Kappukot Kraist ilo Kūrijm̧ōj

Jejjab lukkuun jeļā kōn rilale sip ro, ak men eo de eo rekar kōm̧m̧ane “pād ilo jikin wūjooj, im lale bwijjin sip ko aer ilo bon̄.”¹ Rilale sip ro rekar ļapļo̧k jān āinwōt kōj armej, rekar āinwōt elōn̄ armej ro rem̧m̧an rej diwōjļo̧k kajjojo raan im pukot aer mour.

Remaron̄ bōk jikin armej ro, ilo juon tōre, remaron̄ kar jab niknik kappukot Kraist, ak būruweer ekar oktak ke lan̄ ekar peļļo̧k im Kraist kar kwaļo̧k n̄an er.

Rein rej ro, ālkin aer ron̄ ainikien rilotok ro jān lan̄, rekar m̧ōkaj im etal n̄an Bethlehem kōņaan lo.²

Rikanpil ro rekar rimāletlet ro rekar ekkatak kōn itok eo an Messaia eo, Maan eo Nejin Anij. Jān ekkatak ko aer, rekar kalikkar aolep kōkaļļe ko rekar jitōn̄ļo̧k ļotak eo An. Ke rekar kalikkari, rekar em̧m̧akūt jān m̧ōko m̧weer im etal n̄an Jerusalem, kajjitōk, “Ewi eo me ekar ļotak Kiin̄ an Rijew ro?”³

Jeļāļo̧kjeņ eo aer kōn Kraist ekar jab pād wōt ilo aer jeļā. Ke rekar loe kōkkaļļe ko an ļotak eo An, rekar em̧m̧kūt. Rekar jino iaļ eo aer n̄an kappukot Kraist.

Rikanpil ro rekar pinej jenkwan armej ro rekar kappukot Kraist ilo aer ekkatak im katak māletlet. Aer kijejeto n̄an m̧ool eo ekar maron̄ tōlļo̧k er bwe ren maron̄ lo Kraist im kabun̄jar n̄an E āinwōt Kiin̄ an kiin̄ ro, Rilo̧mo̧o̧r eo an aolep armej.⁴

Simeon im Anna rekar pinej jenkwan ro rekar kappukot Kraist kōn Jetōb eo. Jetōb rein rekabwilōn̄lōn̄ rekar wūjlepļo̧k ilo kabun̄ im, jān jitlo̧k im jar im jān aer tōl mour ko an armej kōn wūjlepļo̧k im pokake, rekar kijoror in lo raan eo ej itok an Nejin Anij.

Kōn tiljek, ettā bōro, im tōmak, rekar kijenmej im kōttar itok eo an Rilo̧mo̧o̧r eo.

Ilo m̧ool, tiljek eo aer kar nōbar er āinwōt an Meri im Josep kar kwaļo̧k n̄an er nin̄nin̄ eo naaj juon raan bōk Ioon Make jerawiwi ko an aolep armej.⁵

Bwebwenato in em̧m̧an kōn wāween an ritōmak ro ilo Lal eo Ekāāl pukot kōkkaļļe ko an ļotak eo an Rilo̧mo̧o̧r eo loe ilo Bok in Mormon eo.

Kwōj keememej ro ekar wōr aer tōmak ilo Kraist kar kajirere im kakkure er. Armej ro robrak kōn men ko an laļ in im māletlet raan eo rekar kōnanaik ritōmak ro rekar wōnm̧aanļo̧k wōt im rie tōmak eo. Ilo m̧ool, armej ro rekar jab tōmak rekar kwaļo̧k ainikien aer kōnanaik er bwe rekar kōm̧m̧ane “juon iruj eļap” iaolepān āneo (3 Nipai 1:7). Rekar kajirere kōn ro rekar tōmak bwe Rilo̧mo̧o̧r eo enaaj ļotak.

Aer illu im kōjdat ekar ļapļo̧k bwe rekar jino aer jab bōjrak n̄an m̧an aolep ro rekar tōmak ilo Rilo̧mo̧o̧r eo. Bok in Mormon ej rekoote jekjek in m̧akūtkūt in.⁶

Ritōmak ro rekar jokwe ilo tōre in rekar maron̄ pinej jenkwan armej ro rekar kappukot Kraist mekarta armej ro jet rekar ettōn̄, kajirere, im kajjieon̄ kōm̧m̧an bwe ren illu. Rekar kappukot Kraist men̄e armej ro jet rekar kajjieon̄ bōd n̄an aer pinej jenkwan er āinwōt jet rejjab em̧m̧an, ro rejjab meļeļe, ak ro epidodo aer m̧oņe er.

Ak illu ippān ro jet ejjab kainepataik ritōmak ro rem̧ool jān aer kappukot Kraist.

Ilo aolepān iiō in, im bōlen eļaptata ilo season in Kūrijm̧ōj in, enaaj kōjeraam̧m̧an kōj bar juon alen n̄an kajjitōk kajjitōk in “Ewi wāween aō kappukot Kraist?”

Ilo juon iien epen ilo mour eo an, Kiin̄ Devid ekar jeje, “O Anij, Kwe aō Anij; inaaj pukot Eok m̧okta: jetōb eo aō ej maro kōn Eok, kanniōk iō ej kwele kōn eok.”⁷

Bōlen m̧wil rot in ilo kappukot Anij ekar juon iaan un ko Devid ekar kōmeļeļeik āinwōt juon em̧m̧aan ekar pukot būruwōn Anij.⁸

Ilo Kūrijm̧ōj season in im ilo aolepān iiō in, jemaron̄ ke kappukot kōn būruwōd im jetōb ko ad Rilo̧mo̧o̧r eo ad ejitōn bōro, Irooj in Aenōm̧m̧an, Eo Ekwojarjar an Israel. Bwe ikdeelel in, ilo juon jon̄ak eļap, ej kōmeļeļeik jab wōt armej ro āinwōt ro uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata ak eļapļo̧k wōn ro lukkuun kōj rej āinwōt rikaļoor ro an Kraist.