Kakabwaia aika a Taekinaki n te Berita man Kawaran te Tembora
E maeka te tia korokaraki i Utah, USA.
I a kaman tangiria n nanakon te tembora n taai nako—ma e karako au atatai ni mwaitin kakabwaia ake e uoti nakon au utu.
Tabeua te ririki n nako, Beretitenti Oldroyd, kain te titeiki beretitentii, e kawara ara uoote ao e taekina te bwai teuana ae I aki kona ni mwaninga: “I berita nakoimi bwa ngkana kam nakon te tembora, ni kabane mwakoron maiumi e na kakabwaiaki.”
Ngke I tabe n iangoia, I aki kona n iangoia bwa e na kanga te nanako n te tembora ni kona n riingi mwakoron nako maiu. Ma imwiin te taromauri, I baireia bwa N na butimwaea te kakaewenako aei ao n nakon te tembora ni mwaitin au tai. I tangiria ni kataa ana berita. Kainnabau e a kaman tatangira nakona nakon te tembora, ma I rawa ibukina bwa a uarereke natira. Tina buti inanon teuana ma te iterana te aoa nakon te tembora i San Antonio, Texas, USA, ni kabanea te tietion n te entaumente, ao imwiina ti buti n okira mweengara. E aki nakoraoi are tina butiia temanna bwa e na taraia natira ibukin itiua ke waniua te aoa.
Moanakin te Kakabwaia?
N te moan tai ti kataia ni kaibibiti taraakia natira ma te utu teuana, ma temanna e karina n aoraki ke e na kaoti naba te bwai teuana. Tia baireia bwa ti riai ni katea ara bong ibukin te ririki teuana ao n nako! Imwiina ngkanne e a reke ara iango n ana kawai “pizza ao te takakaro”. Ti kaai ni buti n airi nakon te tembora. Kaaro te taangana temanna e nako n ira te tetere n te tembora ao are temanna e kairiia ataei ni kaboo biitia. Imwiina ti kaibibiti: te kauoman ni karo e nako ni karaoa te mwakuri n tembora ao temanna e kairiia ataei ni mataku rirarikin te tembora. Aio e rang nakoraoi. Natira a ataia bwa e rang kakaawaki te tembora iroura—a atai bwaai ni kabane ake tabeua are ti kona ni karaoi n te Kaonobong—ao e reke ara tai n ikotaki ma ara utu.
E karako au atatai ni mwaitin kakabwaia ake e uoti nakon au utu. Imwiin nanakora n te maan ae raka iaon teuana te ririki, I tekateka n te tetere ngke I noora te mwaane ae boo. I iangoia bwa e tamaroa ngkai e roko ikekei. Iaon kawaira n otinako man te tembora, I noora te mwaane arei n tekateka n uakaan ma te tabo are e tei iai taian kaa, ngaia are ngai ma kainnabau ti iangoia ni kamauria.
E bubutiia kainnabau te mwaane arei, Chad, ao ngai ngkana ti kona ni buokia ni karekea ana tareboon. Ti kukurei ni buokia, ao te mwaane arei e tuanga Chad nnen ana tareboon. Chad e orea ana nambwa ibukina ao imwiina e anganna ana tareboon. E aki kona n anaia teuarei, ma e moangare ma te nimamannei. Chad e tara bain te mwaane arei, are e kabaeaki nakon ana wiutieea, ao e waekoa n ataia bwa e na taua ana tareboon nakon taningana. Bwatin te kaawa are e onimakinaki bwa e na ana teuaei e rang n rimwii. Ti tiku irarikin teuaei ni maroro ni karokoa e roko ana bwati. E rang anaaki nanora bwa, e ngae ngke iai ana kaangaanga, e roko naba n te tembora. E rang tamaroa anuana. E uota te moangarena nakoira. Imwain nakona, e anganiira ana nambwa ao ti anganna ara nambwa ao tia ata arana ae Max Para.
Ngkana e kona te Tari Para n roko n te tembora, ti kona naba ngaira n roko n te tembora—akea bukina ae tina aki kona!
Ana Banna ni Katooto te Tari Para
Ti baireia bwa tina kawaria te namwakaina are imwiina bwa mwakoron kawaran te tembora. Ti tareboon imwain rokora, ao e taku bwa ti kona n rin n ana auti ngkana ti roko. Ti buti n te kaawa ae San Antonio ao ti kunea mweengan te Tari Para ae kakateke. E wene iaon ana kainiwene n rabunaki n te rabuna ae mainaina nakon bwangena. E tabeka atuna nakon te iterana ao e taetae ma ngaira, moangarena e bon rang kukurei. E tuangiira arona ni kukurei imwiin bwakana mai taubukin te auti ngke tenibwi tabun ana ririki. E tibwa ana kaangaanga ao ana koaua.
Teuana te tai ni kawara te Tari Para e riki bwa te ririki ni kakawarakina. E a riki bwa mwakoron maiura ae onoti. Ti aki ata te bwai ae tina karaoia ibukina—ana kaangaanga a bon rang korakora. Te bwai ae ti ataia bwa ti kona n riki bwa raraona. Ti kona n uoti nakoina bwaintangira aika uarereke: tamnein te Tia Kamaiu, te CD ae ana Boki Moomon n te taetae n Spanish, tamnein te tembora, te baeki ae on n te aoranti. Ti kona ni kawaria, ti anenei kunan te Buraimwarii, ao ti ongora irouna. Ai tamaroara te namakin aei iroura—ko aki kona n anga te mwakorona te kariki ao e reke teaina te kariki boon mwiina.1
E reireiniira te kakaitau, are e bitii ni kabane mwakoron maiura. Ti reiakina karekea te kakaitau ibukin ataakin te euangkerio, ibukin ara reitaki ma te Atua; ibukin ataakin te baire ni kamaiu; ibukin mweengara, ara kaa, kanara, ao kunnikaira; ara konabwai ni kabonganai rabwatara, ibukin ara tai ni kona ni karaoa ae raoiroi ibukin ara komiuniti; ao ibukiia aomata aika tamaroa aika katobibiira. Te Tari Para e bita ara kabwarabwara iaon taeka aika matoatoa ao kaangaanga. Iai bukina bwa tina kukurei ni kakabwaiakira aika a mwaiti ao ni kabonganai kakabwaia akanne n tabekia rake tabeman.
Reiakinna ni Beku
N te tai are e mena iai Chad n te tembora ma temanna raraora, Tari Gonzales, e manga noora naba te Tari Para n te tembora n tataninga te bwati bwa e na anaia. Tari Para e tataninga n te tai ae maan. Chad ao te Tari Gonzales a baireia bwa a na nikira te Tari Para ni mweengana. Tari Gonzales iai ana turaki ae bubura ae roro. N te tai anne, tewaana te kaa ae a toka iai ibonga aika a mwaiti man ara titeiki a roko, ao a buoka te wiutieea ni katoka ibukin te turaki. Imwiina a uota te Tari Para nako aon te turaki, kabaea n ana kaintekateka ao n taua bwa e na aki bwaka. I taku bwa e rang nakoraoi te bong anne iroun te Tari Para—arona are e kona n toka n te kaa ae mamataiakinna man te tembora nakon mweengana!
Kakabwaiaaki n Aaro Nako
Ni kabanean rokora n te Tembora i San Antonio imwain ae ti mwaing, ti kawara te Tari Para. N te tai ae onoti aei ni kabanean rokora, te Tari Para e butimwaia ni kabane ara utu bwa tina katairiki irouna.
I rang kakaitau bwa I kona ni kataa ana berita Beretitenti Oldroyd. Au utu a na bon aki kona ni kaitibo ma te Tari Para ngke arona bwa ti aki roko n te tembora. I a riki bwa te aomata ae bitaki—I a riki n aron are e tangiria te Uea bwa e na reke irou. Ngkai ti karimoa te Uea ao ni kaea te tembora, maiura a kakabwaiaki n aro nako aika kakaokoro.