Magpamat-od sa Paghinulsol

Si Pangulong Monson nagpaathag nga “ang aton responsibilidad amo ang magbangon gikan sa pagka-ordinaryo pakadto sa ikasarang, gikan sa kapaslawan pakadto sa kadalag-an. Ang aton obligasyon amo ang mangin pinakamanami naton nga kaugalingon.” Madamo sang mga tawo nga ginadedikar ang bulan sang Enero sa paghimo sang mga lalab-uton kag mga pagpamat-od nga mangin mas maayo: sa pagyuhum sing mas masami, pagkaon sing mas makapaayo sa lawas, ukon pagtuon sang isa ka bag-o nga kabatid. Samtang ining mga lalab-uton sarang makabulig sa inyo para mangin mas maayo, ang pinakamaayo nga paagi sa pagbag-o amo ang paghinulsol.

Bisan nga ang paghinulsol mabudlay, isa ini ka dulot! Samtang nagasandig kita kay Jesucristo paagi sa paghinulsol sang aton mga sala, mahimo kita nga magtubo kag mag-uswag. Si Pangulong Monson nagsiling, “Importante gid sa plano [sang kaluwasan] amo ang aton Manluluwas, nga si Jesucristo. Kon wala ang Iya nagapasag-uli nga sakripisyo, ang tanan madula.” Paagi sa paghinulsol, sarang kamo matinloan sang inyo mga sala kag mag-uswag agud mangin mas kaangay Niya.

Magpamensar sang isa ka butang nga ayhan nagapugong sa inyo nga mangin kaangay sa Manluluwas. Ini ayhan ang inyo panghambal? Paano ninyo ginakabig ang inyo mga kaabyanan kag pamilya? Pagkatapos nga inyo mapamensar kon ano ang inyo mahimo nga maayuhon pa gid, magpangamuyo sa Amay nga Langitnon kag ipabutyag ang inyo handum sa pagbag-o. Panumduma nga paagi sa gahum sang Iya Pagpasag-uli [Atonement], si Jesucristo sarang magbulig sa inyo nga malampuwasan ang inyo kahuyang. Sa gintudlo ni Pangulong Monson, “Ang dulot sang paghinulsol, nga gintigana sang aton Manluluwas, magatugot sa aton nga tadlungon ang direksyon sang aton kabuhi.”