Ataia imwain Nakom: Bwabetito n te Tembora
Ko aki riai n tataninga. Ni kabane kain te aro, n reitaki ma kairake ao kain te aro ake a boou, a kona ni beku inanon te tembora ngkai.
“Ti a bane riki n nanako-n te tembora ao n riki bwa aomata-aika tatangira te tembora ni koaua,” e taku President Howard W. Hunter (1907–95). “Ti riai ni kabaitiia rorokora n te tembora … i bon iroura n angaraoina. Ti riai n aki tii nako ibukiia ara utu ake a tia ni mate ma ti na karekea naba i bon irouia kakabwaia man te taromauri n te tembora, ni karekea te taneiai ae tabu ao te kamanoaki man karinean ao katabuan oona akekei” (“A Temple-Motivated People,” Ensign, Beberuare 1995, 5).
Te reirei aei e bane ni kaineti nakoia kain te aro n ana Ekaretia Iesu Kristo ibukiia aika Itiaki ni Boong aika Kaitira—e ngae ngke ko a tibwa bon bwabetitoaki bwa kain te aro. N aron ae ko a tau, akea tain te tataninga imwain are ko kona n nakon te tembora. N te tai naba are ko a tia ni bwabetitoaki iai ao ni kamatoaki, ko kona ni karekea te rekomente nakon te tembora ae tianaki taina.
Te rekomente aio e anganiko te kariaia n rin n te tembora ni karaoi bwabetito n onomwi ao ni kamatoaki ibukiia bakatibu ake a tia ni mate. N aron ae ko mwakuri ao n nebonebo inanon te tembora, ko kona ni kakorakora am kakoaua n te euangkerio.
Ni moan rokona inanon te tembora, Natalia Lorena Figueroa mai Argentina e taku, “Inanon te tabo ni bwabetito n te tembora, I matakuakina mwaneu ae kain te aro ni bwabetitoaki ibukin tibu te unimwaane ao naan ai tamau. I a manga bwabetitoaki ibukin tibu te unaine ao naan ai tinau. Te kimwareirei ae I namakinna e kamiimi. Raanimata a bwaro mai matau, ao I namakina te bue i babaau are I tuai kakarekea mai mwaina. Kakabwaia n ai aron aikai a tataningaia ake a tau ibukin kabonganaan te tembora rekomente ae tianaki taina.