O Leo o Le Au Paia o Aso e Gata Ai
Kerisimasi e ala i Fofoga o Lou Afafine
Ata na tusia e Allen Garns
Na oo mai se mafanafana filemu i lou aiga ma au ao matou savavali atu i totonu o se pa e matamata i se faatinoga o le soifua mai o Iesu. Na tutu ni manu i totonu o pa, ma o se tamaloa ma se fafine, o loo laei e pei o Iosefa ma Maria, o loo tutu ma se pepe o loo aui i se ie o loo siiina e le fafine. Na filemu i latou ma na taulai atu i le tamaitiiti. Na matuai filemu lava le siosiomaga atoa.
O lau fanau matutua, lou toalua, ma au sa tutu ao saofai lou afafine laitiiti i luga o se taaiga vao mago i luma o i matou. Na le minoi o ia ma filemu, ma na tumau le taulai atu o ona mata i le pepe. Ina ua sauni le vaega o totoe o lo matou aiga e o, na ou tuu atu se lima i luga o le tauau o lou afafine ma musumusu atu ua oo i le taimi e o ai. Na ia fai mai e manao o ia e nonofo ma le pepe o Iesu. Na ootia lou loto i ana upu, ma ou filifili ai e nonofo ma ia.
I ni nai minute mulimuli ane, na ou uuina malie le lima o lou afafine ma tau atu ia te ia ua tatau ona matou o. Na ia fai mai na manao pea o ia e nofo. Na ou fusi maia o ia ma tootuli i ona tafatafa.
E lei leva lava ae ou lagonaina e pei ua ou malaga i tua i le taimi ma na i ai faatasi ma Maria ma Iosefa. Ona ou malamalama ai lea i le mafuaaga na manao ai lou afafine e nofo. Na ou faalogoina le Agaga ua faatumulia ai au. I lena nofoaga, na ou lagonaina sa ou i ai faatasi ma le Faaola. Na fepulafi mai ni loimata i totonu o ou mata ao ou lagonaina Lona alofa. Ina ua iu lava ina ua oo mai le taimi e o ai, na ou siiina i luga lou afafine laitiiti. Ao ou liliu atu agai i le ala i fafo, na ou faalogoina o ia ua fai atu i le pepe o Iesu tofa ma le tele o lona alofa mo Ia.
O lena afiafi na ou faasoaina ai se aafiaga faatasi ma lou afafine lena o le a ou teufatuina mo le taimi o totoe o lou olaga, ae na toeitiiti lava a ou misia. O lena po, na tuuina mai ai ia te au se meaalofa. Na ou lagonaina le latalata atili atu i le Atua ma lagonaina Lona alofa mo au. Ou te faafetai mo le Faaola ma le avanoa e manatua ai Lona soifua mai. Ou te iloaina o le soifuaga, faataitaiga, ma le Togiola a le Faaola o loo i ai se meaalofa ofoofogia o le alofa e-le-iu mai le Atua i Ana fanau uma lava. O le a ou teufatuina pea lenei meaalofa i le loloto o lou fatu.