Parau fa’ahanahanara’a nō roto mai i te purera’a hunara’a ’o Elder Robert D. Hales

Hōho’a

funeral for Robert D. Hales

Elder M. Russell Ballard nō te Pupu nō te Tino ’Ahuru ma Piti ’āpōsetolo

« E mihi au i tō’u hoa here ’o Robert D. Hales. ’Ua hau i te 40 matahiti tō māua tāvini-’āmui-ra’a i roto i te mau ’ohipa ’e te mau tōmite rau ’ei huimana fa’atere rahi nō te ’Ēkālesia. I te mau matahiti e rave rahi i ma’iri a’e nei, ’ua pārahi māua te tahi i pīha’i iho i te tahi i roto i te Pupu nō te Tino ’Ahuru ma Piti. E mihi mātou i te vārua pe’epe’e ’o Elder Hales, ’e i te tahi taime, te mau mana’o ’ārearea. E mihi rahi ato’a tātou pā’āto’a i tāna parau a’o pa’ari ’e tōna mau mana’o hōhonu…

« I te ’āva’e ’ātete 1991, ’ua fāri’i ’o Bob i tōna ma’i māfatu mātāmua…

« Mai taua taime ra, ’ua tupu mai te mau fifi nō te ea te tahi i muri iho i te tahi. ’A pārahi ’āmui ai māua i roto i terā rahira’a matahiti, ’ua ’ite au i te itoito rahi ’e te hōro’ara’a hope ’o Robert D. Hales iāna. E rave rahi taime, ’ua fa’atoro vau i te rima, ’ua tāpe’a i tōna rima, ’e ’ua ’ite au i te mamae ’e te fifi tāna e fārerei ra…

« ’Ua riro tō’u hoa here ’ei ’aito i tā’u hi’ora’a, ’e ’ua ’ite au ē, ’ua marū ’oia i teienei ’e te hau i pīha’i iho i tōna nā metua here… te tahi atu mau melo o te ’utuāfare, ’e te mea fa’ahiahia roa atu i roto i tōna ho’ira’a nō te pārahi i pīha’i iho i tōna Metua i te Ao ra ’e tōna Fa’aora here, te Fatu ’o Iesu Mesia, tāna i hōro’a atu i te mau mea ato’a nāna ra, ’ei hō’ē ’o tāna mau ’āpōsetolo mā’itihia ».

Peresideni Russell M. Nelson, Peresideni nō te Pupu nō te Tino ’Ahuru ma Piti ’āpōsetolo

« ’Ua riro ’o Elder Hales ’ei melo faufa’a nō te Pupu nō te Tino ’Ahuru ma Piti ’āpōsetolo hau atu i te 23 matahiti. E ’ere i te parau fa’arahi te parau nō tāna mau hōro’ara’a i te ’Ēkālesia tā’āto’a ’e i te mau melo tāta’itahi ’o te pupu. ’Ua riro ’oia ’ei ta’ata rohirohi ’ore i roto i tāna tāvinira’a. I te 42ra’a ’e te ’āfa o te matahiti ’a riro ai ’oia ’ei huimana fa’atere rahi, ’ua pārahi ’oia fātata i roto i te mau ’āpo’ora’a ’e te mau tōmite ato’a i roto i te fa’aterera’a o te ’Ēkālesia. ’Ua fa’atupu tōna pa’ari, tāna hi’ora’a hōhonu ’e tāna fa’aurura’a i te hō’ē ’ohipa faufa’a rahi i ni’a i te terera’a o te bāsileia o te Atua nā te ao ato’a nei.

« … Tōna hina’aro rahi o te poihere-tāmau-ra’a ’e te ’atu’atura’a ia Mary, te tāvinira’a i tōna ’utuāfare tāo’a rahi ’e i te mau melo o te ’Ēkālesia, ’e te rirora’a ’ei pipi itoito nā te Fatu, o tāna i auraro mā te here rahi.

« ‘Ua riro te tu’utu’u ’ore ’o Bob i roto i te mau tītaura’a fifi o te ea ’ei ’ohipa tu’iro’o. ’Ua tauto’o tāmau māite ’oia noa atu te mau fifi rahi ’e te mau tītaura’a teimaha o tōna ea. Mātou tei hi’o iāna, ’ua uiui mātou ē, nāhea e ti’a ai iāna ?

« … Mā te itoito o te hō’ē pairati manureva tama’i, te tu’utu’u ’ore o te hō’ē ’aito mā’ōna, te ha’eha’a ’e te ha’apa’o o te hō’ē pipi nā te Fatu, ’ua fa’aoti ’o Elder Hales i te misiōni o tōna orara’a i roto i te hō’ē hi’ora’a maita’i rahi. ’Ua ’ūpo’oti’a ’oia i roto i te mau hi’opo’ara’a o te tāhuti nei, ’e ’ua ho’i i te fare mā te hanahana rahi ».

Peresideni Henry B. Eyring, tauturu hō’ē i roto i te Peresidenira’a Mātāmua

« ’Ua māta’ita’i au ia Elder Hales, ’ua rave i te ’ohipa i pīha’i iho iāna, ’e ’ua ha’api’i mai mai roto mai iāna. ’Ua fa’a’ite māua te tahi ’e te tahi i te mau ’itera’a tei fa’a’a’ano ’e tei ha’apūai ia māua ’e i te tahi mau ta’ata tei hi’opo’a ia māua. ’Ua ha’api’i tāmau noa vau mai roto mai iāna, ’e ’ua ’ite au iāna i te tupura’a i te rahi i roto i te mana pae vārua.

« Tē mana’o nei au ē, ’ua roa’a iāna hō’ē hōro’a pae vārua, i roto i te roara’a tau tō’u ’itera’a iāna. O te hōro’a ïa nō te rirora’a ’ei hoa ha’apa’o maita’i hope roa. E parau paha ’outou ē, e ’ere te reira i te pūai rahi roa. Terā rā, te Fatu iho tei fa’ahanahana i tāna mau ’āpōsetolo nā roto i te mau parau o te auhoara’a

« … Tē fa’a’ite māramarama nei te Fatu ē, e aha te mana e āpe’e i te hō’ē hoa mai teie te huru, tei fa’aru’e i te mau mea o te ao nei nō te tāvini i te Fatu :

« ’E o ’oia o te fāri’i mai ia ’outou nā, ’ei reira ato’a ia vau, nō te mea e haere au nā mua i tō ’outou mata. E vai ho’i au i tō ’outou pae ’atau ’e i tō ’outou pae ’aui, ’e ’ei roto ho’i tō’u Vārua i tō ’outou ’ā’au, ’e tā’u mau melahi ho’i e ’ati noa a’e ia ’outou nā, ’ia ha’amara’a mai ia ’outou i ni’a » (PH&PF 84:88)…

« I teie nei, tē ti’aturi nei au ē, te hua’ai ’o Elder Hales, ’e te feiā ato’a tei here iāna, e tai’o rātou i teie mau parau a te Fatu mai tā Robert D. Hales e fa’ata’a nei, hō’ē hoa ha’apa’o maita’i roa ’e hō’ē pipi

« … ’Ua ’ite mata roa vau i tōna ’ūpo’oti’ara’a i te mau hi’opo’ara’a o tōna ha’apa’o maita’i i te mau mea tāna i ’ite ē, ’ua hina’aro tōna hoa ’o te Atua ».