Katooto n te Onimaki
Bob ao Lori Thurston
E beku n te Cambodia Phnom Penh Mition
“Ti kunea bwa ti weteaki bwa ti na nako ni beku n te Cambodia Phnom Penh Mition, ti tang. A rangi n ingainga nanora!” E taku te Tari Bob Thurston. “Ti na bon aki rineia n nako ni beku i Cambodia, ma tera te bwaintangira anne! Ai kakabwaiara ngaira!” E taku Titita Thurston.
Te taanga ae Thurston a namakina te reitaki ae okoro ma aomata i Cambodia. “Ti tangiriia ibukina bwa ngaiia bon natin te Atua,” E taku Titita Thurston. “Aomata i Cambodia a tia ni kaota nakoira te akoi ae korakora.”
Man taian katabeaki ae a tia ni karekea te Thurstons n aia mition, a kakawaki riki nakoia angiin te tai are a kawariia iai membwa ni mwengaia.
Titita Thurston e uringnga n taraia naake e buokiia i Cambodia ao n iango, “I aki kona n tataninga ni karokoa I nooriko n te maiu are imwiina, ngkanne N na kona n tuangko bwaai ni kabane aika I namakin ibukim ao te tangira ae iai irou ibukim.”
N aia moan ni mition, a reiakinna Bob ao Lori Thurston bwa te ibuobuoki ae uaana a kona n riki n aki tabe ma totoko n te taetae ao kaokoron katei ibukina bwa ngaira ni kabane bon natin te Atua.
Leslie Nilsson, te tia korotamnei
Bob:
Imwain are ti mareaki Ngai ao Lori, ti taetae ibukin karaoan te mition ngkana ti ritaea. Ti a tia ni uaia ni karaoa ara mition mai imwaina. Lori e beku i Kobe, Japan, ao Ngai i beku i Brisbane, Australia. Ngke ti a moana ara katauraoi n ritaea, ti tuangiia ara ataei bwa ti tangiria ni karaoi ara mition aika mwaiti.
Ti kakabwaiakaki bwa ti kona n ritaea ni kairakera. Ngke ti ongo bwa tabeman taanga ni mitinare aika tinia aikoa kona ni mwakuri n taabo tabeua n aron aaba aika rikirake ibukin kaangaanga n te aoraki ao tabeaianga riki tabeua, ti taku, “Ti tuai n roko ngkanne n 60. Ti marurung, ngaia kanakoira bwa ti na beku n taabo aikanne!”
I ritaea uoua te bong imwiin au ka ni 56 n ririki. Ni koauana ti karekea weteara n te mition ngke I mwakuri. Ngke ti kauka weteara ao ni kunea bwa ti weteaki bwa ti na beku n te Cambodia Phnom Penh Mition, ti tang. A ingainga nanora!
Lori:
Tiaki raoi Cambodia te tabo are ti iangoia bwa ti na nako ni beku iai. I taku bwa ti na nako Africa ke ia. Ti moanna n titirakiniira, “E raoiroi, tera bwaai aika kakukurei aika a tataningaira?” Ti na bon aki rineia n nako ni beku i Cambodia, ma ai kabwaiara ngaira! Bon te kakabwaia ae korakora! E rangin n timwaati riki te Uea nakoira. E kanakoira nakon te tabo ae ti kainnanoaki iai.
Ti mwakuri n te mition ibukin bwaai n ibuobuoki ibukiia aomata. Ti mwakuri iaon karikirake ibukin te LDS Charities, ti kanoai ara ribooti, ao ni bubuti ibukin karikirake aika boou. Ti tuoi naba karikirake n taai aika nako n aron mwanibwa n ran ake a tia ni kenaki uoua te ririki imwaina. Ti beku naba ni kawai riki tabeua.
Ti kaei maungatabu n te titeiki ao ni mwakoro n ibuobuoki n reireiniia taan kairiiri ao mitinare, ti tuoi aia tabo ni maeka mitinare ao ni kawariia membwa ni mweengaia. Ti karaoi bwaai aika mwaiti ni buoka te mition n te kawai ae nakoraoi ao ni mwakuri raoi.
E kaokoro ara mition ni katoabong. Boong ake tabeua ti mena n te tabo ae maekanaki ae tuai unikaki ao ni karako kaina, bubuaniwae a mena inanon te ran ae nano ke inanon bokaboka. Boong ake tabeua ti kabanei inanon te mition aobiti. Ma mitinare n te Bwaburiki Abeati, ti kawara te Bootaki ni Mwakuri ibukin te Taromauri ao Aaro. I Cambodia, te taeka ae “taromauri” bon tiaki te bwai ae buakaka. Te aro ae kinaaki bon Buddhism—bwaai riki ake tabeua a iangoaki bwa te taromauri. Ti kawara te Tabo ni Mwakuri ni buokia ni kabwarabwara bwa Ana Ekaretia Iesu Kristo ibukiia Aika Itiaki ni Boong aika Kaitira bon te bootaki ae tamaroa ao e kona n onimakinaki.
Ti karekea te reitaki ae tamaroa ma ngaia, ao a waekoa ni bubuti ibukin te buoka. A na wewete ao a na kangai, “Ti a iekaki, ao ti kainnanoa te amwarake ibukiia 200 utu ake a tia ni mwaing nako.” A ataia ae e kona ni buokiia te Ekaretia ni karekei bwaai nakon te tabo are e kainnanoaki ni waekoa ao ni karekeaki bwaai ake akea irouia.
Tera ae ti noria i Cambodia? Tera ae ko iangoia, ti a tia n rinanona! Ti a tia n tekateka iaon burooa aika moan te mangori—n tainako ti te bareka ke te bamboo—inanon mweenga aika moan te mangori. Ti a tia n roko ni mweengaia taan mwakuri n te tautaeka aika bubura ao n tikiraoi. Bob e a tibwa riki bwa kaain te beretitentii n te mwaanga.
Bob:
Te bereititenti n te mition e weteai ao e taku, “Ei, I tangiria bwa ko na riki bwa te kauoman ni kauntira n te mwaanga.” Teuana ma te iterana te ririki imwiina, I a mena inanon ruun te Hong Kong China Tembora ma te beretitenti n te mwaanga are I mwakuri ma ngaia. Ai tibwa ana moan n tai n rin n te tembora! Ngaia ma ana utu a tia ni kaikoa aia mwane ao ni kataia itiua te tai n rin inanon te tembora, ma e na iai te kabuanibwai, ke temanna e na aoraki. N tainako ao e na iai te bwai ae na riki are e na tuka nakoia nakon te tembora. Imwiin itiua te ririki, a tia ni karekea ti 40 te taaraa.
Teniua te tai n ara mition, ti a tia ni buokiia Aika Itiaki ni Boong aika Kaitira i Cambodia n nakon te tembora. Ti kairiia beretitenti n te mwaanga aika mwaiti aika a tia ni karaoi intawiu ibukin te beeba ni kariaia nakon te tembora ma a tuai n nakon te tembora. N tabetai i Cambodia, taanga ni mitinare aika tiinia a na buokiia utu aikai ngkai a nang mwananga nakon te tembora. A kainnanoa temanna ae na raoniia ibukina bwa aki ataa aron te mwananga iaon te wanikiba. A mwaiti naba aika tuai man toka iaon te bwati! Ao ngkai a nang kiba nako Hong Kong ao ni karaoa kawaia nakon te tembora. E kaangaanga karaoan aei bon irouia. Ti rangi ni kakaitau ibukinTe Mwane n Ibuobuoki Ibukin te Tembora e karekea aia tai n nakon te tembora.
Lori:
Te riki bwa kaain te Ekaretia i Cambodia e kona ni kaangaanga. Ni kabanea te aba, Cambodia e aki karinea te bong ae te Tabati. Ni kabane aomata ake a roko nakon te taromauri a na karaoi anga karea bwa a na roko ikekei.
Cambodia naba, bon onoua te batienti Muslim ao ti uoua te batienti Kiritian—nikiraia bon tenaan Buddhists. Te bitaki man te katei n Buddhist nakon te katei ni Kiritian e bon rangi ni kaangaanga. Tabeman aomata a teimatoa ni kabuai aia mwakuri, ao angiin te tai aki butimwaeaki irouia tabeman ake irarikiia.
Te kabwianibwai bon te boraraoi naba ae kakawaki. Mwaane aika Buddhist a na nakonako ni katoa ingabong ao ni bubuti te raiti ke tabeua te mwane, ao aomata a taneiai nakon anne. Ma kabonganakin mwakoron am bwakabwai ni kabwaka am kabwianibwai bon te boraraoi ae kakawaki.
A mwaiti aika a tokanikai iaon aia kaangaanga ni maiuia. Ibukin te Khmer Rouge, te tautaeka ni kominiti are tautaekana Cambodia ni kaniia tokin te ririki 1970, ni kabane ake a riaon 40 aia ririki iai aia karaki aika a kakamaaku. I aki kaitibo ma temanna are e aki rootaki iai. Aomata ni kabane iai aia utu aika a kamateaki. E ngae ngke a tia n rinanona, I aki kakoaua kanga aron korakoraia, e kanga nanoia ni kataia bwa bon ngaia. Ma irarikin waekoan okiran marurungiia, a mwaiti aika a teimatoa ni bwarannano. A mwaiti aika aki namakinna ae a kakawaki ke n akea bonganaia.
E kamimi noorana bwa e kanga ana euangkerio Iesu Kristo ni buokiia n rikirake i bon irouia. Ngke a ataia bwa aki ti kukurei ma bon natin naba te Atua, a na kangai, “Ko manikangare? Ngkai iai te bwai ae N na anga.”
E nang rikirake ngkai te Ekaretia i Cambodia. Aomata aika rangi ni kamiimi a tia ni kairaki nakon te Ekaretia. Aikai Itiaki ikekei bon tenaan bwaeoniia, ao naake a butimwaea te euangkerio a kakabwaiakaki ni kawai aika mwaiti ibukina bwa a ataa te Tia Kamaiu. E bon rangi ni kamiimi.
A rangi ni mwaiti membwa ao uoote aika matoatoa ni katobibia te tabo ae aranaki bwa “Trash Mountain,” are bon te tabo ae taunaki ae mataata nako are a maeka iai aomata. Membwa ikekei bon taan ananai ao taan rikoriko. A karekei aia mwane man te kaokimaange ae te buratitiki ao aramanim ake a rikoi man te tabo ni maange. A maeka n auti aika uarereke ake ti a tia ni kawari tabeua te tai.
Bob:
N te bong teuana ti ongo te katangitang ae tangimwaka, ao ti nooria bwa iai te auti te oning ae e a tia ni kateaki. I Cambodia, anne e kaotia bwa iai ae e na mare ke te aomata ae mate.
Lori:
Ti kunea bwa te tina ae niman ke onoman natina e a tibwa mate. Akea kainabana ikekei ae ti na taetae ma ngaia. A tibwa uti ataei ao a kunea bwa e a mate tinaia.
Temanna te nati te aine e tang n takarua. Rinanon te tia raitaeka, e taku, “Ngai te kabanea n ikawai. Aikai tariu ao mwaaneu. I aki ataia bwa tera ae N nang karaoia.”
I ti taua ni koonna ni baiu. E aera bwa N na aki? Te ataeinaine aei e a tibwa bua tinana. I taetae nakoina n te taetae n Ingiriti ao e taku, “I ataia ko aki ota n au taeka, ma I berita bwa ko na manga noora tinam. A na akea am kaangaanga. Ko na aki tiku n ti ngkoe.”
A mwaiti aekan kaangaanga aikai aika a tia n anganira te reitaki ae onoti ma aomata i Cambodia.
Ti namakina te tangira anne imwiina. Aomata i Cambodia a tia ni kaota nakoira te akoi ae korakora. Ti tangiriia ibukina bwa ngaiia bon natin te Atua. Ngaiia bon tarira ao mwaanera.
Ma tabeman aomata, I uringa n iango, “I aki kona n tataninga ni karokoa I nooriko n te maiu are imwiina, ngkanne N na tuangko bwaai ni kabane aika I namakin ibukim ao te tangira ae iai irou ibukim, ao tera ae I tangiria ibukim, ibukina bwa I aki kona n taekinna ngkai.”
E a tia ara mition ni kakabwaiaira ni kawai aika mwaiti. Tabeman aomata a taku, “I aki ataia ngkana I kona ni karaoa au mition. I aki kona ni kitaniia tibu aika uarereke.” Iai tibura mwaane aika niman mwaitiia ngke ti kitaniia, ririki aika nimaua, aua, teniua, uoua, teuana. Uoman tibura aine ake a bungiaki ngke ti a nako. N nang kawakin uoua au taeki n arau ni mitinare i Cambodia ao n anganiia tibu aine bwa aonga n ataia ae e aki mena ni mweengana Tibuia te Aine ibukina bwa Tibuia te Aine e karaoa te bwai ae tangiria te Uea bwa e na karaoia.
Bob:
A mwaiti kawai aika ko kona iai ni beku ibukin te Uea n aroia mitinare. Ti kakoaua raoi bwa e taetae Unimwaane Jeffrey R. Holland ibukin te mwakuri n ibuobuoki ibukin te tinia mitinare. E taku, “I berita bwa ko na karaoi bwaai ibukin [am utu] n te mwakuri n taromauria te Uea bwa, n aonaaba aika akea tokiia, ko aki kona ni karaoia ngkana ko tiku ni mweengam ni kabanea am tai ae bati ma ngaiia. Tera bwaintituaraoi ae a kona n anga tiibumwaane nakoia aia kariki nakon are te taetae n te mwakuri n raonaki ma te taeka, “N te utu aei ti karaoi mition!’ [“We Are All Enlisted,” Liahona, Nob. 2011, 46.]”