« Ta’a’ē noa atu te pure ’e te tuatāpapara’a i te pāpa’ira’a mo’a, e aha te rave’a maita’i a’e nō te ha’apūai i tō’u ’itera’a pāpū ? »

E’ita paha tō ’outou ’itera’a pāpū e tupu i terā iho taime. E tupu te reira i te rahi hō’ē ’itera’a vārua i te taime hō’ē—mai tā te mau pāpa’ira’a e parau nei ē, « ’e ’ua nā ni’a iho i te fa’aue, ’ua a’o, ’e ’ua nā ni’a iho i te a’o » (2 Nephi 28:30). I muri iho, tītauhia ia ’outou ’ia fa’a’amu ’e ’ia ha’apūai i tō ’outou ’itera’a pāpū, mai te au i te tupura’a o te hō’ē huero (hi’o Alama 32:28-43). ’E mai te hō’ē rā’au tupu e ’ore e ora i te pape ana’e ra, ’aita e vai ra hō’ē noa iho rāve’a « maita’i a’e » nō te ha’apūai i tō ’outou ’itera’a pāpū. Tītauhia ’ia ’āmui e rave rahi mau rāve’a.

’Ua riro te pure ’e te tuatāpapara’a pāpa’ira’a mo’a ’ei rāve’a maita’i roa nō te fa’a’amu i tō ’outou ’itera’a pāpū. Mai te mea ē, e tuatāpapa ’outou i te ’evanelia ’e e pure ho’i ma te ’ā’au tae mau nō te ’ite e parau mau te hō’ē mea, e tauturu mai te Vārua Maita’i ia ’outou ’ia ’ite i te parau mau o te ’evanelia (hi’o Moroni 10:4-5).

E nehenehe ato’a tā ’outou e ha’apūai i tō ’outou ’itera’a pāpū nā roto i te ha’apa’ora’a i te mau fa’auera’a. I te taime e ora ’outou i te hō’ē parau tumu o te ’evanelia—mai te ha’apaera’a mā’a, te ha’amo’ara’a i te mahana Sābati, ’e ’aore rā, te ravera’a i te ’ōro’a mo’a—e ha’amata ’outou i te fāri’i i te hō’ē ’itera’a pāpū o te nāhea ’e te nō te aha e parau mau, ’aita i riro noa e parau mau. ’Ua parau Iesu ē, ’ia mā’iti ana’e ’outou ’ia « ha’apa’o i tōna hina’aro », e ’ite ’outou « i tā’u e ha’api’i nei » (Ioane 7:17).

Te tahi atu rāve’a nō te fa’a’amu i tō ’outou ’itera’a pāpū, nā roto ïa i te fa’a’itera’a i te reira. ’Ua parau te peresideni Boyd K. Packer (1924-2015), peresideni nō te pupu nō te Tino ’Ahuru Ma Piti ’āpōsetolo, « E ’itehia mai te hō’ē ’itera’a pāpū i roto i te fa’a’itera’a i te reira! » (« The Candle of the Lord », Ensign, tenuare 1983, 54; Tambuli, tiurai 1983, 34). E nehenehe tā ’outou e fa’a’ite i tō ’outou ’itera’a pāpū i te purera’a ’e i te ha’api’ira’a ’evanelia, i te fare, ’e i rotopū i te mau hoa. ’Ia nā reira ’outou, e nehenehe te Vārua Maita’i e fa’a’ite pāpū ia ’outou ē, e parau mau te mea tā ’outou e fa’a’ite ra.

Mai te mea ē, e ha’apūai ’outou i tō ’outou ’itera’a pāpū nā roto i te mau rāve’a rau, e tupu te reira i te rahi ’e te hōhonu, ’e e ’ite ’outou i te hau ’e te ’oa’oa.