Presiden Nelson I Lidim Rod

Presiden Russel M. Nelson i bin givim advaes long wanwan long yumi blong yumi mas gat moa kaen fasin, moa olsem Kraes, mo gat moa Spirit taem yumi stap givhan long ol narafala man, mo hem i soem wan eksampol blong mining blong hemia long wei we hem i bin givhan stat long las jeneral konfrens.

Sot taem afta long Epril 2018 jeneral konfrens, Presiden Nelson i aot long wan tua we i bin tekem hem mo waef blong hem, Wendy, mo Elda Jeffrey R. Holland blong Kworom blong Olgeta Twelef Aposol mo waef blong hem, Patricia, i go long Inglan, Isrel, Kenia, Simbabwe, India, Taelan, Jaena mo Hawae, YSA.

Long ol nara travel, Presiden Nelson i bin mit wetem ol memba, ol misinari, ol lida, mo ol fren blong Jos long Wes, Sentrol mo Is Kanada; Siatol Wasington, YSA; mo long Dominik Ripablik—longwe, hem i bin toktok long Spanis, we i fas taem we wan Presiden blong Jos i givim wan longfala toktok long wan lanwis we i no Inglis.

Long ol miting mo ol faeasaed, Presiden Nelson i tij abaot stret nem blong Jos; blong serem gospel wetem ol narafala man; blong holemtaet gud Buk blong Momon; hao taem man i laef folem gospel, i mekem laef i gud moa; hao wei blong Kraes i wei blong gat glad mo hapines, naoia mo long ol taem we i no save finis; prea; blong mekem ol hom oli ol sefples blong ol pikinini; blong yusum fridom blong mekem joes blong winim temtesen mo folem Sevya; blong kea long ol narawan; mo blong stap rere from, mo blong kasem olgeta blesing we oli kam long tempol.

Presiden mo Sista Nelson, tufala i bin toktok tu long wan wol yut divosen long 3 Jun 2018, mo long tetaem ia Presiden Nelson i talem se ol yut we oli joenem “ami blong Lod” mo help blong karem tugeta Isrel, bambae oli gat janis ia blong kam “pat blong wan samting we i bigwan, we i bigwan tumas, we i bigbigwan olgeta!” Hem i leftemap tingting blong ol yut blong kamaot long fasin blong stap dipen long sosol media, blong sakrifaesem sam taem i go long Lod, blong skelem gud laef blong yuwan wetem Lod, blong prea evri dei se bae evri pikinini blong God bae oli save kasem gospel, mo stap olsem wan laet long wol.