O Fea Ua O I Ai O’u Faiaoga o Aiga ma Faiaoga Asiasi?
Saunia e Jean B. Bingham
Peresitene Aoao o le Aualofa
O le fetuutuunai o auaunaga e tatau ona uunaia ai i tatou e faaali atu le tausiga faateleina, ae le o le taitai atu o i tatou e le faaleano ai
Sa fesili mai ma le le mautonu lata mai nei se tasi o a’u uo, “O fea ua o i ai o’u faiaoga asiasi?” Mai le taimi na maliu ai lana tane, sa alolofa ma mataalia i laua ae talu mai lava le faasilasilaga o le polokalama fou o auaunaga i le konafesi aoao ia Aperila 2018, na te le’i toe maua lava se tala pe vaai foi ia i laua.
O loo tatou tau faamasani uma lava i se auala fou o le faiga o mea, ma atonu e le o malamalama nisi o tuagane ma uso a auauna e ui e le na’o se asiasiga i le aiga se auala e auauna atu ai ma e mautinoa lava o se auala matagofie lea e faaali atu ai le alofa ma le fiafia moni—ma e toatele lava le au paia o loo manaomiaina pea.
O le faamuamua o le Aisea i luga a’e o le E Faapefea
Mo nisi, atonu o le faafitauli o le le malamalama i le faamoemoega o le suiga. O le faamoemoega maualuga o le suia o asiasiga i aiga ma faiaoga asiasi i le auaunaga, sa le na ona suia le pe faapefea ona tatou tausia le tasi ma le isi ae ina ia fesoasoani ia atili taialaina i tatou e le aisea.
O le faamoemoega tupito o le tatou auaunaga o le fesoasoani lea i isi ia faateleina le loloto o le liua i le Faaola o Iesu Keriso ma ola agai atu i o latou gafatia e faavavau. O le faaopoopo o le fetuutuunaiga o le polokalama, e le o lona uiga ia uunaia ai le faata’eta’ealuga o a tatou taumafaiga; o lona uiga ia tuuina atu ai se avanoa faateleina mo le Agaga e taiala ai a tatou taumafaiga.
O le mea lea pe manaomia pe le manaomia e se tasi se asiasiga i le aso, e tatau ona matele lava le faavae i le mea o le a fesoasoani latou te agai ai i luma i le ala a le Tama Faalelagi mo i latou.
Aoao Faatasi
E ui lava i le le mautonu sa i ai muamua e uiga i le mea ua faamoemoeina mai ia i tatou a o tatou auauna atu, ae o loo aapa atu o tatou uso ma tuagane o le tasi i le isi. Po o fea lava ou te malaga i ai, e ese le manaia o le faalogologo atu i le anoano o tamaitai (ma le toatele o alii) e faasoa mai a latou tala e uiga i aafiaga lelei o a latou auaunaga—po o auaunaga foi sa faia mo i latou—i mafutaga ma le tuputupu ae o le tagata lava ia.
Na faatoa ou foi mai talu ai nei mai Carolaina i Matu, ISA, lea sa faasoa mai ai e le peresitene o le Aualofa a se uarota nisi o manatu sa ia maua mai taitai o le siteki. Faatasi ai ma ni nai faamaninoga laiti, ou te manatu o ia mea e matuai fetaui tonu lava ma e onomea ona faasoa atu.
Fai Pea lava pea
O loo tatou aoao faatasi uma lava a o tatou taliaina “se faiga fou atu, ma le paia atu” i le auaunaga.1 Atonu e lagona e nisi o i tatou le lofituina po o le fefe. E fesoasoani le manatuaina o le “fou atu ma le paia atu” e le o lona uiga o le “leai o se pona ma e le ausiaina.”
E tusa pe o e le mautonu lava e uiga i faamoemoega o le auaunaga ma lona faiga, pe ua e manatu foi ua e silafia le faiga, ou te valaaulia oe e maimoa ma faitau i punaoa o loo i le ministering.lds.org ma suesue i tusiga o Mataupu Faavae mo le Auaunaga ua lomiaina i masina taitasi i le Liahona (tagai i le itulau e 8 o le lomiga lenei). O le a fesoasoani nei anomea e faaogatasi ai au taumafaiga faaleauaunaga ma le galuega a le Faaola.
Faafetai lava uso e ma tuagane lelei, mo le alolofa ma le agalelei ma le aapa atu ma tuuina atu o outou lava. E mataina moni lava outou ma o a outou auaunaga o le a avea ma se “mea maoae”!2