Nkɔnhyɛfo Bɛma Hɛn Akwankyerɛ

Mfe kakra a abɛsen kɔ no, nna metsena Salt Lake Temple dan ne bea a President a Odzi Kan na n’Apamfo na Asomafo Duebien no hɔn Quorumfo no hyia mu da kor wɔ dapɛn biara mu no. Mohwɛɛ ban no a ɔhwɛ President a Odzi Kan na n’Apamfo atsenae no, na hɔ na medze m’enyiwa tsiim Asɔr no ne Presidentfo no kor biara no mfonyin do.

Ber a morohwɛ m’edzikamfo no—ofi Nkɔnhyɛnyi Joseph Smith (1805–44) dze kesi President Gordon B. Hinckley (1910–2008) do no—modwen ho dɛ, “Mbrɛ m’enyi si sɔ hɔn mu kor biara n’akwankyerɛ a.”

Iyinom yɛ mbanyin etsitsir a woennhihim dabiarada, wɔannfom, na woenndzi nkõgu dabiarada. Iyinom yɛ Nyame nyimpa. Sɛ modwen ndɛ mber yi mu nkɔnhyɛfo a minyim hɔn na modɔɔ hɔn no a, mekaa hɔn abrabɔ, hɔn suban, na hɔn nkenyan nkyerɛkyerɛ no.

Nna President Heber J. Grant (1856–1945) nye Asɔr no ne President ber a wɔwoo me no. Sɛ modwendwen n’abrabɔ na ne nkyerɛkyerɛ ho a, megye dzi dɛ su a daa President Grant yɛɛ ho fasusu nye nwɔwdo—nwɔwdo wɔ ndzɛmba a oye na ɔyɛ enyimnyam mu.

President George Albert Smith (1870–1951) yɛɛ Asɔr no ne President ber a mosoom dɛ mo ward ne bishop wɔ Salt Lake Kuropɔn mu no. Ɔhyɛɛ no nsew dɛ nna twe-ma-montwe ɔkõ kɛse bi rokɔ do wɔ Ewuradze na ɔsɛɛfo no ntamu. Ɔkyerɛkyerɛɛ dɛ, “Sɛ ewɔ Ewuradze N’afã wɔ kyerɛpɛn no ɔda ntamu no a, ibɛhyɛ ne nhyɛdo ase na erennya pɛ dɛ ibɔfom.”¹

President David O. McKay (1873–1970) na ɔfrɛɛ me dɛ monsom dɛ Asomafo Duebien no Quorumnyi wɔ afe 1963 mu. Ɔdze n’abrabɔ su kyerɛkyerɛɛ tsema ma nkaafo. Ɔkãa dɛ, “Nokwar Christiansom nye ɔdɔ a wɔdze ridzi dwuma.”²

President Joseph Fielding Smith (1876–1972), Asɔr no mu ɔkyerɛwfo kor a ɔkyerɛɛw nwoma pii no, a n’abrabɔ mu fapem akwankyerɛ nye ɔbɛyɛ asɛmpa mu ɔbemfo. Ɔkenkaan kyerɛwsɛm no daa daa na nna onyim nkyerɛkyerɛ na adzesũadze a ɔwɔ ne nkrataafa no mu no mapã kyɛn obiara a minyim no.

President Harold B. Lee (1899–1973) soom dɛ me stake president ber a nna meyɛ banyimba no. Nna no ɔserɛkã a ɔtaa kã nye “Hom ngyina mbea krɔnkrɔn do, na mma hom nnhihim.”³ Ɔhyɛɛ Ahotseweefo no nkuran dɛ wɔmfata na wɔngye Sumsum Krɔnkrɔn n’awasa ndze no.

Megye dzi dɛ akwankyerɛ fapem a ɔwɔ President Spencer W. Kimball (1895–1985) n’abrabɔ mu bɛyɛ ahofama. Otuu noho nyina mu a oennhihim dze maa Ewuradze. Ɔsaan so tuu noho sii hɔ dze asɛmpa no bɔɔ bra.

Ber a President Ezra Taft Benson (1899–1994) bɛyɛɛ Asɔr no ne President no, ɔfrɛɛ me dɛ monsom dɛ no Ɔpamfo a Otsĩa Ebien wɔ President a Odzi Kan na n’Apamfo no mu. Nna ɔdɔ yɛ n’akwankyerɛ fapem, a ɔhyɛ no ɔserɛkã a ɔpɛ mu, dza Agyenkwa no kãa ho asɛm dɛ, “Ebɛn nyimpa ne saso na ɔsɛ dɛ hom yɛ? Nokwar mese hom dɛ, dɛ ma metse mpo.”⁴

Nna President Howard W. Hunter (1907–95) yɛ obi a daa daa ɔhwɛ dza ɔkrɔn wɔ nkaafo mu. Obu adze aber nyina, ɔyɛɛ ahobrɛadze aber nyina. Ɔyɛɛ me adom dɛ mosom dɛ no Ɔpamfo a Otsĩa Ebien.

President Gordon B. Hinckley kyerɛkyerɛɛ hɛn dɛ yɛnyɛ dza ɔkrɔn a yebotum ayɛ. Ɔdze tum gyee dase wɔ Agyenkwa na No som dwuma no ho. Ɔdze ɔdɔ kyerɛkyerɛɛ hɛn. Nna ɔyɛ enyimnyam na nhyira ma me dɛ mosom dɛ no Ɔpamfo a Odzi Kan.

Agyenkwa no soma nkɔnhyɛfo osiandɛ Ɔdɔ hɛn. Ɔbɛsɛ yi wiadze mfɛndzanan ehyiadzi ber mu no, ɔbɛyɛ Asɔr no ne Wiadze Mfɛndzanan Etumdzifo adom dɛ wɔbɛkyɛ N’asɛm. Yɛdze krɔnkrɔnyɛ na ahobrɛadze kɛse yɛ asodzi yi.

Mbrɛ osi yɛ nhyira ma hɛn dɛ Jesus Christ n’Asɔr a wɔdze asan ananmu no wɔ asaase do na dɛ wɔakyekyer Asɔr no wɔ nyikyerɛ ɔbotan do. Daa daa nkyikyerɛ nye Jesus Christ asɛmpa no ne ngyinado ankasa no.

Hom mma yɛnyɛ ahoboa dɛ yɛbɛgye ankorankor nyikyerɛ no a ɔba piigyan wɔ wiadze mfɛndzanan ehyiadzi ber mu no. Hom mma pisi a no mu dɔ nhyɛ hɛn akoma mu ber a yɛma hɛn nsa do dze ma nkɔnhyɛfo na asomafo atseasefo no tsipia no. Hom mma hɛn adwen mu mbue, yenya ntowdo, awerɛkyekyer, na dzenhyɛ ber a yetsie hɔn nsɛm no. Na hom mma yɛnyɛ krado do dɛ yɛbɛsan dze hɛnho ama Ewuadze Jesus Christ—N’asɛmpa na N’edwuma—na yɛahyɛ bɔ fofor dɛ yebesie Ne mbrasɛm na yɛayɛ Ne pɛ.