Seia Tatou Toe Feiloai
Iloaina o Keriso e ala i a Iosefa Samita
Mai le “Joseph Smith—The Mighty Prophet of the Restoration,” Ensign, Me 1976, 94–96. Ua faalaugatasia le faamataitusi lapopoa.
E i ai le toatasi ua ala ai ona oo mai i o tatou taimi le malamalama e uiga ia Keriso ma e uiga i le faaolataga.
Tatou te aoao atu ma molimau atu o le faaolataga o loo ia Keriso. O Ia o lo tatou Alii, o lo tatou Atua, o lo tatou Tupu. Tatou te tapuai i le Tama i Lona suafa, e pei ona faia e perofeta paia uma, ma le Au Paia o augatupulaga uma.
Tatou te olioli ia te Ia ma i Lana taulaga togiola. O Lona suafa e maualuga atu i suafa uma, ma o Ia e tatau ona ifo i ai tulivae uma ma ta’uta’u atu e laulaufaiva uma o Ia o le Alii o mea uma, a aunoa ma Ia o le a le i ai se tino ola pea po o le ola e faavavau.
Ae o le a ou talanoa atu nei e uiga i le isi, o le ua ala ai ona oo mai i o tatou taimi le malamalama o Keriso ma le faaolataga. …
O le a ou talanoa atu e uiga ia Iosefa Samita le Itiiti, o le perofeta ta’uta’ua o le Toefuataiga, o le sa muamua faalogo i le siufofoga faalelagi i lenei tisipenisione, o le, na ala mai i lona avea ma tufuga aao, ua toe faatuina ai le malo o le Atua i tagata. …
I le tautotogo o le 1820 na saeluaina ai e le [Atua le Tama ma Lona Alo o Iesu Keriso] le veli o le pouliuli lea na loa tausaga o ufitia ai le lalolagi. … Sa afifio ifo i Laua mai lo Laua afioaga selesitila i se togalaau e latalata i Palemaira, Niu Ioka. Na valaau atu ia Iosefa talavou i lona igoa, ona Laua ta’u mai lea ia te ia … o le a avea o ia ma tufuga aao i o Laua lima i le toefuataiina mai o le atoatoaga o le Laua talalelei e faavavau. …
Atonu e lelei le fesili ifo o tagata uma ia i latou lava, po o fea latou te tutu ai e faatatau ia Iosefa Samita ma lana misiona paia. Pe latou te tuufesili i lona suafa ma saili lena faaolataga lea e na’o le talalelei a Keriso e maua ai, e pei ona faaalia mai i Lana perofeta o aso e gata ai … ? O le fesili tele lava e tatau i tagata uma o o tatou aso ona tali—ma i le lamatia ai o o latou lava faaolataga—o le: Pe na valaauina ea Iosefa Samita e le Atua? …
… E le tatau ona i ai se le femalamalamaa’i. O i tatou o molimau o Iesu Keriso. O Ia o lo tatou Faaola. … Ae o i tatou foi o molimau o Iosefa Samita, o le ua ala ai ona tatou iloa e uiga ia Keriso, ma o le taitai faatulafonoina na tuuina mai i ai le mana e fusifusia ai mea i le lalolagi ma faamaufaailogaina i le lagi, ina ia avea tagata uma mai i lona taimi ma le agai i luma, atonu o ni suli o le faaolataga.