Magpakig-angot sa Iya sa Tanan nga Tion, Bisan sa Diin, Sa Ano man nga Paagi

Ang mag-“alagad” amo ang maghatag sang serbisyo, pag-atipan, ukon bulig nga nagapadugang sa kasulhay ukon kalipay sa isa ka tawo. Ang visiting teaching nahanungod sa pagdiskubre sang mga pamaagi sa pag-alagad sa ila nga aton ginabisita. Si Jesucristo nag-alagad sa tanan—sa bisan ano nga tion kag sa bisan diin. Ginpakaon Niya ang 5,000 ka tawo, ginpaumpawan sanday Maria kag Marta sa pagkamatay sang ila utod nga lalaki, kag nagtudlo sang Iya ebanghelyo sa babayi sa bubon. Ginhimo Niya yadto bangud sang Iya sinsero nga pagpalangga.

Sa pagsunod sa Iya ehemplo, bilang mga visiting teacher sarang naton makilala kag palanggaon ang kada sister nga aton ginabisitahan, nga ginapanumdum nga ang pagpalangga amo ang pundasyon sang tanan naton nga ginahimo. Kon mangamuyo kita para sa inspirasyon agud mahibal-an kon paano sia alagaran kag buligan nga magbakod ang iya pagtuo, “ang mga anghel indi mapunggan nga mangin [aton} kaupod.”¹

Sugod sang pag-organisar sang Relief Society sang 1842 tubtob sa karon, ang pagpangalagad sang mga kababayin-an nagapakamaayo sa mga kabuhi. Halimbawa, Si Joan Johnson, isa ka 82-anyos nga balo, kag ang iya kapares sa visiting teaching nagatudlo sang ila kaingod nga 89-anyos kag may pulmonya. Nakita nila nga ang ila kaingod wala lamang nagakinahanglan sa ila isa ka bes sa kada bulan, gani nagsugod sila sa pag-usisa sa iya kada semana sa personal ukon sa pagtawag sa telepono.

Para sa iban nga mga visiting teacher, ang pagpadala sing mensahe paagi sa text ukon email nga nagahatag sang pagpaisog ayhan amo ang pinakamaayo nga himuon para sa isa ka sister sa sina nga bulan. Ang paghimo sang personal nga koneksyon kag pagpamati nga may pagpalangga amo ang kahulugan sang visiting teaching. Ang moderno nga teknolohiya kag ang napamatud-an na nga pagbisita sa personal nagabulig sa aton nga himuon ini sa bisan ano nga oras, sa bisan diin, kag sa madamo nga mga paagi.² Amo ina ang pagpangalagad subong sa ginhimo ni Jesus.