Mōņōņō in Ineek Eddo ko an Ro Jet

Tōmak Baam̧le Deoor

“Jej jepooļ jān ro rej aikuji kea, ad kōketak, ad rejtak, ad kaenōm̧m̧an, ad jouj,” Būreejtōn Thomas S. Monson ekar ba. “Jej pā ko pein Irooj ilo laļ in, kōn juon kallim̧ur n̄an jerbal im n̄an kotak ajri ro Nejin. E ej kōjatdikdik ioodwōj kajjojo.”¹

Būreejtōn Henry B. Eyring, Rikakpilōklōk eo Kein Kajuon ilo Būreejtōnji eo Kein Kajuon, ekar ba: “Juon oktak eļap ekar ijjino ilo būruwōm̧ ke kwaar itok n̄an Kabun̄ in. Kwar kōm̧m̧ane juon bujen, im kwar bōk juon kallim̧ur eo ej ukōt aolepān paotokim. …

“… Kom̧ ar kallim̧ur bwe kom̧ naaj jipan̄ Irooj kōmeraikļo̧k eddo ko [an ro jet] im kaenōm̧m̧an er. Kom̧ kar bōk kajoor eo n̄an jipan̄ Irooj kōmeraikļo̧k eddo ko ke kwaar bōk menin letok eo an Jetōb Kwojarjar.”²

“Jej kōnaan kōjerbal meram in gospel eo n̄an kalimjek ro jet āinwōt an Rilo̧mo̧o̧r eo kalimjek er—kōn tiriam̧o̧, kōjatdikdik, im iakwe em̧ool,” Jean B. Bingham, Būreejtōn eo an Doulul eo an Kōrā ro ekar ba. “Raan eo enaaj itok n̄e jenaaj lukkuun meļeļe kōn būruwōn ro jet im naaj m̧ōņōņō kōn tiriam̧o̧ eo aetok kitien n̄an kōj—ilo ad leļo̧k iakwe em̧ool ilo kōm̧m̧an im ilo naan n̄an ro jet ilo mour in. …

“Jibadbad im jerbal eo ad ej n̄an kōm̧m̧an em̧m̧an ippān aolep ilo ad kajjieon̄ in erom̧ āinwōt ad Rilo̧mo̧o̧r.”³

Ilo ad ineek eddo ko an ro jet im kōjparok bujen ko ad, jej kōppeļļo̧k iaļ eo bwe Jisōs Kraist en kōmour ro jet. Elder Jeffrey R. Holland jān Doulul eo an Jon̄oulruo Rijilōk ro ekar katakin: “Ļōmņak kōn wōņāān eo jejjab maron̄ keidi n̄an Dōbwāāl im Pinmuur eo, ij kallim̧uri kom̧ bwe Eban oktaklik ļo̧k jān kōj kiiō. Ke Ej ba n̄an ro erub būruweer, ‘Itok n̄an Eō,’ meļeļein bwe E ejeļā iaļen diwōj eo im E ejeļā iaļ eo lōn̄ ļo̧k. E ejeļā kōnke ekar etetal ie. E ejeļā iaļ eo kōnke E ej iaļ eo.”⁴