Nimaua Reirei ibukiia Kairake ni Ikawai mairouia Kairake n Abotoro
Tera ae ti kona n reiakinna n te bong aei man are a rinanona moan Abotoro ni Kaokan bwaai?
A mena imarenan te ririki ae 23 ao 35, ngke a buoka ni bita te aonaaba. Moan Abotoro ni kaokan te Ekaretia bon kairake. Tabeman a namakinna ae aki tau. Tabeman a karaoa te kaairua. Ma ni kabane a karaoa te bitaki. Aikai nimaua reirei ae ti kona n reiakinna man are a rinanona.
1. E Aki Nanonaki bwa Ko na Namakina ae Tamaroa Tau n Riki n Tau
Kamataata n te tamnei iroun Elizabeth Thayer
Heber C. Kimball e namakina te aki tau ngke e karekea weteana nakon te Kooram n Abotoro n Tengaun ma Uoman inanon Beberuare 1835. E kaina te Ekaretia inanon te maan ae e kee iaan tenua te ririki ao ai tiba 33 ana ririki i maeu.
“Bon tiaki te bwai ae I kantaningaia,” Heber e ururing.1 Ma e kukurei ni butimwaea te wewete, ao inanon kakabwaia ni katabuana e tuangaki “bwa mirion mwaitiia” aake a na bon “rairaki man ana kakairii.”2
N aron ana beku te Abotoro e ibuobuoki ni uoua te mition aika nakoraoi nako Engiran. E rairiia aomata aika a rang ni mwaiti ake kanoaia ni maiu a nakon te mirion n te bong aei. Ibukin Heber, e kariaia weteakina riki ngke e namakinna ae akea arona n anganna te kakabwaiaaki ao tabeman riki aika mwaiti.
2. Ti Kaitiakaki Man Babaire, Tiaki n Aroarora
Thomas B. Marsh e birinako man mweengana i New Hampshire n ana ririki ae 14. E riki bwa te reibwa n te tabo ni man i Vermont; e riki bwa te ueita i Albany, New York; n te outeero n te kaawa ae bubura i New York; ngkanne e riki bwa te tia mwakuri i Long island. Aroarona e aki tiku raoi ni karokoa e kaaitibo ao e mare ma Elizabeth Godkin.
Ngaia ao Elizabeth imwin maania a kairaki iroun te Tamnei n nako mainikun New York. Ikanne, a ongo taekan Ana Boki Moomon. Thomas e noori moan katooton 16 iteraniba ngke a otinako man te bwereeti, ao te burinta e karekea ana tai ni wareki iteraniba ibukin kakoauaana. Kakoauaan te boki bwa ana boki te Atua, Thomas e rineia ni kaaina te Ekaretia. E bwabetitoaki n Tebetembwa 3, 1830.3
Thomas e kabwarabwara te euangkerio n aono aika bati. E teimatoa ni kaangaanga ngke aomata ake a Itiaki a imanonoaki ni kitana Jackson County, Missouri, n Nobembwa 1833. Ngaia bon te moan membwa n te kauntira ae rietaata i Missouri ngke e moan barongaki n Tuurai 1834. Imwin weteana n riki bwa te Abotoro n ana ririki ae 34, e riki bwa te Beretitenti n te Kooram n Tengaun ma Uoman. E ngae ngke e tia ni kakorakora ni kamanoa Iotebwa Timiti irouia taan kaaitara n taai ake rimoa, Thomas inanon maanna e a manga kerikaaki n tokin te tai. Inanon 1838 e rineia ni kitana te Ekaretia.4
Mairoun Thomas Marsh ti reiakinna bwa arora n aki tekateka raoi e aki kararoaira man kakabwaia n te euangkerio—ke man kakabwaiaakin maiuiia tabeman.
3. Taratara Raoi: Akea Temanna ae E na Tamaroa Bwakana
Lyman Johnson bon te kabanea ni uarereke mairouiia ake a weteaki—23 ana ririki ao aua te namakaina n te tai anne. E a kaman tia ni katabuaki bwa te ibonga ae rietaata ai tibwa tabeua te bong imwin koron 20 ana ririki n 1831 ao e a kaman beku n tabeua mition ibukin te Ekaretia. Ngke iaon ana mition teuana, e kabwarabwara reirein te aro e uringaki n aron ae “teuana ibuakon korakoran kakoaua n taekina ana mition Iotebwa Timiti, ao korakoran te mwakuri n te kabane ni bong.”5
Te kananokawaki, ana beku Lyman n Abotoro e aki rang maan. Inanon kaangaangan kareke mwane man kaubwain te aba i Kirtland, Ohio, n 1837 e bitaki ni kaaitaraa Iotebwa Timiti. Lyman e kabaneaki inanon 1838.
E aki taraa tamaroana ana konabwai ni kabwarabwara, tera ana mwakuri ae taua n te Ekaretia, Lyman e tiku ni bwaka. Brigham Young e taku bwa Lyman imwiina e taekinna bwa e tangiria n teimatoa ni kakoaua te euangkerio: “I a tia ni kaonaki n tekimwareirei ao te kukurei. … I kukurei n te ngaina ao te bong. … Ma ngkai ai bon te rotongitong, te maraki, te nanokawaki, ao te mweengabuaka e a rang korakora.”6
4. Te Ongotaeka e Aki Berita ni Katokan te buakaka, ma E Uaana
Imwiin katabuan Parley P. Pratt bwa te Abotoro, Oliver Cowdery, temanna ibuakoia ake a katauaki ni buoka rineaia Abotoro, e angan mwiokoan Parley ae onoti, e taku bwa e na “karekei kaangaanga ni kaitaraa ni kakoroa bukin te mwakuri aei, are Abotoro ngkoa n taai akekei a karekea.” E taku bwa Parley e na kaitaraa “matoan karabuti ake kenaki inano ao n rotongitong,” ma aroaro a riai n aki kabwara nanona, ibukina kataakina e na konaa “ni karekea te mimitong” te Uea e kaikoi n te auti ni kaikobwai ibukina.7
Maiun Parley e tou mwiin te baeten anne. Inanon taai tabetai e na kaitara korakoran te maiu nikainnano. E ngareakinaki n ae aki raoiroi ngke e kabwarabwara te euangkerio. E kabureaki n 1838 ao 1839 ni bukinana imwiin te kaangaanga are a kaaitara kain te Ekaretia i Missouri. E tia Parley naba ni karekea te kakabwaia are e beritan Oliver nakoina. E aki maan imwin otinakona man te karabuti, e koreia, “Ti marurung, ao n tokanikai n ae korakora iroun te Uea, imwin nako ara kaangaanga ni kabane.”8
5. E Aki Taraaki te ririki n aron Mwaitin te Onimaki
Orson Pratt, tarin Parley, bon te kauoman ni uarereke n Abotoro. E katabuaki ngke 23, e bon ikawai tabeua te wiiki nakon Lyman Johnson. Te beku are Orson e kaman tia n anga nakon te Ekaretia e karekea tamaroan te katooto n aroia kairake ni ikawai ni konaa ni kakairi ni karaoi bwaai aika raoiroi.
E bwabetitoaki Orson n Tebetembwa 19, 1830—n ana koro n ririki ae 19. Teutana imwiin, Iotebwa Timiti e karekea te kaotioti ibukina are e taku bwa Orson bon natin te Atua, bwa e kakabwaiaaki ibukina e kakoaua, ao mwiokoana bon taetaekinakin te euangkerio (taraa D&C 34:3–6). N taekana, Orson e beku ni mition aika a mwaiti n ikotaki ana tai ma Lyman Johnson n 1832 ike a bwabetitoiia e kaan 100 mwaitiia aomata ao e katabuiia tabeman unimwaane.
Ngke Orson e weteaki bwa te Abotoro, akea ngaia i Kirtland. N Eberi 23, 1835, ni kawan Columbus ae bubura, e reiakinna bwa e rang kainnanoaki n te boowi i Kirtland n Eberi 26.
E aki ataa bukin te boowi, e waekoa ni karaoa mwanangana ni karoko ikekei. N aki ataia are e a tia ni weteaki bwa te Abotoro, e nakonako n rinnako ngke te bootaki n taromauri a “tataro, ao ni bubuti rokona.”9 Namakinan te boutoka mairouiia ake a Itiaki, Orson e kariaia weteana.
N aron te Abotoro, e katauraoa te bamburete are kanoana te moan boreeti n taekan ngkoa ana Moa ni Mii ni Burabeti Iotebwa Timiiti. N aron te bwaeoniia n 1847, e kawakin rekootin te mwananga nako mainiku. E korei naba mwaitin bamburete ibukiia mitinare ao e rang matoa ni kamanoan Ana Boki Moomon.
Te Bong aei E a Kaokoro … Ke E koaua?
Ni mwaitin kawai, kairake ni ikawai a kaokoro n te bong aei nakon are a mena inanon 1835. Ao e riai reirei aikai ni kona ni buokiia kairake ni ikawai n te bong aei inanon aia mwakuri korakora ni maiu ni waakirake nakon aia konabwai. Aio kabwaranakoana:
-
Ngkana ko na namakina te aki tau, bon waakirake naba.
-
Ni kabane aomata iai kakawenakoaia. Ko konaa n tokanikai iaona.
-
Ko na bon kukurei ngkana ko tiku ni matoatoa inanon te Ekaretia.
-
Teimatoa n anga am tai. Ongotaeka ao kakaonimaki. Kakabwaia a na roko.
-
Iai iroum bwaai aika kakawaki ae ko na anga. Te Uea e onimakiniko.