Iaļen itok itak eo an Jane

Pija

janes journey

Jane Manning eaar lale wa eo ej eppāpe jān aba eo n̄an Lake Erie. Liin eaar en̄jake āinwōt ettōņak ko an raar eppāpe ļo̧k ippān.

Juon iiō emootļo̧k, liin eaar koba tok ilo Kabun̄ eo an Jisōs Kraist im Armej ro Rekwojarjar ilo Raak-ko Āliktata im kar jokālet n̄an em̧m̧akūt n̄an an pād ippān Armej ro Rekwojarjar ilo Nauvoo. Jinen im ro jet jiljilimjuon uwaan baam̧le eo raar etal ippānļo̧k ilo Erie Canel eo n̄an Buffalo, New York. Bōtaab ilo Buffalo, raar jab kauweik er ilo wa eo kōnke kōn kōļar in kūlier.

“Ta eo jej kōm̧m̧an kiiō?” ļeo jemjān jemjatin, Isaac, eaar kajjitōk ilo ainikien edik.

Kajjitōk eo eaar epan̄ijn̄ij ilo mejatoto eo em̧ōļo. Nauvoo eaar 800 m̧aiļ (1,287 km) ettoļo̧k. Remaron̄ in kar ebbeer ak bar jepļaak n̄an kapijuknen, ak kajjieon̄ etal tok ālik. …

Bōtaab Jane eaar jab maron̄ kōttar! Liin eaar jeļā Bok in Mormon eo eaar m̧ool. Anij eaar bar juon alen kōnono n̄an rikanaan ro. Liin eaar aikuj in etal n̄an Nauvoo ippān baam̧le eo an.

Jane eaar jutak kankan im reitoļo̧k. “Jej etetal laļ ļo̧k.”

Im raar etetal laļ ļo̧k. M̧ae iien juuj ko aer raar potak. M̧ae iien nee ko neer raar kōk im to̧o̧r būtōktōk im raar aikuj jar n̄an aer mo. Jet iien raar kiki itunam̧ōj, im m̧ōļo eo eaar kanooj in ļap eaar āinwōt ej wōtlo̧k jiņo̧. Jet armej raar kaamjak er im likūt er ilo kalbuuj, ļōmņak bwe raar rikōm̧akoko ro raar ko. Raar jab jeļā bwe Manning ro raar juon baam̧le in rikilmej ranemkwoj. Im raar etetal laļ ļo̧k wōt, al al ko n̄an kōm̧ōkajļo̧k iien.

Raar epaake Nauvoo ke raar tōpar juon reba.

“Ejjeļo̧k būriij,” Isaac eaar ba.

Jane eaar em̧ajidjid. “Innām, jej aikuj etetal ilowaan ļo̧k.” Ke eaar jutak ilowaan reba eo, dān eo eaar tōpar kolele in neen. Jidik kake, liin eaar wōnm̧aanļo̧k. Dān eo eaar m̧ōkaj an tōpar bukien innām eļļā jān ipiin. Ilo tōre eo eaar tōpar ioļapļap in aaet eo, dān eo eaar tōpar kōnwaan! Jeraam̧m̧an, eaar jab m̧wilaļļo̧k, im aolepān Manning ro raar kijoone ilo ineem̧m̧an.

Āliktata raar itok n̄an Nauvoo. Jane emaron̄ kar lo dekāļaim̧ in dāpdep ko raiboojoj an Nauvoo Tampeļ eo ioon juon bat ioon kom̧laļ eo. Men̄e ejjan̄in kar dedeļo̧k, eaar kabun̄ būruwōn. Juon eaar tōlļo̧k er n̄an m̧weo ijo Josep eaar jokwe ie.

Juon kōrā aitok, ekilmej koļan bōran eaar jutak ilo m̧aan kōjām eo. “Deļōn̄ tok, delōn̄ tok!” liin eaar ikkūr. “N̄a Emma Smith.”

Minit ko tok jet raar tab mejatoto. Jane eaar ioon Rikanaan eo, im eaar karōk jea ko ilowaan ruum̧ eo n̄an Manning ro. Jane eaar jijetļo̧k ilo jea eo kōn kam̧oolol im ron̄jake ke Josep eaar kwaļo̧k kadkadier n̄an aolep ro ijo, ekoba eo m̧ōttan Dr. Bernhisel. Innām Josep eaar oktakļo̧k n̄an Jane, “Kwar im̧aan jar jidik in, kwar ke?” eaar kajjitōk.

“Aaet, le!” Jane eaar uwaak.

Josep eaar ettōn̄. “Anij en kōjeraam̧m̧an eok! Kiiō ikōņaan ron̄ kōn itok itak ko ami.”

Jane eaar ba kōn jorrāān an nee ko neer im kiki ilo jiņo̧ im kijoone reba eo. Aolep raar kanooj ron̄jake ilo ikōn̄. “Bōtaab eaar jab nana,” liin eaar kōjemļo̧ke. “Kōm kar ilo̧k ilo iaļ in am lan̄lōn̄, al al ko im kam̧oolol Anij kōn em̧m̧an eo An ejjeļo̧k jemļo̧kin im meanwōd eo n̄an kōm ilo kōjeraam̧m̧an kōm, kōjparok kōm, im kamo nee ko neem.”

Eaar wōr ikōn ium̧win juon iien. “Ta am̧ ļōmņak kōn men eo, Taktō?” Āliktata Josep eaar ba, den̄ōt bukien em̧m̧aan eo. “Ta ejjab tōmak ke?”

“Eļan̄n̄e en kar n̄a, ij mijak ij aikuj kar bweradikļo̧k im bar jepļaak n̄an kapijuknen!” Dr. Bernhisel eaar kwaļo̧ke.

Josep eaar em̧ajidjid im oktakļo̧k n̄an Jane im baam̧le eo an: “Anij en kōjeraam̧m̧an kom̧. Kom̧ij ibwilijin ro m̧ōtta.”