Ang Igong Gidaghanon sa “Abilidad”

Imahe

young adult nga babaye nagbarug sa may uma

“Kalooy ikaw mubo kaayo nga ikaw kinahanglan nga mobarug sa atubangan,” miingon ang akong magtutudlo. “Tungod kay ikaw ang labing bati nga mosayaw sa klase.”

Kini nga mga pulong gisulti kanako sa atubangan sa akong tibuok nga klase sa choir sa high school. Gisulti kini uban sa pangomedya, ug ako mitubag sa hinay, pinugos nga katawa, apan sa tinuod, naulawan ko. Ang akong magtutudlo nagtudlo og yanong mga lakang sa sayaw nga among sundon nga ipahigayon sa usa sa among konsierto. Subo lang, nga bakikaw ko kanunay, mao nga naglisud ko pagsunod sa mga lakang. Ug ang iyang mga pulong nakapawala sa gamay kaayo nakong pagsalig sa kaugalingon. Unsay iyang gisulti nako tinuod: mubo kaayo ko, ug dili makasayaw. Naghunahuna ko kon ako ba makamao gyud.

Kana nga kasinatian mao ang usa sa daghang higayon nga ako wala mobati nga mahimong “mas maayo.” Niadtong mga gutloa, ako nagtutok lamang unsay wala nako o unsay dili nako mahimo, kay sa unsay anaa nako ug unsay akong mahimo. Usa kini sa labing maayong paagi ni Satanas nga iyang gigamit batok kanako ug sa daghan pa.

Human mosulti nako ang akong magtutudlo sa choir nga ako bati kaayo mosayaw, nahigawad ako pag-ayo. Naningkamot ako kanunay sa pagpakita sa akong kaugalingong nga maayo sa unsay maayo sa uban. Ug ako napakyas pirme. Dili ko makahunong sa paghunahuna nga ang akong bugtong talento mao ang pagkamagdudula nga dili mapilian nga modula. Gibati nako nga ang Dios nakalimot sa paghatag nako sa igong gidaghanon sa “abilidad,” sama sa Iyang gihatag sa uban.

Usa ka adlaw sa seminary, ang akong magtutudllo mihatag og leksyon mahitungod sa mga nilalang sa Dios. Gipakita niya namo ang talagsaon mga litrato sa kawanangan. Nahinumdom ko nga nagtan-aw nga natingala sa tanang mga galaxy, mga bitoon, ug mga planeta nga gipakita—matag usa niini talagsaon, misteryoso, ug maanindot sa ilang kaugalingong paagi.

Ug didto ako nakaamgo og usa ka butang.

Gikan sa tanang talagsaon ug dili katuohan nga mga nilalang nga gihimo sa Dios, migahin Siya og panahon sa paghimo kanako. Usa ka gamay, ingon og dili importante, ordinaryo nga tawo, kinsa wala makaamgo sa tinuod unsa ka talagsaon siya. Usa ka tawo nga talagsaong gilain gikan sa uban. Usa ka tawo kinsa gihatagan sa iyang kaugalingon, piho nga plano. Usa ka tawo nga walay kinutuban ang potensyal ug balaan nga kapalaran.

Ako.

Mao kining gutloa sa dihang ako sa katapusan ug sa tibuok kasingkasing nga nagtuo nga “ang bili sa mga kalag mahinungdanon sa panan-aw sa Dios” (D&P 18:10). Nakaamgo ko nga Siya tinud-anay nga naghunahuna kanako, ug ako adunay igo nga gidaghanon sa “abilidad” sa Iyang mga mata.

Sa katapusan, wala gayud ako makakat-on unsaon sa pagsayaw. Makasulti ako sa tinuod nga walay ulaw-ulaw nga ako sa tinuod dili gayud makamao nga mosayaw. Apan OK ra kana! Tungod kay sa paglabay sa katuigan, akong nadiskobrehan ang akong daghang mga talento ug mga kalig-on sa akong kaugalingon nga wala nako mahibaloi nga ako aduna. Gipadayag kini samtang misalig ako sa Ginoo ug nagbaton og hugot nga pagtuo nga Siya nakahibalo nga ako maayo. Oo, kitang tanan mahigawad matag karon ug unya, apan kon kita mohunahuna sa plano sa Langitnong Amahan ug makahibalo sa kaimportante kon kinsa kita, sa atong talagsaong mga kalig-on, sa atong talagsaong mga abilidad, ug sa paggiya sa Ginoo sa atong kinabuhi, mas makahimo kita sa paglahutay niining kinabuhia uban sa hugot nga pagtuo, paglaum, ug talagsaong pagsalig.