Elder Juan Pablo Villar

Nona veikilai kei na Lotu o Elder Juan Pablo Villar a yaco mai Santiago, e Chile, ena nona tukuna ki na nodratou matavuvale na tuakana qase duadua o Ivan, ni sa papitaiso ni rau se bera ni vakadonuya nona itubutubu qai tukuna e muri ni sa nakinaki tiko me la‘ki kaulotu. Ni tarogi se cava na vuna, a wasea o Ivan nona ivakadinadina kei na gagadre me veiqaravi.

“Au sega ni kila na ibalebale ni veika kece oya,” e nanuma lesu o Elder Villar, se qai yabaki 17 ena gauna oya. “Ia ena gauna oya a biuta o koya e dua na sorenikau ki utoqu.”

A soli na galala ki na sorenikau oya me tubu ena gauna e solia kina na yacana o tuakana vei rau na daukaulotu. Ena imatai ni nona lesoni, a rawata nona ivakadinadina o Elder Villar ena dina ni iVola i Momani.

“Vei au, a sega ni yaga meu tekiduru ka masu, baleta ni gauna erau wasea kina nodrau ivakadinadina, au sa kila e yaloqu ni dina,” e kaya o koya. “Niu sa kila oya, sa na dina talega na veika kece tale.”

A soli na veivakadonui vei Ivan, a veiqaravi tiko ena dua na tabana ni kaulotu voleka me papitaisotaki Elder Villar ena 1988. E muri, rau a curu talega ena Lotu na tinadrau kei na tacidrau tale kadua, o Claudio.

Ni oti e dua na yabaki mai na nona papitaiso, sa tekivu veiqaravi o Elder Villar ena Tabana ni Kaulotu na Chile Viña del Mar, sa tekivu kina e dua na bula ni veiqaravi ka oka kina mai na gauna oya na peresitedi ni iteki, bisopi, daunivakasala ena matabisopi, daunivakasala ena Tabana ni Kaulotu na Chile Santiago East, ka Vitusagavulu ni iWasewase ena iWasewase na Ceva kei Amerika ena Ceva. A tokoni o koya ena 31 ni Maji, 2018, me Vitusagavulu Vakaitutu Raraba.

A sucu o Elder Villar ena 11 ni Sepiteba, 1969, mai Valparaiso, Chile, vei rau o Sergio Villar Vera kei Genoveva Saaverdra. A vakamautaki Carola Cristina Barrios ena 31 ni Maji, 1994, ena Valetabu na Santiago Chile. Erau nodratou itubutubu e tolu na gone.

Ni oti nona rawata na bejila diqiri ni veitaratara kei na veiwekani raraba kei na masita diqiri ni veivoli, a cakacaka o koya ena tabana ni volitaki wainimate kei na iyaya ni veiqaravi vakavuniwai. Ena 2007 a vakuria ena dua na masita diqiri ni liutaki bisinisi mai na Univesiti na Brigham Young. Qai lesu tale ki Chile me cakacaka vei Orica, e dua na kabani ni keli vatutalei, ena dua na gauna walega oqo vaka manidia liu.