Unsa ang Institute?
Ayaw sipyata ang panaghigalaay, espiritwal nga proteksyon, ug ang kahibalo sa ebanghelyo.
Dihang si Elder M. Russell Ballard sa Korum sa Napulog Duha ka mga Apostoles miawhag sa mga young adult sa pagkahimong “halangdong henerasyon … sa kasaysayan sa Simbahan”, usa ka butang nga girekomendar niyang buhaton mao ang pag-enrol sa institute of religion. Misaad siya nga sa paghimo niini, mas maandam sila alang sa misyon, sa mahangturong kaminyoon, ug sa kinabuhi isip usa ka hamtong, ug mas modawat og inspirasyon ug giya pinaagi sa Espiritu.1
Apan kon dili ka gayud sigurado unsa ang institute of religion sa Simbahan o sa unsang paagi kini makapanalangin sa imong kinabuhi human sa high school, akong sulayan sa pagtubag ang pipila sa imong mga pangutana.
Kinsa ang Mahimong Motambong?
Kadaghanan sa mga batan-on mopili nga moapil sa seminary, dayon unsa man ang sunod? Ang pipila ka estudyante moeskwela sa unibersidad sa Simbahan o kolehiyo, diin ang mga kurso sa relihiyon gitukod sa ilang eskwelahan apil sa ilang iskedyul sa pag-eskwela. Ngano kaha? Tungod kay ang pagkaadunay kasinatian sa espiritwal nga edukasyon dungan sa akademik nga kasinatian mahinungdanon kaayo.
Apan unsa kaha kon dili sa Simbahan nga eskwelahan ka nag-eskwela? Daghan kaayong young adult wala makaamgo nga ang pagtipon sa akademik ug sa espiritwal nga edukasyon anaa hapit sa tanang dapit bisan asa sila moadto. Kon moeskwela ka og kolehiyo, ang institute of religion program sa kasagaran naa ra sa duol, sa kasagaran tabok ra sa karsada sa eskwelahan sa kolehiyo o sa lokal nga building sa Simbahan. Gani ang ubang mga kolehiyo motugot man nga ang mga klase sa institute matudlo diha gayud sa ilang mga campus. Bisan human maka-graduate sa kolehiyo, welcome gihapon ka sa pagtambong.
Dili gani kinahanglan nga estudyante gyud ka sa kolehiyo. Ang tanang young adult, nga nag-edad og 18–30, minyo o dili, makatambong sa institute.
Bisitaha ang institute.lds.org aron makakita sa institute nga naa sa imong duol.
Nganong Kinahanglan nga Motambong?
Ang programa nagsugod nga may 57 ra ka estudyante duol sa kolehiyo sa Moscow, Idaho, USA, ug karon may kapin na sa 250,000 ka mga estudyante sa tibuok kalibutan. Nakita nila ang talagsaong kalig-on ug mga panalangin nga gibu-bu sa ilang kinabuhi. Sa bag-o lang nga survey, ang mga estudyante sa institute sa 10 ka nagkalain-laing nasud gipangutana kon unsay nahimo sa institute kanila. Nganong nangadto man sila? Giunsa sa pagtabang niini? Liboan ka tubag ang natigom ug nagtug-an kini og tulo ka dakong tema: Ang institute nakatabang sa mga estudyante sa (1) pagpalig-on sa ilang relasyon uban ni Jesukristo, (2) paglambo sa espiritwal nga paagi, ug (3) pag-angkon og pagsalig sa paghimo og importanting mga desisyon sa kinabuhi.
Hunahunaa ang mga desisyon nga imong giatubang: pagpili og kolehiyo; pagdesisyon kon magmisyon ba o dili; ug pagpili og trabaho, mga higala, ug kaminyoan. Mga dagkong desisyon kini. Ug sigun sa gisulti ni Presidente Thomas S. Monson, “Ang mga desisyon motino sa destinasyon.”2 Sigurado nga kining mga lisud nga desisyon kinahanglang buhaton uban sa tabang sa Espiritu Santo. Ang gikinahanglan nga balaanong tabang makita kon konektado ka sa Espiritu, sa mga kasulatan, ug sa mga higala nga pareho nimo’g mga hiyas pinaagi sa religion class sa institute o sa eskwelahan sa Simbahan.
Si Laura usa ka estudyante nga nakabenipisyo sa institute. Dihang nagsugod siya og tambong sa unibersidad sa Ontario, Canada, gibati niya nga nawala ug mibati nga dili na sama kalig-on ang iyang pagpamatuod kay sa una. Nagsugod siya’g tambong og institute ug sa makausa pa “mibati nga naulian” ug “nasayud kinsa siya.” (Tan-awa ang iyang sugilanon ug ang sugilanon sa uban pang mga young adult diha sa InstituteIsForMe.lds.org.)
Kon tinud-anay kang nakaila kon si kinsa ka—nga anak sa mapinanggaong Langitnong Amahan kinsa gusto nga mahimo kang malampuson—makahimo ka og importanting mga desisyon padulong sa kalipay ug kalampusan.
Samtang nagpalig-on ka base sa unsay imong nakat-unan sa seminary ug ubang mga kasinatian, ang pagtambong og institute makalig-on sa imong relasyon kang Jesukristo sa usa ka labihan ka mahinungdanong panahon sa imong kinabuhi ug makatabang nga imong mapadayon ang espiritwal nimong pag-uswag.
Ang Langitnong Amahan nahigugma kanimo. Mohatag siya kanimo og mga paagi nga makapadayon ka sa pagkahimong sama Kaniya. Ang institute usa nianang mga paagi nga maghimo og kalainan sa gatusan ka libo nga kinabuhi matag tuig.