Toru ’ohipa nō te ha’amana’o

E ’itehia te ta’o ha’amana’o e rave rahi taime i roto i te Buka a Moromona. ’Ua fa’aitoito Nephi i tōna mau taea’e ’ia ha’amana’o, nāhea te Atua i te fa’aorara’a i tō rātou mau hui tupuna. ’Ua ani te ari’i Beniamina i tōna nūna’a ’ia ha’amana’o i te rahi o te Atua. ’E ’ua ha’api’i o Moroni i tāna feiā tai’o ’ia ha’amana’o e mea aroha te Fatu.

E mea faufa’a te ha’amana’ora’a i te Fa’aora—’ua fafau ato’a tātou ’ia ha’amana’o Iāna i te mau taime ato’a ’a rave ai tātou i te ’ōro’a mo’a. ’Ua ani mai te peresideni Eyring ia tātou ’ia ha’amana’o teie nā ’ohipa e toru i roto i te ’ōro’a mo’a.

1. Ha’amana’o ia Iesu Mesia. Tai’o i te mau pāpa’ira’a mo’a nō ni’a nāhea te Fa’aora i te tāvinira’a ’e i te fa’a’itera’a i te here ia vetahi ’ē. Nāhea tō ’outou ’itera’a i Tōna here ? Nāhea ’outou ’ia tāvini ’e ’ia fa’a’ite i te here ’ia vetahi ’ē mai tā te Fa’aora i rave ?

2. Ha’amana’o i te mea tā ’outou e rave maita’i atu : ’A feruri i tō ’outou hepetoma i ma’iri ma te ’ā’au tātarahapa. ’A mā’iti i te hō’ē ’ohipa o tā ’outou e nehenehe e taui ’e ’a pāpa’i nāhea ’outou ’ia fa’atupu i te reira ha’amaita’ira’a. ’A tu’u i tā ’outou ’ōpuara’a i te hō’ē vāhi ’ia ’ite pinepine ’outou i te reira.

3. Ha’amana’o i te nu’ura’a i mua tā ’outou i rave : ’A ani i te Atua ’ia tauturu mai ’ia ’outou ’ia ’ite i te mau nu’ura’a i mua tā ’outou i rave. ’A pāpa’i e aha tā ’outou i fāri’i ?

’Aita tātou i maita’i roa, ’ua ’ite rā te Fa’aora i te reira. Nō reira ’Oia i ani ai ’ia tātou ’ia ha’amana’o Iāna. E hōro’a mai te ha’amana’ora’a Iāna ’ia tātou te tia’ira’a ’e e tauturu ’ia tātou ’ia ha’amaita’i atu ā. Noa atu i te tahi taime ’aita tātou e ha’amana’o Iāna, ’ua parau te peresideni Eyring, « e ha’amana’o ā ’Oia ia ’outou ».