Rongorongo ni Kairiiri man te Aono
Ko Tangirai?
Ngkai a mwananga ana reirei ma te Tia Kamaiu ni mataniwin aban Kaitareia Biribi, e titirakiniia Iesu, “Ao ngkami kam taku bwa antai Ngai?”1 E kaeka Betero ni kangai, “Bon te Kristo Ngkoe, are Natin te Atua are E maiu.”2 Ngkanne i marawan Tiberia, te Kristo ae e a Uti e titirakina Betero, “Ko tangirai riki nakoia uakai”3 E matoa ana kaeka Betero, “Eng, te Uea, ko atai bwa I tangiriko.”4
E ataia Betero rinanon te Tamnei ae Raoiroi bwa Iesu bon te Kristo. E a tia ni karekea oin ana kaotioti, ao aio e riki bwa ana kakoaua ma ana koaua ae onoti. Te Tia Kamaiu e ataa aio ngke e taekinna, “Ko a kabwaia Timon ae natin Iona: bwa e aki kaota aei nakoim te iriko ma te rara, ma e kaotia Tamau are i Karawa”.5 Imwin tian Betero ni kaota ana tangira ibukin te Tia Kamaiu, e kaeka Iesu ma te taeka, “Kakamwarakeia au tibu.”6 Ni beku ibukin te Tia Kamaiu ti na tangiria, ao ngkana ti tangiria, ti na kinaa.
N te ririki ae nako n Eberi n te Maungatabu ni Kabuta, e katanoata Beretitenti Russell M. Nelson te waaki ae boou ao ae e tabu bwa e kanga arora n tabeakiniia ao n ibuobuoki nakoia aomata. E taku, “E a tia te Uea ni karaoi bitaki n te kawai are ti na tararuaira i bon imarenara.”7 Ngkanne n Okitobwa n te Maungatabu ni Kabuta, e katanoata Beretitenti Nelson bwa ti na karekei “bwaai n reirei ake a maiuakinaki n te mweenga ake e boutokai te Ekaretia ni kamatebwaia te reirei, ni kakorakora te onimaki, ao ni karikirakea oin arora n taromauri.”8
Ngkai e reitinako Betero ni karikirakea ana onimaki, e taku te Tia Kamaiu nakoina, “Ngkana ko a rairaki kateimatoaia tarim.”9 Ana katanoata Beretitenti Nelson ibukin te mweenga, e boboto iaon reiakinan te reirei ao te waaki ae boou, ao ae e tabu n tabeakiniia ao n ibuobuoki nakoia tabeman, e kariaira bwa ti na karaoi raoi bwaai aika uoua are e butiaki iai Betero iroun te Tia Kamaiu.
Te moan, ti na karikirakei oin rairakira aika onoti ibukin te Tia Kamaiu Iesu Kristo. E ngae ngkana teniua te aoa tain te bootaki n taromauri, ke ngkana tao ai uoua ngkai, e bon mena n oon mweengara are ti na karekei aika a mwaiti n rairakira aika a onoti ao ara onimaki ae aki mwainging.
E taku Beretitenti James E. Faust (1920–2007), “Ngkana ti tangiri mweengara bwa a na tabu, ti na kakorakoraira riki ni karaoi bwaai ake a booraoi ma Tamnein te Uea.”10 Bwaai n reirei ake e boutokai te Ekaretia, “Nakomai, Iriirai—Ibukiia Aomata nako ao Utu” e baireaki ibukin buokara n reiakina te euangkerio, ngkana tao i bon iroura ke ara utu.
Ngke e kabwarabwaraaki bitaki aika a boou nakon ana tai ae onoti te aomata ke te utu, e na bae ni kaoti ma oin ana kakaewenako. N ataakin aio, e katauraoa te kakoaua aio nakoira Beretitenti Nelson: “I berita bwa ngkana kam botumwaaka ni mwakuri ni karika mweengami bwa te tienta ibukin reiakinan te euangkerio, n taai aika a bati a na rangin kakukurei bongin ami Tabati. A na kukurei natim n reiakin ao ni maiuakin ana reirei te Tia Kamaiu, ao a na akea korakoran ana kairoro teuare e buakaka inanon maium ao inanon naba mweengam. E na korakora te bitaki inanon mweengam ao ni kateimatoaki.”11
Kauouan katein Betero ae e kaineti bon kateimatoakiia tarina. Ti nanona ngkai aio ma te mwakuri n “ibuobuoki”. E taku Unimwaane D. Todd Christofferson bwa te ibuobuoki bon, “aron te riki bwa ana reirei, ti iriira te Tia Kamaiu, ti kataia ni karaoa are e karaoia te Tia Kawakin Tibu ae Raoiroi, ao n ira ana katooto ake E katei ao are reirei bwa ti na iriira Kristo ao n riki bwa Ana reirei n aro nako”.12 Ngkai ti karikirakea anuan Kristo i bon inanora, mwiokoara ibukin ara ibuobuoki e na aki taraa ni karawawata, ma, e na korakora tangirana ao e na iai kaniwangam iai ao e na karaunano karaoakina.
Tera ae kananona Kristo ngke E kabongana te taeka ae “aikai”, ngke E taku nakon Timoni Betero, “Ko tangirai riki nakoia ‘uakai’”?13 E kananonai katabetabe ao bwaai riki tabeua aika a mwaiti inanon maiura, ake a kaiangatoa n ara tai ao n ara iango.
Unimwaane Christofferson e taku, “Ni kawakina te onimaki ae matoatoa man teimatoa iroun Kristo e kainnanoa ana euangkerio Iesu Kristo bwa e na rin inanora ao n tamneira, nanona bwa te euangkerio e na riki tiaki ti teuana te bitaki man bitaki nako inanon maiun te aomata, ma e na boboto iaon kaitiakan maiu teuanne ke neienne.”14 Ngkai ti karikirakea ara koaua iroun Kristo, ara maroro e na riki bwa rairakira. Ngkanne ti na kona ni kaeka n aron are e karaoia Timon Betero ma te koaua ni kangai, Eng te Uea, ko ataia bwa I tangiriko, bwa ngkoe te Kristo, natin te Atua ae maiu.