Nagtan-aw sa Paglambo sa Templo sa Roma
“Gusto ko nga makita. Ug moadto sa templo” (Songbook sa mga Bata, 99).
Sila si Gioele ug Michele mitan-aw sa dapit sa konstruksyon atbang sa karsada. Makita nila ang daghang mga puthaw nga sablayan ug mga gitumpi nga mga semento.
“Dili pa kaayo templo tan-awon,” miingon si Gioele.
“Apan sa umaabut templo na kini,” tubag ni Michele.
Mao kini ang unang higayon nga ang managsoon nakakita sa dapit diin gitukod ang Rome Italy Temple. Sa pagkakaron ang ilang pamilya kinahanglan nga moadto pa sa Switzerland aron mobisita sa templo. Apan kining bag-ong templo mga 30 minutos lang gikan sa ilang balay!
Sila si Michele ug Gioele nagtan-aw sa dako nga yellow nga mga trak nga mibalhin sa pundok sa yuta.
“Sa akong pagtuo anha ang usa sa mga spire,” miingon si Michele, nagtudlo sa usa ka dapit duol sa atubangan sa gambalay [building].
Miyango si Gioele. “Tan-awa! Nagpadulong na si Papà,” miingon siya. Ang ilang amahan nagsul-ob sa naandan nga sinina pangtrabaho—mga sinina sa simbahan nga dunay puti nga kalo sa konstruksyon. Nagtrabaho siya isip usa ka electrical engineer sa templo. Ganahan silang maminaw unsay iyang gitrabaho matag adlaw. Pananglitan, usa ka adlaw miingon siya kanila nga ang estatuwa ni Kristo miabut na. Laing higayon giingnan niya sila mahitungod sa bunyaganan.
Nianang gabhiona, si Michele misiguro nga siya nakaampo ug nagpasalamat sa Langitnong Amahan alang sa templo. Gibati niya ang kainit sa kaugalingon kon siya mag-ampo mahitungod niini.
Milabay ang mga semana. Ang nagkurba nga mga bong-bong sa templo gitabunan sa gahi nga bato, ug ang duha ka tag-as nga spire nagbarug direkta sa panganud. Usa ka gamay nga sentro alang sa mga bisita gitukod sa duol. Matag karon ug unya, sila si Gioele ug Michele moadto didto aron motan-aw sa may bintana ug motan-aw unsay nausab.
Dayon usa ka adlaw nakaangkon sila og malipayon nga surprisa.
“Gusto ba kamong motan-aw sa estatuwa ni anghel Moroni nga ibutang sa ibabaw sa templo?” Si Mama nangutana. Ang mga pamilya sa tanang mga trabahante sa konstruksyon giimbitar aron motan-aw.
Si Gioele ug si Michele hapit dili makatuo niini. Nalipay kaayo sila!
Pagkasunod buntag nagsul-ob sila og puti nga mga sinina ug mga kurbata. Naglakaw-lakaw sila palibut sa templo uban sa laing mga pamilya. Nagpalitrato gani sila uban sa bulawan nga anghel Moroni. Dako kaayo kini!
Dayon ang mga trabahante nagsugod sa pagbalhin sa estatuwa. Si Gioele mitan-aw sa dakong crane nga mabinantayong mialsa ni anghel Moroni sa ibabaw sa usa sa mga spire. Usa ka drone naglupad nagkuha og video. Nindot kaayo!
Si Gioele naghunahuna mahitungod sa tanang mga tawo kinsa makat-on mahitungod sa Simbahan pinaagi sa pagbisita sa nataran sa templo. Naghunahuna siya mahitungod sa unsa ka daghang mga tawo nga maminyo didto ug sa unsa nga paagi ang mga tawo mabunyagan alang sa mga tawo nga nangamatay.
“Karon templo na kini tan-awon,” giingnan niya ang iyang igsoong lalaki. Si Michele mipahiyom ug miyango.
Ang managsoon mibati og kalipay. Naghinam-hinam na sila nga mosulod sa templo sa dili madugay! Ang ilang pagpamatuod nagtubo sa samang higayon sa gambalay [building].