Stap Lanem Samting aot long Ol Mesej blong Jeneral Konfrens (2018 mo 2019)
Olgeta tijing blong ol profet, sia mo reveleta we oli stap laef, i save givim insperesen blong lidim wok blong ol kworom blong ol elda mo ol Rilif Sosaeti. Long ol wik ia we bambae oli stadi long ol mesej blong Jeneral Konfrens, olgeta presidensi blong kworom blong ol elda mo Rilif Sosaeti, bambae oli jusum wan mesej blong konfrens blong oli yusum, folem ol nid blong ol memba. Samtaem, bae bisop o stek presiden bae i save jusum wan mesej. Ol lida oli mas tokbaot bigwan ol mesej we oli kam long ol memba blong Fas Presidensi mo Kworom blong Olgeta Twelef Aposol. Be, ol memba blong presidensi oli save jusum eni mesej aot long las Jeneral Konfrens, folem ol nid blong ol lokol Sent mo insperesen we i kam long Spirit.
Ol lida mo ol tija oli mas faenem ol wei blong leftemap tingting blong ol memba blong ridim ol mesej we oli jusum bifo taem blong klas. Oli mas leftemap tingting blong ol memba blong kam long ol miting, we oli rere blong serem ol trutok blong gospel we oli bin lanem mo ol aedia blong olgeta long hao blong tekem aksen folem ol trutok ia. Olgeta tingting blong ol aktiviti blong lanem samting,we oli stap daon ia, we oli folem ol prinsipol insaed long buk ia, Teaching in the Savior’s Way oli save helpem ol memba blong lanem samting aot long ol mesej blong jeneral konfrens.
Quentin L. Cook, “Wan Jenis long Laef we I Dip mo I Stap I Go long Papa long Heven mo long Jisas Kraes”
Maet ol memba bae oli gat intres blong harem wanwan i serem wanem tingting blong olgeta taem oli harem abaot ol jenis ia we Elda Cook i talem long mesej blong hem. Sapos wan fren we hem i blong wan nara fet bae i askem olgeta from wanem Jos i stap mekem olgeta jenis ia, ?bae oli talem wanem? Leftemap tingting blong olgeta blong faenem samfala ansa long mesej blong Elda Cook. ?Wanem nao yumi save mekem olsem wanwan man, woman, mo famli, mo olsem wan kworom o Rilif Sosaeti, blong meksua se ol jenis ia oli mekem wanem we Lod i wantem se i hapen? Olsem pat blong toktok raon long poen ia, yu save serem tu sam tingting we i kam long Presiden Nelson long Ol Fas Toktok blong hem, we i givim insperesen long ol memba we oli “glad tumas blong akseptem” olgeta jenis ia.
Ronald A. Rasband, “Yufala I No Mekem Tingting blong Yufala I Trabol”
Mesej blong Elda Rasband i haelaetem samfala skripja we i save helpem yumi blong ronemaot fraet we yumi save gat long ol taem blong denja ia. Askem ol memba blong luklukgud insaed long ol skripja ia blong faenem sam advaes we bae oli save serem wetem wan we i stap fraet abaot fiuja we i stap kam. ?Wanem moa oli save serem aot long mesej blong Elda Rasband? ?Olsem wanem nao fraet i save “katem sot lukluk blong ol pikinini blong God”? Invaetem ol memba blong serem olsem wanem oli lanem blong winim ol fraet blong olgeta mo blong laef wetem fet.
David A. Bednar, “Olgeta Samting Bambae Oli Kam Joen long Kraes”
Tingting blong tekem wan rop mo wan jeklis blong soemaot. Invaetem ol memba blong toktok raon long wanem i defren bitwin blong stap luk ol trutok blong gospel mo ol program blong Jos olsem wan rop, mo stap luk olgeta olsem wan jeklis blong wanwan topik mo wok blong mekem. Leftemap tingting blong ol memba blong lukaotem sam niu tingting long ol eksampol we Elda Bednar i givim long mesej blong hem. ?Hem i minim wanem blong “olgeta samting bambae oli kam joen long Kraes”? (luk long Efesas 1:10). ?Wanem nao yumi save mekem blong kasem promes we i stap long en blong mesej blong Elda Bednar?
Dallin H. Oaks, “Trutok mo Plan”
?Olsem wanem nao, we, taem yumi andastanem “ol trutok blong gospel we i kambak,” i stap helpem yumi taem yumi fesem agens from ol bilif mo ol praktis blong yumi? Blong ansa long kwestin ia, ol memba oli save luklukbak long ol eksampol blong ol stamba trutok insaed long seksen II blong mesej blong Presiden Oaks. Oli save luklukbak tu long ol eksampol blong hao nao oli stap yusum ol trutok ia long laef (luk long seksen III). Bae i save helpem ol memba blong oli rolplei long hao bae oli yusum sam long ol stamba trutok ia blong ansa long ol nogud toktok agensem wan tijing o praktis blong Jos.
D. Todd Christofferson, “Stap Strong Gud mo Stanap Strong long Fet long Kraes”
Yu save statem wan toktok raon long mesej ia taem yu droem wan laen long bod, mo putum Strong long Sosol Saed long wan en, mo Komitmen Olsem Hemia blong Kraes long nara en. Invaetem ol memba blong ridim paragraf we i stat wetem “Plante long yumi i faenem, naoia, se fasin blong yumi i stap bitwin fasin blong tekpat nomo long gospel long wan han, …” mo tingting hevi long weaples nao oli stap long hem long laen ia. ?Wanem nao yu stap lanem aot long ol eksampol we oli stap insaed long mesej blong Elda Christofferson we i stap givim insperesen long yumi blong stap strong gud mo stanap strong long taem blong hadtaem? (luk tu long Alma 36:27–28). Leftemap tingting blong ol memba blong serem sam eksampol blong ol pipol we oli save olgeta we oli bin soem komitmen, olsem hemia blong Kraes, i go long gospel, iven taem oli fesem hadtaem.
Ulisses Soares, “Wan long Kraes”
Folem Elda Soares, ?olsem wanem nao Amason Reva i ripresentem ol memba blong Jos, we i kambak, blong Jisas Kraes? ?Olsem wanem nao wei we hem i komperem hemia i stap tijim yumi abaot paoa we ol niu memba oli save gat long Jos? ?Olsem wanem nao, yumi, olsem wan kworom o Rilif Sosaeti, i save folem kaonsel blong Elda Soares blong stap leftemap tingting, sapotem mo lavem ol niufala konvet? (luk long Moronae 6:4–5). Maet sam memba nomo oli save serem sam jalenj we oli stap fesem olsem ol niu memba blong Jos, mo olsem wanem ol nara memba oli bin helpem olgeta. Mo tu, yu save toktok raon long ol wei we ol niu memba oli bin kam blong mekem wod o branj blong yu i kam strong moa?
Gerrit W. Gong, “Kamp Faea blong Fet we i blong Yumi”
Tingting blong hangem wan pikja blong wan kamp faea mo invaetem wan blong serem wan eksperiens taem we hem i bin glad tumas blong gat wan kamp faea. Askem ol memba blong toktok raon long wanem Elda Gong i minim taem hem i tokbaot “wan kamp faea blong fet.” Afta, yu save serem ol memba oli go long ol grup, mo invaetem wanwan grup blong luklukbak mo serem wan long ol faef wei we Elda Gong i givim olsem wan “kamp faea blong fet” we i save leftemap tingting blong yumi. Givim taem long ol memba long oli save tingting hevi long wei we oli save mekem fet blong olgetawan, o fet blong wan we oli save, i kam strong moa.
Dieter F. Uchtdorf, “Biliv, Lavem, Mekem”
Yu save statem wan toktok raon long mesej ia taem yu raetem long bod Nomo Gat Hop mo Hapines. Invaetem ol memba blong luklukgud insaed long mesej ia mo faenem ol fasin mo ol bilif we oli kam taem wan i biliv, lavem man, mo mekem samting olsem Elda Uchtdorf i stap tijim. Invaetem ol memba blong serem ol wei we oli bin gotru long hapines ia we i kam taem wan i biliv, i lavem man, mo i mekem samting olsem we Elda Uchtdorf i stap tijim. Leftemap tingting blong ol memba blong faenem wan toktok we i leftemap tingting blong olgeta aot long mesej ia mo oli raetem mo hangem insaed long hom blong olgeta, o oli serem wetem wan fren.
Joy D. Jones, “Blong Hem”
Tingting blong serem stori long stat blong mesej blong Sista Jones, mo askem ol memba blong oli tingting abaot sam taem, we, oli luk se seves mo givhan wok blong olgeta, man i no “luksave o … no talem tangkyu from, o iven, oli no wantem.” Afta we yufala i toktok raon long stori ia, tingting blong raetem long bod, ?From wanem nao bae yumi givim seves? Invaetem ol memba blong ansarem kwestin ia taem oli luklukbak long haf blong mesej blong Sista Jones, mo lukaotem sam niu tingting (luk tu long Doktrin mo Ol Kavenan 59:5). ?Olsem wanem nao kaonsel blong Sista Jones i jenisim wei we yumi stap kea long mo givhan long wanwan long yumi?
Michelle D. Craig, “Fasin blong No Hapi Folem Tabu Wei”
Sista Craig i stap tokbaot “wan spes bitwin weaples yumi stap naoia mo huia yumi, mo weaples yumi wantem go mo huia yumi wantem kam olsem.” ?Olsem wanem nao God i wantem yumi blong filim abaot spes ia we i stap? ?Olsem wanem nao Setan i wantem yumi filim abaot spes ia? Wanwan memba i save luklukgud insaed long wan long ol trifala seksen insaed long mesej blong Sista Craig blong faenem ol ansa blong ol kwestin ia. ?Wanem nao yumi save mekem blong meksua se “fasin blong yumi blong no hapi folem tabu wei” i no mekem se yumi slakem tingting we i mekem tingting i ded?
Cristina B. Franco, “Glad blong Seves we I No Selfis”
Blong tijim se “lav, oli mekem i kam tabu tru long sakrifaes,” Sista Franco i stap serem tufala stori—wan abaot Viktoria, mo wan abaot wan wido. Yu save invaetem tu memba blong tufala i kam we tufala i rere blong serem wanem we tufala i bin lanem abaot lav mo sakrifaes aot long ol stori ia. ?Wanem nara eksperiens yumi save serem we i stap tijim semfala prinsipol ia? Sapos yu soem wan vidio we i soem Sevya we i stap givim seves long ol narafala man (olsem “Light the World—Follow the Example of Jesus Christ” long LDS.org), hemia i save lidim ol sista blong toktok raon long hao yumi save folem eksampol blong “givim seves we i go wetem sakrifaes.”
Henry B. Eyring, “Ol Woman mo Fasin blong Lanem Gospel Insaed long Hom”
Ol ples long skripja mo ol toktok we oli kamaot long “Famli: Wan Ofisol Toktok I Go long Wol” we Presiden Eyring i stap yusum long mesej blong hem, i givim sam niu lukluk long hamas nao paoa blong ol woman i impoten mo i bigwan insaed long hom. Ol memba oli save wok tugeta blong faenem olgeta ples ia long skripja mo ol toktok long Ofisol Toktok, mo toktok raon long wanem we oli bin lanem. ?Wanem invitesen nao Presiden Eyring i stap givimaot? ?Wanem promes nao hem i mekem? Tingting olsem wanem blong singsing o ridim wan hym abaot hom, olsem “Home Can Be a Heaven on Earth” (Hymns, no. 298), i save givhan blong mekem lesen i gud moa.
Dallin H. Oaks, “Ol Papa mo Mama, mo Ol Pikinini”
Taem yu stap rere blong tij, tingting long wanem pat blong mesej blong Presiden Oaks nao i stret long ol pipol insaed long kworom, o Rilif Sosaeti blong yu. Hemia samfala kwestin we yu save askem blong mekem ol memba long klas oli toktok raon long mesej ia: ?Olsem wanem nao ol fasin blong tedei, we Presiden Oaks i tokbaot long mesej blong hem long seksen I, i save wok agensem plan blong Papa long Heven? ?Wanem eksampol blong ol fetful woman nao yumi save serem blong i stap olsem eksampol blong ol toktok abaot ol woman we oli stap long seksen II? ?Olsem wanem yumi stap leftemap tingting blong ol yang woman we yumi save blong oli folem spesifik kaonsel blong Presiden Oaks we i go long olgeta, we i stap long seksen III?
Russell M. Nelson, “Ol Sista Oli Tekpat long Kam Tugeta blong Isrel”
Sapos yu stap tijim Rilif Sosaeti, tingting blong serem ol sista i go long fo grup, mo askem wanwan grup blong rid abaot wan long ol fo invitesen insaed long mesej blong Presiden Nelson. Ol grup oli save toktok raon long wanem i kam long tingting blong olgeta abaot invitesen ia, ol eksperiens we oli bin gat blong mekem folem invitesen ia, mo ol aedia long hao blong tekem aksen folem invitesen long fiuja. Afta, askem wanwan grup blong serem wetem evriwan wanem nao oli bin tokbaot. Sapos yu stap tijim olgeta we oli kasem prishud, yu save askem olgeta blong faenem ol toktok insaed long mesej blong Presiden Nelson we i soem hao Papa long Heven i stap filim abaot ol gel blong Hem. ?Wanem nao yumi save mekem blong sapotem mo leftemap tingting blong ol sista blong tekpat long wok blong mekem Isrel i kam tugeta?
M. Russell Ballard, “Visen blong Fasin blong Pemaot Ol Dedman”
Yu save invaetem ol memba blong akseptem invitesen blong Presiden Ballard, mo ridim Doktrin mo Ol Kavenan 138 bifo yufala i toktok raon long poen ia. Askem ol memba blong oli serem ol eksperiens blong olgeta, mo ol niu lukluk blong olgeta, aot long seksen ia, long taem blong miting. Ol kwestin olsem, oli save helpem ol memba blong oli andastanem hamas revelesen ia i impoten: ?Olsem wanem revelesen ia i tekem kamfot i kam? Mo ?Wanem trutok nao i stap insaed long revelesen ia, we i save jenisim ‘wei we yumi stap laef evri dei long laef blong yumi.’?
Bonnie H. Cordon, “Stap Kam Wan Man blong Lukaot long Sipsip”
Blong helpem ol memba blong tingting long sam wei we oli save kam antap long hem long saed blong givhan wok blong olgeta; yu save serem olgeta i go long tri grup mo askem wanwan grup blong ridim wan long ol tri taetol seksen blong mesej blong Sista Cordon. Invaetem olgeta blong serem olgeta prinsipol blong wok blong givhan we oli bin lanem. ?Olsem wanem nao we, taem yumi traem blong folem olgeta prinsipol ia, i stap helpem yumi blong “kam ol man blong lukaot long sipsip we Lod i nidim yumi blong kam”? Invaetem olgeta memba blong oli serem ol eksperiens blong olgeta taem givhan blong wan narawan i bin helpem olgeta blong filim se Sevya i save olgeta mo i lavem olgeta.
Jeffrey R. Holland, “Seves Ia blong Man I Stretem Hemwan”
Yu save statem wan toktok raon long mesej blong Elda Holland taem yu invaetem ol memba blong tingting long wan rilesensip, insaed long laef blong olgeta, we i nidim blong i kam oraet bakegen, o i nidim blong oli stretem. Afta, oli save lukluk insaed long mesej blong Elda Holland, mo lukaotem olsem wanem Brad mo Pam Bowen, tufala i bin helpem papa blong tufala blong gat hiling. ?Wanem blesing i bin kamaot long traehad wok ia? ?Wanem niu lukluk ol memba oli save gat, we i save helpem olgeta blong hilim rilesensip blong olgeta bakegen?
Neil L. Andersen, “We I Karem Kil”
Blong presentem mesej blong Elda Andersen, tugeta yufala i save ridim Luk 10:30–35 o lukluk vidio ia “Parable of the Good Samaritan” (LDS.org). ?Olsem wanem nao, yumi evriwan, yumi semmak long man ia we i foldaon long han blong ol stilman ia? Folem toktok blong Elda Andersen, ?long wanem wei nao Jisas Kraes i “Gudfala Man Sameria blong yumi”? ?Olsem wanem nao yumi save akseptem hiling blong Hem? Maet yu save invaetem ol memba blong oli serem sam wei we Sevya i bin hilim ol soa blong olgeta, o ol soa blong olgeta we oli lavem olgeta. Oli save luklukgud tu insaed long ol toktok blong Elda Andersen blong faenem wan mesej we i leftemap tingting, we bae oli save serem wetem wan we i karem kil.
Russell M. Nelson, “Stret Nem blong Jos”
Jisas Kraes i givim komanmen se bae oli mas singaotem Jos i folem nem blong Hem. Yu save helpem ol memba blong oli wantem moa blong folem daereksen ia taem oli invaetem olgeta blong luklukgud insaed long mesej blong Presiden Nelson, mo lukaotem ol risen blong “from wanem oli no save toktok raon long nem blong Jos.” Afta, invaetem olgeta blong luklukgud long en blong mesej blong Presiden Nelson, blong faenem olgeta promes hem i talem se bae oli kam taem yumi stap wok blong “putumbak stret nem blong Jos blong Lod.” ?Wanem nao yumi save mekem blong help wetem wok ia?
Henry B. Eyring, “Traem, Traem, Traem”
Presiden Eyring i askem “tu impoten kwestin”: “?Bae mi mas mekem wanem blong tekem nem blong Sevya long mi?” mo “?Hao bae mi save taem mi stap mekem wan progres?” Maet yu save raetem ol toktok ia long bod mo invaetem olgeta memba blong serem sam niu tingting we oli kasem abaot tufala kwestin ia aot long mesej blong Presiden Eyring mo eksampol blong Sista Eyring. Presiden Eyring i stap tokbaot tu, singsing ia “I’m Trying to Be like Jesus” (Children’s Songbook, 78–79). ?Wanem nao olgeta toktok blong singsing ia oli save ademap long storian blong yumi?
Dale G. Renlund, “Naoia Yufala I Mas Jusumaot”
Ol memba oli save tingting long wan we oli wantem leftemap tingting blong hem blong folem plan blong Papa long Heven, olsem wan memba blong famli o wan we oli stap givhan long hem. Afta, oli save luklukbak long mesej blong Elda Renlund blong oli faenemaot olsem wanem Papa long Heven mo Jisas Kraes, Tufala i filim abaot olgeta. ?Olsem wanem nao Tufala i stap helpem yumi blong jusum fasin blong stap obei? ?Wanem nao eksampol blong Tufala i talem abaot wei we yumi save kam antap long hadwok blong yumi wetem ol famli, mo tu, long givhan wok blong yumi?
Gary E. Stevenson, “Stap Lukaot Gud long Ol Sol”
Olgeta we yu stap tijim olgeta, oli save gat wan kwestin olsem hemia we i stap long mesej blong Elda Stevenson: “?Hao yumi save sapos yumi stap givhan long wei we Lod i wantem?” Bae i gud blong olgeta blong save toktok raon long samfala ansa blong kwestin ia we oli faenem insaed long mesej ia. Sapos no, yu save tekem wan pikja i kam, we i blong Sevya we i stap olsem wan man blong lukaot long sipsip (luk long Gospel Art Buk [2009], no. 64) mo invaetem ol memba blong serem wan trutok aot long mesej blong Elda Stevenson, we pikja ia i ripresentem tu. Afta, ol memba oli save serem wanem we oli bin filim strong blong mekem folem wanem we oli bin toktok raon long hem.