Bwanaaia Aika Itiaki ni Bong Aika Kaitira
Tararuaakin Natiu ae Uarereke ae Aoraki ao Nakoau
Ngke I weteaki bwa N na beku bwa te kauntira n te bootaki n Ataeinaine, I butimwaea te nakoa, ma I tabeaianga bwa e kanga aron karaoana. I namakinna ae I aki tauraoi, ao I korakai n te kataaki.
Teniua te namwakaina imwiina imwaain reken te wewete aei, n rimwiaki ma au kangaanga n aron bikoukou, natiu ae uarereke ae te mwaane, e a bungiaki. E rangin kainnanoa tararuakina ibukin bwainaorakiana. Tabeua te wiiki imwiin bungiakina, iai te bwai ae uraura ae riki iaon reben matana ao e a moanna ni bubura. E kamataata ara taokita ibukiia ataei bwa bon te kaentia ae aki kamamate ao e na bon mauna imwiin koron teuana ana ririki Nicolas. Ma e waekoa n rikirake te kaentia aei. E a katabetabea reben matana ao n tokina e na bae ni karika te uruaki nakon ana taratara ngkana e aki bwainaorakiaki.
Ti karaoa te babaire ae kaangaanga ni waakina aron bwainaorakiana. Rabwatan Nicolas e rootaki n aki booraoi ma ana bwainaoraki. E biiua ni katoa bong, e teimatoa ni kai ewekaki n te aoraki, ao e keerikaki rawatana. E karika tangina ae bati te waaki aei. E a moanna ni kaangaanga kakoroan nanon nakoau iaan kaangaanga aikai. I aki ataia bwa N na kanga ni karaoia.
N te kakaitau ae bati, e boutokaai kainnabau. Ngaira n ikotaki, ti namakinna bwa I riai n reitia nako. Te beretitenti n te Bootaki n Ataeinnaine e boutokaai naba. Te aine ae kakaonimaki ao n tataonaki n nano. E buokai n noori anua aika I aki atai aika iai irou ao ni buokai ni kakaei aanga ake N na kona ni beku iai ae akea iangoana irou.
N raoniia ataeinnaine ni katoa wiiki e buokai ni katurua au iango iaon te tai n iiti, n tutuo, ao taokita. E tuukai man te kabanetai n namakina te kakarautaeka i bon ibukiu ke n titiraki bukin tera e riki aei nakon natiu ae kanga ai aron te anera. Nakoau bon te kakabwaia, ao imwaain ae I ataia, e rikirake Nicolas ao e a toki ana bwainaoraki. E moanna n riki Nicolas bwa te ataeinimwaane ae kukurei man marurung ao ni bati korakorana.
Te beku ibukiia natin te Atua aine aika a ninikoria akanne e buokai n tokanikai iaon namakin n aki tau, ni karikirakea te reitaki n iraorao, ni kunei au taarena, ao ni karikirakeai n tabeu ngkai te tina ao te buu aine.
Te Uea e aki anai taian kaangaanga mairoura n taainako, ma I ataia ma nanou ni kabane bwa E tatauraoi n taainako ni buokiira ni karekea te korakora n tokanikai iaoia.