oa’oa rahi. ’A ha’amata ai ’oia i te rave i te reira, ’ua ha’amata te ’utuāfare ’e te mau hoa, e ’ere te mana’o ’ino tō rātou, e pāto’i iāna i te mau taime ato’a. ’Ua parau rātou i te mau mea ’ī’ino nō ni’a i te ’Ēkālesia ’e ’ua rave rātou i te mau mea ato’a ’ia taui tōna mana’o.
Tera rā ’ua fāri’i ’o Doe i te hō’ē ’itera’a pāpū.
E fa’aro’o tōna, ’e ’ua here ’oia i te ’evanelia, tei fa’a’ī i tōna orara’a i te ’oa’oa. ’E nō reira, ’ua tomo ’oia i roto i te mau pape nō te bāpetizora’a.
I muri iho, ’ua tu’u ’oia iāna i roto i te tuatāpapara’a ’e te pure. ’Ua ha’apae ’oia i te mā’a ’e ’ua ’imi ho’i i te fa’aurura’a o te Vārua Maita’i i roto i tōna orara’a. ’Ei hope’a, ’ua rahi roa mai ’e ’ua hōhonu roa te ’itera’a pāpū o Doe ’e tōna fa’aro’o. ’Oia ato’a, ’ua fa’aoti ’oia e tāvini i te hō’ē misiōni rave tāmau nō te Fatu.
I muri a’e i tōna ho’ira’a mai nā te misiōni, ’ua arapae ’oia ’e ’ua fa’aipoipo ho’i i te hō’ē misiōnare tahito—terā iho misiōnare tei bāpetizo iāna i te mau matahiti i ma’iri na—’e i muri iho ’ua ta’atihia rāua i roto i te hiero nō Johannesburg (Afirita Apato’a).
E rave rahi matahiti i ma’iri mai te taime ’a ’ite ai Doe Kaku i te ’oa’oa o te ’evanelia a Iesu Mesia. I roto i taua mau tau ra, ’aita te orara’a i riro noa e mea maita’i nōna. ’Ua fa’aruru ’oia i tāna tuha’a nō te māuiuira’a ’e te tapinevara’a, ’oia ato’a te pohera’a e piti tamari’i—tē tāmau noa nei ā teie mau māuiui i te fa’ateimaha i tōna ’ā’au.
Terā rā ’ua fa’aitoito noa na rāua tōna hoa fa’aipoipo, ’o Anthony, i te ha’afātata atu te tahi i te tahi ’e i tō rāua Metua here i te Ao ra, o tā rāua i here ma tō rāua ’ā’au ato’a.
I teienei, e 30 matahiti i muri iho tōna tomora’a i roto i te mau pape nō te bāpetizora’a, ’ua fa’aoti iho nei te tuahine Kaku i te hō’ē atu misiōni rave tāmau—te reira rā i pīha’i iho i tōna hoa fa’aipoipo, tei riro ’ei peresideni misiōni nō Nigeria.
Tē parau nei te feiā tei mātau i te tuahine Kaku ē tē vai nei te hō’ē mea ta’a ’ē nō ni’a iāna. Mea ’ana’ana ’oia. E mea fifi ’ia pārahi i pīha’i iho iāna ma te ’ore ’oe iho e ’ite i te ’oa’oa.
E mea pāpū tōna ’itera’a, ’ua parau ’oia : « ’Ua ’ite au ē tē hi’o mai nei te Fa’aora iā’u mai tāna tamāhine ’e ’ei hoa (hi’o Mosia 5:7; Etera 3:14) ». « ’E tē ha’api’i nei au ’e tē tūtava nei au ’ia riro ’ei hoa ato’a nōna—’eiaha noa nā roto i tā’u parau nā roto ato’a ra i tā’u ’ohipa ».
E mau pipi tātou
Hō’ē ā te ’ā’amu o te tuahine Kaku e tō vetahi e rave rahi. ’Ua hia’ai ’oia ’ia ’ite i te parau mau, ’ua aufau ’oia i te ho’o nō te fāri’i i te māramarama pae vārua, ’ua fa’a’ite ’oia i tōna here i te Atua ’e i tōna ta’ata tupu, ’e i te roara’a o te ’ē’a ’ua ’ite ’oia i te māuiui ’e te ’oto.
Noa atu rā te pāto’ira’a, noa atu te ’oto, ’ua haere noa ’oia i mua ma te fa’aro’o. ’E te mea faufa’a roa, ’ua tāpe’a ’oia i tōna ’oa’oa. ’Ua ’itehia iāna te rāve’a ’eiaha noa nō te fa’aoroma’i i te mau ’ati o te orara’a, nō te manuia ato’a rā noa atu te reira.
Hō’ē ā tōna ’ā’amu i tō ’outou ’e tō’u nei.
E mea varavara tō tātou tere e mea mānina ’aore rā ’aita e tāmatara’a.
E mau māuiui, e mau manuia ’ore, ’e e mau ’oto tō tātou tāta’itahi.
E fāri’i ato’a tātou i te tarapape ’e i te tahi taime ’ua tāhiti roa.
Te feiā rā e ora nei i te hō’ē orara’a pipi—tei ha’apa’o maita’i noa ’e tei haere noa i mua ma te fa’aro’o ; tei ti’aturi i te Atua ’e tē ha’apa’o nei i tāna mau fa’auera’a ;1 ’o tē ora nei i te ’evanelia i terā mahana ’e terā mahana, i terā hora ’e terā hora, ’o tē tāvini nei ma te huru Mesia i te feiā e ha’ati ra ia rātou, hō’ē ’ohipa maita’i i muri i te tahi—’o te feiā ïa e rave i te mau ’ohipa ha’iha’i pinepine e riro mai ’ei maita’i ta’a ’ē rahi.
Te feiā e hāmani maita’i ri’i a’e, e fa’a’ore hapa ri’i a’e, ’e e aroha rahi atu ri’i noa, ’o rātou ïa tei aroha atu e fāri’i i te aroha.2 Te feiā e fa’ariro mai i teie ao ’ei vāhi maita’i a’e, hō’ē ’ohipa aupuru ’e te here i te hō’ē taime, ’e ’o te tūtava noa i te ora i te orara’a ha’amaita’ihia, te au maita’i ’e te hau o te pipi a Iesu Mesia, ’o rātou ïa te ’itea mai te ’oa’oa i te hope’a.
E ’ite rātou ē « tō te Atua aroha ïa, tei tauturu mai i te ’ā’au o te mau tamari’i a te ta’ata nei… e mea hina’arohia ïa i te mau mea ato’a… ’e e mea ’oa’oa roa ïa i te vārua ».3
© 2017 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō First Presidency Message, August 2017. Tahitian. 97928 895