O Leo o Le Au Paia o Aso e Gata Ai
O La’u Vaisu; o le Fesoasoani a le Faaola
Ata na tusia e Joshua Dennis
O ni nai tausaga ua mavae, sa toetoa lava a ma tetea ai ma lo’u toalua ona o lo’u faafitauli i le ava malosi. Sa le mafai lava foi e loimata o la’u fanau teine ona suia au. Ina ua asiasi mai faifeautalai i lo matou aiga, sa lei umi ae papatisoina lo’u toalua ma le ma fanau teine, ae sa ou le taliaina mea a le Atua.
O la’u vaisu o le ava malosi sa puleaina lo’u olaga. Sa ou alu i falepia pe a manava galuega ma sa masani ona ou le faigaluega ona sa ou onā. Pe a ou onā, e amata ona ou malo vale. E masani ona ou aafia i feupuaiga ma fusuaga ma isi.
A ou alu ou te faigaluega, e fetagisi la’u fanau teine ma fai mai matou te o e aua ai ne’i ou inupia. Sa ou folafola atu ia i laua o le a ou le inu, ae e le taitai o’u tausia a’u folafolaga. Sa nao lo’u manao lava e inu pea.
Mulimuli ane, sa ou iloaina sa ou manaomia se fesoasoani. Faatasi ai ma le fesoasoani a faifeautalai, sa ou galue ai e faatoilalo la’u vaisu. Mo se vaitaimi, sa le mafai ona tuu la’u inu mo le silia ma se vaiaso i le taimi.
Ona faasoa mai lea i se tasi o aso e faifeautalai se fuaitau mai le Tusi a Mamona na faapea ona suia ai lou olaga: “Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou” (Eteru 12:27).
Sa ou manaomia le fesoasoani a le Faaola. Ana leai o Ia, e le mafai ona ou faatoilaloina la’u vaisu. Sa ou iloa ai, o le tele lava o lo’u faalagolago ia te ia, o le umi foi lea e mafai ona ou le inupia ai. Ina ua mavae ni nai feiloaiga ma faifeautalai, sa ou taliaina loa le la valaaulia ina ia [ou] papatiso.
Talu mai lena taimi, ua sui ai lava lo’u olaga. Ua mavae atu le silia ma le valu tausaga, ae ou te lei toe inuina lava se faatulutulu se tasi o le ava malosi. I le taimi nei ua ou saoloto, ma ou te aitalafu i mea uma i le Alii.