Human sa Bagyong Maria

Imahe

hurricane

Paghulagway pinaagi ni Janice Kun

Ang akong pamilya ug ako mibalhin ngadto sa isla sa Dominica didto sa Caribbean niadtong Agosto 2016. Dali kaming napamahal sa kanindot, kultura, ug mga tawo sa isla. Mitambong kami sa lokal nga branch ug daghan og nakat-unan gikan sa mga miyembro didto.

Pagka-Lunes, Septyembre 18, 2017, usa ka Kategoriya 5 nga bagyo, nga Maria, miigo sa among gamayng isla. Ang akong bana ug ako nagtan-aw samtang ang mga panimalay ug mga sakyanan nangalabay diha sa dalan pinaagi sa kusog nga unos. Ang kabangis sa Bagyong Maria direktang miagi sa isla, ug ang kadaut makagun-ob. Sa adlaw human sa unos, nanglakaw kami agi sa kadalanan ug nakabantay nga ang abunda ug mabulukon nga rainforest sa Dominica morag usa na karon ka napanas nga lugar.

Nianang sama nga buntag, milakaw kami ngadto sa mga panimalay sa among mga isigka miyembro sa branch. Duha lamang ka panimalay ang wala maguba ug mapuy-an pa. Unom sa walo ka miyembro nga mga pamilya nga nagpuyo sa amihanang bahin sa isla ang nawad-an sa tanan. Otsenta porsyento sa mga panimalay ug mga building sa Dominica ang gideklarar nga dili na mapuy-an. Bisan pa man niini nga trahedya, daghang pamilya ang mipahiyum gihapon. Sa dihang gipangumusta namo sila, mitubag sila, “Bulahan kami nga buhi pa.”

Tungod kay ang among pamilya mipatalinghug sa tambag sa propeta nga mahimong self-reliant, duna kami pundo nga pagkaon. Nakapakaon kami og daghang silingan, mga misyonaryo, ug mga miyembro sa among branch. Kada kaon, kasagaran mipakaon kami og 20 ka tawo. Samtang gigamit namo ang among pundo nga pagkaon aron sa pagserbisyo ug pag-atiman niadtong anaa sa among palibut, ang kaugalingon namong mga alantuson mas migaan.

Kini nga kasinatian nakapahinumdom nako kang Alma ug sa iyang katawhan, kansang “mga alantuson … gihimo nga magaan; oo, ang Ginoo mipalig-on kanila nga sila makadaug sa ilang mga alantuson uban sa kasayon” (Mosiah 24:15).

Bisan tuod nga nagpuyo gihapon kami nga walay tubig, kuryente, ug inadlaw-adlaw nga mga kaharuhay, nalig-on kami nga makabuntog niini ug makadasig sa uban. Sa mga bulan sukad sa Bagyong Maria, akong naamguhan nga samtang importante nga mahimong andam sa temporal nga paagi, kinahanglan kita nga mahimong andam usab sa espiritwal nga paagi. Samtang magtuman ug mag-ugmad kita sa atong mga pagpamatuod diha sa pagtuo kang Jesukristo, makabaton kita og lig-ong pundasyon nga dili mapakyas kon ang mga hangin ug mga unos sa kinabuhi mohampak palibut kanato.