O Loo I Ai Taleni i Monokolia!
E alala tusitala i Iuta, ISA, ma Ulaanbaatar, Monokolia.
E na o ni nai tagata lava o Monokolia e iloa e uiga i le Ekalesia, ae o lenei aufaipese na fesoasoani e suia lena mea.
Ata pue o le faaaloaloga o Odgerel Ochirjav; ata o le aofia mai Getty Images
Na ausia e se aufaipese mai Siteki a Ulaanbaatar Monokolia i Sasae ma Sisifo le tauvaga mo le tauvaga faaiu o le faaaliga i le televise a le atunuu o le O Loo I Ai Taleni i Monokolia. O le aufaipese—e i ai tamaiti aoga o le seminare ma le inisitituti, o le afa o i latou ua maea mai misiona—e lei mafaufauina lava o le a latou maua lenei ituaiga o avanoa e faasoa atu ai o latou talitonuga ma taleni.
Na asiasi atu se Fitugafulu Eria i Monokolia i le 2015 ma saunia se aoaoga e uiga i taumafaiga o le va i fafo o le Ekalesia. Na le mautinoa e Odgerel Ochirjav, le peresitene o le Siteki a Ulaanbaatar Monokolia i Sisifo pe faapefea ona faatinoina. Ona oo lea ia Ianuari o le 2016 ae valaau mai lona uso faaletulafono ma faapea mai, “Na ou matamata i le O Loo I Ai Taleni i Mongolia. … Sa ou maua se lagona malosi lava e faapea e tatau ona auai lau aufaipese o le Lotu.”
Na talanoaina e Peresitene Ochirjav le manatu faatasi ma le faatonu o le aufaipese, o Sister Unurjargal Purev. Na matuai fiafia lava o ia [le faatonu] ma tagata o le aufaipese e uiga i le avanoa. Na lauiloa le aufaipese o le Siona, po o “SION,” o se faapuupuu i le faaMonokolia mo le agaga, faatuatua, mafaufau, ma le lototasi.
O Le Taamilosaga Muamua
Mo le taamilosaga muamua o le tauvaga ia Mati 2016, na usuina ai e le SION se tuufaatasiga o pese e lua. Na fai mai se tasi faamasino, “Ou te vaai atu i o outou foliga ua susulu! … Tatou te manaomia le tuu o la outou vitio i luga o le YouTube e faailoa atu ai lenei faaaliga i le lalolagi.”
O se isi faamasino na fesili atu po o le a le latou mea o le a fai pe afai latou te manumalo i le faailoga maoae o le I.S. $50,000. Na ootia o ia ina ua latou fai mai latou te mananao e foai uma atu, o se meaalofa faapitoa o le Kerisimasi, i se nofoaga mo tamaiti e leai ni aiga.
O Le Taamilosaga Lona Lua
Mai le 400 na auai, o SION na i totonu o le 200 na oo atu i luga i le taamilosaga lona lua, ae o la latou pese na faatulagaina mai mo le aso lava lea e tasi o le konafesi tuufaatasi a le autalavou, lea e aafia ai le afa o tamaiti o le aufaipese e toa 35. Na filifili le aufaipese e o i le taamilosaga lona lua, o lea na latou totogia ai se pasi ma, ina ua uma la latou pese, na malaga atu mo le valu itula i le konafesi a le autalavou.
Mai le 200 aufaipese, o SION na i totonu o le 32 na o atu i luga i le toe tauvaga mo le sailiga o le 2 mo le tauvaga faaiu. Na amata lauiloa le aufaipese i luga o agafesootai e faatatau i le O Loo I Ai Taleni i Monokolia.
O Tauvaga mo le Tauvaga Faaiu
Na latou faataitai mai ia Iuni ia Setema e saunia ai mo le tauvaga mo le tauvaga faaiu. I le aso o le tauvaga, na latou feala i le 4:00 i le taeao i le -29 tikeri F (-34 tikeri C) o le tau. Na fai mai Sister Nomuungerel Enkhtuvshin, o se tasi o le aufaipese, “O le toatele o le matou vaega na maua i le fulu. Ae na latou faasolo ina manuia ao matou tatalo mo i latou.”
Na maimoa mai tagata i Monokolia atoa i le faaaliga ma tesi mai a latou palota.
Na faapea mai Brother Shijir Purevdorj, “O se taunuuga o lenei faaaliga i le Televise, e toatele tagata ua atiina ae se uiga lelei agai i le Ekalesia.”
O Faamanuiaga
Na maua foi e tagata o le aufaipese ni faamanuiaga. Na saunoa mai Brother Odgerel Tumursukh, “Na matou tuuto atu la matou gauai ma le taimi mo se tausaga atoa ao faia foi a matou galuega ma isi vaega o o matou olaga. E ui lava na faigata, ua matou mauaina le tele o faamanuiaga. Ua ou aoaoina le puleaina o lou taimi ma faia osigataulaga mo le Alii.”
I le faaopoopo atu i le faateleina o lo latou faatuatua, na maua e tagata o le aufaipese le loto-talitonu, atiina ae faigauo, ma aoaoina le lotogatasi. “O le pepese i le aufaipese na fesoasoani ia i matou e aoao ai pe faapefea ona faamagalo atu ma lagolagoina le tasi ma le isi,” na saunoa ai Brother Ganbaatar Ulziiduuren. “Ua sili atu ai lo matou lotogatasi.” Na aoaoina e Sister Bilguunzaya Tungalagtuul, “e faapea e le tatau lava ona ou masalosalo ia te au lava ia pe manatu faapea ou te le mafai ona faia se mea.”
Na saunoa Brother Bayartsogt Lhagvajav, “O le pepese i le aufaipese ua aumaia le tele o faamanuiaga i lou aiga, ma ua fesoasoani foi ia te au ia maua ai tali na ou sailia mo sina taimi. Na ofo mai e o matou taitai ni tali. … Ua faamaonia ai lau molimau e faapea o o tatou taitai ua valaauina e le Atua.”
“Ina ua ou auai i le O Loo I Ai Taleni i Monokolia,” na faamatala ai e Sister Onon Dalaikhuu, “Na ou aoao ai o le faamalosiau ma le lagolago a le tasi ma le isi [o le] ki lea i lo [matou] manuia.” O tiutetauave a Sister Dalaikhuu e aofia ai le faatulagaga o le aufaipese, lea na fesoasoani e faamalosia ona tomai faaletaitai. Na ia faaopoopo mai, “Na matou lagonaina [o le] Alii na taitaia ma uunaia i matou. O le toatele o i matou na mamai, pisi, le lavava, ma lagonaina le lofituina. Ae ui i lea, pe a matou tatalo faatasi, e i ai se ala matou te maua ai le mana sili atu ma le manao ia tumau.”
E ui e lei lava palota na mauaina e le aufaipese e see atu ai i le faaiuga, o a latou faatinoga na tuuina atu ai i le Ekalesia le faalauiloa sili i Monokolia atoa. Ua faamatala mai e Peresitene Ochirjav, “Na matou usiusitai i se tofiga mai o matou taitai perisitua, ma na saunia e le Alii le ala. … Ua talanoa nei le aai atoa [Ulaanbaatar] e uiga i le auai o le aufaipese Mamona i le O Loo I Ai Taleni i Monokolia.”