Haere e tauturu, hō’ē pēnitara i te taime hō’ē
’Ua ha’amata teie ’ohipa i te taime ’a ha’amau ai tā’u titi i te hō’ē ’ōpuara’a ’ohipa nō te tauturu i te mau tītīhoria. ’Ua au roa vau i teie ’ōpuara’a ’ohipa, nō reira ’ua ani au i tō’u māmā ’ia fa’a’ite i te reira i tō’u ’orometua ha’api’i, ’e ’ua hina’aro atura ’oia e rave i te hō’ē mea ’e te piha fāito maha. Nō te fa’a’ite i te hi’ora’a nō te reira ’ōpuara’a ’ohipa, ’ua haere māua tō’u tuahine ’o Maddie e pātōtō i te mau ’ōpani fare ato’a nō te ani i te mau ō.
’Ua tae maira te mahana e vauvau ai i te ’ōpuara’a ’ohipa i mua i te toe’a o te piha fāito maha. ’Ua huru mata’u ri’i au. E nehenehe e parau ē, ’ua ri’ari’a vau, terā rā ’ua fa’aitoito vau. ’Ua parau vau i te tā’āto’ara’a o te tahi atu mau fāito maha i te mau mea e hina’arohia nō te pū’ohu ha’api’ira’a nā te mau tītīhoria. ’Ua fa’a’ite au i tō’u haerera’a e pātōtō i te ’ōpani fare, ’e ’ua tu’u atu vau i te ’ōpuara’a ia rātou ’ia tāmata i te reira ’ē ia hau atu tā rātou moni e noaa mai i tā’u. ’Ua roa’ahia ia mātou pā’āto’a 100 pū’ohu ! I roto ’ua tu’u mātou i te mau buka iti, te mau pēnitara ’e te tahi atu mau mea nō te ha’api’ira’a. ’Ua tu’u ato’a mātou i te hō’ē parau tei nā ’ō ē, « Manava i te taera’a mai i Helemani ».
’Ua ’āfa’i māua tō’u māmā i te mau pū’ohu i te pūhapara’a tītīhoria. E’ita vau e parau atu ē, e mea au roa te pūhapara’a, tē vai ra rā hō’ē tahua ha’utira’a ’e hō’ē vāhi ha’api’ira’a. Tē vai ra hō’ē pereo’o auahi tāpiri mai i te pūhapara’a e mea māniania mau, ’e ’ua parau mai te mau tamari’i iā’u ē, e au i te manureva tūtuha auahi e rere ra i Suria ’e i te tahi atu mau vāhi mai te reira. Penei a’e e au tōna māniania nō te tamari’i mai tō te tupita tā rātou i fa’aro’o i to rātou fenua.
’Ua fārerei au i te tahi mau tamari’i i te pūhapara’a hō’ē ā matahiti e tō’u, mai ia Daniel, e tamari’i ’aravihi i te ha’uti i te perē fānu’u « Échecs ». ’Aita i ti’a iā’u ’ia ha’uti i te perē Échecs ’e ’ōna, ’e ’auē ïa te oto ē, i te mea ē, e mea au nā’u te perē Échecs, terā rā ’ua ani manihini mai rātou iā’u ’ia ha’uti tu’e pōpō ’e te ping-pong. ’Ua parau mai te mau tamāroa ē, ’ua mihi rātou i tō rātou mau ’utuāfare, ’e ’ua hina’aro roa rātou e fa’aru’e i te pūhapara’a ’e e haere fa’ahou i te haapi’ira’a.
’Ia hope tā mātou ha’utira’a tu’e pōpō ’e te ping-pong, ’ua horo’a atu mātou i te mau pū’ohu. ’Ua ’oa’oa vau i te mea ē, ’ua ti’a iā’u ’ia rave i te hō’ē ’ohipa maita’i nā te mau tamari’i e ora ra i roto i te mau pūhapara’a.