Parau poro’i a te Peresidenira’a Mātāmua, fepuare 2018
’Ia ha’amana‘o ā Iāna
Nā te peresideni Henry B. Eyring
Tauturu mātāmua i roto i te Peresidenira’a Mātāmua
E nehenehe ānei ’outou e feruri nā muri iā’u i te peropheta Moroni e tāpa’o ra i te mau parau hope’a o te Buka a Moromona i ni’a i te mau ’api auro. ’O ’oia ana’e. ’Ua ’ite ’oia i tōna nūna’a, tōna ’ōpu ’e tōna ’utuāfare i te topara’a. « Te tama’i noa ra » te fenua (Moromona 8:8) Teie rā, tē vai ra tōna ti’aturira’a, nō te mea ’ua ’ite ’oia i tō tātou ’anotau ! ’E nō te mau mea ato’a tāna i pāpa’i, ’ua ani ’oia ia tātou ’ia ha’amana’o (hi’o Moroni 10:3).
Mea au roa nā te peresideni Spencer W. Kimball (1895–1985) i te ha’api’ira’a ē te ta’o faufa’a roa i roto i te dītionare ’oia ho’i, ’a ha’amana’o. Nō te mea ’ua fafau tātou ’e te Atua, ’ua parau ’oia, « tō tātou hia’ai rahi o te ha’amana’ora’a i te reira.1
E nehenehe tātou e ’ite i te ta’o ha’amana’o i roto i te mau pāpa’ira’a mo’a. I tō Nephi a’ora’a i tōna nā taea’e, pinepine ’oia i te ani ia rāua ’ia ha’amana’o i te mau parau a te Fatu ’e ’ia ha’amana’o nāhea tō te Atua fa’aorara’a i tō rātou mau hui tupuna (hi’o 1 Nephi 15:11, 25; 17:40).
I roto i tāna a’ora’a hope’a, ’ua fa’a’ohipa te ari’i Beniamina i te ta’o a ha’amana’o e hitu taime. ’Ua ti’aturi ’oia ē e ha’amana’o tōna nūna’a « i te rahi o te Atua… ’e tōna ra hāmani maita’i ’e te fa’a’oroma’i-roa-ra’a » ia rātou (Mosia 4:11; hi’o ato’a 2:41; 4:28, 30; 5:11–12).
I tō te Fa’aora ha’amaura’a i te ’ōro’a mo’a, ’ua ani ’Oia i Tāna mau pipi ’ia rave i te mau tāpa’o « ’ei mana’ora’a » i Tāna fa’atusiara’a (Luka 22:19). I roto i te mau pure ’ōro’a ato’a e fa’aro’o ’outou ’e o vau, te ta’o ā i muri noa te ta’o ha’amana’o (hi’o PH&PF 20:77, 79).
Tā’u poro’i o te hō’ē ïa anira’a, ’oia ato’a hō’ē tāparura’a, ’ia ha’amana’o. Teie e toru tītaura’a nō ni’a i te mea tā ’outou e nehenehe e ha’amana’o i te hepetoma ato’a ’a rave ai ’outou i te mau tāpa’o mo’a o te ’ōro’a. Tē ti’aturi nei au ē e tauturu te reira ia ’outou, mai tā te reira i nā reira nō’u.
Ha’amana‘o ia Iesu Mesia.
A tahi, ha’amana‘o i te Fa’aora. ’A ha’amana’o, ’ua haere mai ’oia i te fenua nei, nāhea Tōna ’āparaura’a ’ia vetahi ’ē, ’e nāhea Tōna fa’a’itera’a i te hāmani maita’i i roto i Tāna mau ’ohipa. ’A ha’amana’o ’ia vai ’Oia i te pārahira’a ’e e aha Tāna i ha’api’i. ’Ua « hāmani maita’i haere » te Fa’aora (Te ’Ohipa 10:38). ’Ua farerei ’Oia i tei ma‘ihia. ’Ua fafau ’Oia e rave i te hinaʼaro ʼa Tōna ra Metua.
Hau atu, e ha’amana’o tātou i te ho’o rahi Tāna i aufau, i Tōna here nō tātou, te ’īritira’a i te tafetafeta o tā tātou mau hara. ’A ha’amana’o ai tātou Iāna, e rahi atu ā tō tātou hina’aro i te pe’e Iāna. E hina’aro tātou ’ia maita’i ri’i, ’ia aroha rahi atu, ’e ’ia ineine hau atu nō te ’imi i te hina’aro o te Atua ’e ’ia rave i te reira.
’A ha’amana’o i te mea tā ’outou e ti’a ’ia rave maita’i
E mea fifi ’ia feruri i te Fa’aora—Tōna mā ’e Tōna maita’i roa—ma te ’ore e feruri ato’a ē nāhea te paruparu ’e te parau ti’a ’ore e fa’aau ia tātou. ’Ua fafau tātou ’ia ha’apa’o i Tāna mau fa’auera’a, terā rā pinepine tātou i te hi’a i te reira fāito teitei. ’Ua ’ite rā te Fa’aora e tupu te reira, nō reira ’Oia i hōro’a mai ai ia tātou te ’ōro’a mo’a.
E mau a’a tō te ’ōro’a mo’a i roto i te Faufa’a Tahito nō te rave i te pūpūra’a i te mau tusia, tei roto te fā’ira’a i te hara (hi’o Levitiko 5:5). ’Aita tātou e fa’atusia fa’ahou i te mau animala, e nehenehe noa rā tātou e fa’aru’e i tā tātou mau hara. Tē pi’i nei te mau pāpa’ira’a mo’a i teie fa’atusiara’a o « te ’ā’au tae ’e te vārua mārū ra » (3 Nephi 9:20). ’A haere mai i te ’ōro’a mo’a ma te ’ā’au tātarahapa (hi’o PH&PF 59:12; Moroni 6:2). ’A nā reira ai ’outou, e fāri’i ’outou i te fa’aorera’a hara ’e e’ita ’outou e ātea ’ē i te ’ē’a e arata’i atu i te Atua ra.
’A ha’amana’o i te nu’ura’a tā ’outou i rave
’A hi’opo’a ai ’outou i tō ’outou orara’a i te roara’a o te terera’a o te ’ōro’a mo’a, te ti’aturi nei au ē, ’ua rōtahihia tō ’outou mau mana’o ’eiaha noa i ni’a i te mau mea hape tā ’outou i rave, i ni’a ato’a rā i te mau mea maita’i tā ’outou i rave—te mau taime ’a ’ite ai ’outou ē ’ua poupou te Metua i te Ao ra ’e te Fa’aora ’ia ’outou. E nehenehe ato’a ’outou e rave i te hō’ē taime i roto i te ’ōro’a mo’a ’ia ani i te Atua ’ia tauturu ia ’outou ’ia ’ite i te reira mau mea. Mai te mea e nā reira ’outou, tē fafau atu nei au ia ’outou e tupu mai te hō’ē ’ohipa. E ’ite ’outou i te tia’i-maita’i-ra’a.
I tō’u nā-reira-ra’a, ’ua ha’apāpū mai te Vārua ē, noa atu e mea ātea roa vau i te maita’i-roa-ra’a, e mea maita’i a’e au i teie mahana i nanahi ra. E hōro’a mai te reira ’iā’u i te ti’aturira’a ē, nō te Fa’aora, e nehenehe au e maita’i roa atu ananahi.
E taime roa mau ihoa, ’e tītau te reira i te tauto’ora’a fa’atumuhia. ’Ua ’ite ’outou nā roto mai i te ’itera’a rau, e mea fifi i te feruri pāpū tāmau noa i te hō’ē ’ohipa. Noa atu rā te huru e nāhea ’outou i te ha’apa’ora’a i tā ’outou mau fafaura’a ’ia ha’amana’o ā Iāna, e ha’amana’o ā ’Oia ia ’outou.
’Ua ’ite te Fa’aora i tā ’outou mau tītaura’a. ’Ua ’ite ’Oia e aha te huru ’ia fa’atinahia ’outou i ni’a i te mau fifi o te orara’a. ’Ua ’ite ’Oia e aha te rūra’a o te mau ha’amaita’ira’a tā ’outou e hina’aro o te tae mai nā roto i te ha’amana’ora’a ā Iāna ’e te ha’apa’o-maita’i-ra’a Iāna—« ’ia vai noa tōna Vārua i roto ia [’outou] » (PH&PF 20:77; reta tei fa’ahuru-’ē-hia).
Nō reira, e fāri’i mai ’Oia ia ’outou i te ’amura’a mā’a o te ’ōro’a mo’a i te hepetoma ato’a, ma te pūpū fa’ahou ā ia ’outou te fāna’o ’ia fa’a’ite pāpū i mua Iāna ē e ha’amana’o ā ’outou ’Iāna.
© 2018 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō te First Presidency Message, February 2018. Tahitian.15046 895