Kat-uni ang Bag-ong Paagi sa Pagkat-on

Alang sa tigkat-on:

Adunay 168 ka oras sa usa ka semana, ug pipila lamang niadto nga mga oras ang gigahin sa simbahan. Mao nga samtang kamo nagkat-on og daghan diha sa mga klase sa Simbahan, gusto usab kamong maningkamot nga makat-on ug magsunod sa ebanghelyo sa tibuok semana. Hunahunaa ang espirituhanong pagkat-on sama sa ehersisyo: makakita kamo og daghang benepisyo kon kamo mag-ehersisyo makadaghan sa usa ka semana kay sa kamo mag-ehersisyo kausa lang sa usa ka semana. Ug sa giladmon sa inyong pagtuon sa mga kasulatan diha sa panimalay, kamo mapuno sa mga pagsabut ug espirituhanong panabut nga makapanalangin sa inyong kinabuhi ug sa mga kinabuhi sa uban sa imong pagpakigbahin unsay inyong nakat-unan.

Alang sa magtutudlo:

Tingali dili igo ang paghatag og maayong leksyon sa matag Domingoo. Usa sa mga tumong sa usa ka magtutudlo mao ang pag-awhag sa personal ug pamilya nga pagtuon sa mga kasulatan. Unsa nga mga kasinatian ang nasinati sa mga sakop sa klase sa pagtuon sa mga kasulatan niining semanaha? Unsa nga mga panabut ang mahimo nilang ipakigbahin? Tingali makita ninyo nga makatabang ang pagtan-aw sa inyong tahas sama sa usa ka direktor sa koro [choir] nagtudlo sa pagkanta ug paghimo sa tanang tingog ngadto sa usa ka matahum nga kanta. Makatudlo kamo og leksyon, giyahan ang panaghisgutan, ug modala sa tanan nga inyong nailhan ngadto sa kasinatian, apan dili kamo makahimo og makapadasig nga musika kon ang klase dili mopakigbahin sa ilang kaugalingong mga panabut ug inspirasyon.

Alang sa tigkat-on:

Kon magtuon kamo sa kasulatan, makakita kamo og mga kamatuoran sa ebanghelyo—doktrina—nga makatabang ninyo nga makaila og maayo sa Dios ug mas makasabut sa pag-atubang sa inyong mga hagit. Makita usab ninyo nga ang ubang mga kamatuoran sa ebanghelyo direktang gipahayag sa teksto samtang ang uban gipasumbingay. Hunahunaa ang inyong pagsiksik sa kamatuoran sama sa pagsiksik sa nalubong nga bahandi. Kinahanglan mo nga maningkamot sa pag-ukab ug pagdiskobre sa kamatuoran, apan sa katapusan, kamo makabaton “sa labing dako nga ganti nga mahimong maangkon sa mga mortal.”¹

Alang sa magtutudlo:

Ang mga magtutudlo labaw pa sa mga facilitator ug mga moderator; sila adunay obligasyon sa pagtudlo og doktrina—sa pagpamatuod, sa paggiya, ug sa pagdasig. Samtang kamo mangandam sa pagtudlo pinaagi sa pagtuon, pagpamalandong, ug pag-ampo, kamo makaandam sa pagtabang niadtong inyong gitudloan nga mas makasabut ug makagamit sa dinasig nga doktrina. Salig sa inyong tahas isip magtutudlo sa Ang Simbahan ni Jesukristo sa mga Santos sa Ulahing mga Adlaw. Uban sa hiniusang paningkamot, kamo mas makatudlo sama sa Manluluwas.

Imahe

woman teaching at church

Alang sa tigkat-on:

Si Presidente Russell M. Nelson midapit karong bag-o sa mga miyembro sa “pagpalambo sa [ilang] espirituhanong kapasidad sa pagdawat og pagpadayag.”² Samtang magtuon kamo sa pulong sa Dios, gipakita ninyo Kaniya nga kamo gusto nga modawat og pagpadayag. Ang personal nga pagpadayag sa kasagaran moabut kon kamo nagtuon og pagpadayag nga gihatag na sa Ginoo ngadto sa Iyang mga propeta. Ang pagsubli sa ika-siyam nga artikulo sa hugot nga pagtuo: kon tun-an ninyo ang tanan nga “gipadayag” sa Dios, inyong giandam ang inyong kaugalingon sa pagdawat sa tanan nga “gipadayag Niya karon” ug sa tanan nga “ipadayag pa Niya.”

Samtang madawat ninyo ang pagpadayag, palamboa ang kinaiya sa pagrekord sa inyong mga impresyon ug pagbuhat niini. Wala lamang kita magpakita sa Ginoo nga inyong gihatagan og bili ang mga butang nga Iyang gitudlo kaninyo, apan sa mahimong mausab tungod sa unsay atong nakat-unan, kinahanglan nga gamiton nato kini.³

Alang sa magtutudlo:

Ang pagpadayag mahitungod sa unsay itudlo sa klase moabut kaninyo sa daghang paagi. Mahimong moabut kini samtang magtuon ka sa mga kasulatan alang sa imong kaugalingon. O mahimong moabut kini samtang magribyu kamo sa mga kapanguhaan sa Dali, Sunod Kanako alang sa panimalay o alang sa mga klase sa Simbahan. Kon moabut ang inspirasyon, irekord ug buhata ang mga impresyon nga inyong nadawat.

Bisan human kamo makahimo og mga plano kon unsay inyong buhaton sa klase, ayaw kahadlok sa pagtubag sa inspirasyon atol sa klase aron matubag ang mga panginahanglan niadtong inyong gitudloan.

Alang sa tigkat-on:

Ang pulong sa Dios mao ang tinubdan sa espirituhanon nga kahibalo ug kalig-on. Dali, Sunod Kanako—Alang sa mga Indibidwal ug mga Pamilya gituyo isip usa ka kapanguhaan sa pagsuporta sa inyong personal ug pamilya nga pagtuon sa kasulatan. Gamita kini isip giya o tabang samtang kamo magtuon sa Bag-ong Tugon. Kon kamo usa ka ginikanan, magamit ninyo kini sa pagplano og makadasig nga mga kasinatian sa family home evening ug sa pagsuporta sa inyong pamilya nga magtuon sa mga kasulatan. Ang mga single adult makapundok ug makagamit niini alang sa pagtuon sa kasulatan isip usa ka grupo. Gamita ang kapanguhaan sa bisan unsa nga paagi nga makatabang kaninyo ug sa inyong pamilya nga makaangkon sa gahum nga magagikan sa pagkat-on ug pagbuhat sa pulong sa Dios.

Alang sa magtutudlo:

Hinumdumi nga ang mga miyembro sa inyong klase adunay gamhanan nga mga kasinatian samtang sila magtuon sa panimalay. Paggahin og panahon sa matag klase nga mangita unsay ilang nakat-unan. Ang mga kapanguhaan nga Dali, Sunod Kanako alang sa Sunday School ug Primary naghatag og gisugyot nga mga kalihokan sa pagtabang ninyo nga makahimo og mga kasinatian sa pagkat-on nga makapaapil niadtong inyong gitudloan. Apan ayaw batia nga obligado sa unsay nasulat sa mga pahina. Usba o paghimo og mga kalihokan nga gibati ninyo nga makapalig-on sa pagtuo, sa pagsabut, ug sa mga pagpamatuod sa mga sakop sa klase. Kon ang pipila ka mga tigkat-on dili mobati sa tinguha nga mopakigbahin og daghan, Ok ra kana. Tabangi sila nga makahibalo nga ang ilang pagtuo mapadayag usab pinaagi sa pagtambong ug pagtinguha sa pagpaminaw sa pulong sa Dios.

Alang sa tigkat-on:

Ang imong mga paningkamot sa pagpangalagad sa uban mapanalanginan pinaagi sa unsay inyong nakat-unan sa mga kasulatan. Mahimo kamong makakita og butang sa inyong pagtuon nga mahimong ipakigbahin ngadto sa uban. Ilabi na sa Bag-ong Tugon, makakita kamo og mga ehemplo sa kasulatan kon sa unsa nga paagi nga ang Manluluwas ug ang uban nangalagad sa gamhanan kaayo nga paagi. Ang imbitasyon sa Ginoo “dali, sunod kanako” (Lucas 18:22) mahitungod sa kon unsay inyong buhaton human kamo nakatuon—buhaton ang mga butang nga inyong nakat-unan ug gibati. Mao nga samtang kamo magtuon sa kinabuhi ni Jesukristo niining tuiga, pangitaa unsay gitudlo sa Iyang kinabuhi kaninyo mahitungod unsaon sa pagpangalagad ngadto sa uban ug sa unsa nga paagi nga ang inyong kaugalingong pangalagad makapanalangin sa mga kinabuhi niadtong anaa sa inyong palibut.

Alang sa magtutudlo:

Ang usa ka magtutudlo mao ang respponsable sa pag-alagad dili lamang sa mga tawo nga moanha sa klase apan usab niadtong wala motambong. Isip usa ka magtutudlo, bantayi kinsa ang anaa sa klase ug kinsa ang wala. Makapangalagad kamo sa mga miyembro sa gawas sa klase pinaagi sa pagbisita kanila sa ilang mga panimalay, pagtawag nila sa ilang telepono, o pagpadala kanila og elektronik nga mensahe, ug pag-awhag kanila sa pag-apil sa pagkat-on sa ebanghelyo diha sa panimalay ug sa simbahan. Ang inyong impluwensya mas dako kay sa inyong nahibaloan, ug ang inyong gugma ug pagpakabana alang sa uban makahimo sa tanang kalainan.

Samtang tutukan nato ang naggiya nga mga baruganan luyo sa bag-o nga Dali, Sunod Kanako nga kurikulum, mas magmalampuson kita sa paghimo niini nga kabahin sa atong kinabuhi ug sa pagtugot niini sa pag-usab sa atong kinabuhi sa mga paagi nga gusto sa Dios.