Onimakina ana Kamaiu te Tia Kamaiu
Iroun Beretitenti Henry B. Eyring
Kauoman ni Kauntira n te Moan Beretitentii
Man te taetae n te botaki n taromauri ae, “The Power of Deliverance,” are e karaoaki i Brigham Young University n Tianuare 15, 2008.
Ana Mwakuri ni Kamaiu te Tia Kamaiu ma Mangautina e anganna te mwaaka bwa e na kakorakoraia n ara tai ni kataaki ke ni kainaomataira mai iai.
TAMNEI MAN IBUKIN TE KANTANINGA AIO, IROUN YOUNGSUNG KIM, ANA ANGANANO HAVEN LIGHT
Nakoia naake a tia ni bua kaain aia utu aika a tangiria, te maiu are imwin te maiu aei e kona ni kananokawaki man aki kakukurei—riki nakoia naake akea irouia te ataibwai ao te koaua n ana Mwakuri ni Kamaiu ao Maungautin Te Tia Kamaiu Iesu Kristo. Ko uringia ana reirei Iesu ake a kakewekewe n te kawai nako Emmauti. Te Uea are e a tia n uti e kania man titiraki bwa bukin tera ngkai a nanokawaki. E anga te kaeka Ruka:
“Ao uakekei a kangai nakoina, Aika aron Iesu are te I-Natareta, are te burabeti are mwaaka ni mwakuri ma n taetae i matan te Atua ma aomata ni kabaneia:
“Ao ibonga ake a kakanato ma ara taan tautaeka a anga Teuarei bwa e na motikaki taekana n tiringaki, ao a kamatea n te kaibangaki.
“Ao ngaira ti taku bwa boni Ngaia are nang kamaiuia Iteraera” (Ruka 24:19–21).
Ti karekea te rau man ara ataibwai ao ara koaua bwa boni Ngaia are e kamaiuia Iteraera. Bwa boni Ngaia are E “[motiki] ana kabaebae te mate” (Motiaea 15:23). Bwa boni Ngaia are e riki bwa te “te maon ua ibuakoia aika matu” (1 I-Korinto 15:20). Bwa boni ngaia are e kakoroi nanon berita ake n te tembora ake a kabaeira ma naake “ti tangiria mangkekei n ua ngkai, ao ake a tibwa kitanira!”1
N tain te Itita aei, I tangiria n tibwa mwakoron te rongorongo man te bootaki n taromauri are I anga tabeua te ririki n nako iaon mwaakan te Tia Kamaiu ni kamaiuira. I kakorakoraki ngke I katauraoia ao ngke I anga te rongorongo aei. I tataro bwa e na kakorakorai ngkami n ami tai ni warekia.
E roko te mate irouia tabeman n taai aika aki kantaningaki ao e na bon roko nakoira ni kabane. Ngaira n tatabemanira ti na kataki man maten temanna are ti tangiria.
Tabeua te bong n nako ao I kaitibo ma temanna te mwaane are e toki norana iroun imwin maten kainnabana. E a reke ara tai ni kaitibo n tain te motirawa ae kakukurei. E wingare ngke e kainetai. Ngke I uringnga are e a tia ni motirawa kainabana, I karaua raoi n taekina te kamauri are e bwabwainaki: “Ko uara ngkai?”
E bua te wingare are irouna, a ranran matana, ao e kaeka ni karaurau, ma nanona raoi, “I marurung. Ma e rangi ni matoatoa.”
E bon rangi ni matoatoa, n aron are e ataki irouia angina mairoura ao e na ataaki teuana te tai iroura ni kabane. Matoatoan raoi te kakatai anne bon karekean te ataibwai bwa ai tera ae ko nang karaoia ma te nanokawaki imwin buan temanna, ma te ururing, ao te aki kukurei are ti kona n namakinna ni buan temnna are ti rangi n tangiria. Te nanokawaki ae bati e kona n reitinako n ai aron te maraki ae reitinako. Ao irouia tabemwang, tao iai irouia namakinan te un ke namakinan te aki momotiraoi.
Te Tia Kamaiu E Atai Nanokawakira aika Korakora
Ana Mwakuri ni Kamaiu ma Maungautina e anganna te mwaaka bwa e na kainaomataira ma te kakatai anne. Rinanon baike E rinanona, E atai ni kabane nanokawakira. E kona n atai man ana kairiri te Tamnei, Ma E rineia bwa e na rinanon maiuna ibon irouna. Aio te rongorongo anne:
“Ao nooria, e na bungiaki iroun Maria, i Ierutarem are abaia ara bakatibu, are te kibono, te bwai ni mwakuri ae kakawaki man rineaki, are e na rabunaki ma ni kariki ni mwaakan te Tamnei ae raoiroi, ao e na karika natina, eng, ae natin te Atua.
“Ao e na waaki, n rinanon te kainnano ni maraki ma te karawawataki ao te kaririaki n aekaia nako; ao aio bwa e na kakoroaki te taeka are e taku bwa e na uota iaona marakiia ao aorakiia ana aomata.
“Ao e na uota iaona te mate, bwa e aonga ni kabwara ana kabaebae te mate are e kabaeiia ana aomata; ao e na uota iaona mamaaraia, bwa e na on nanoia n te nanoanga ni kaineti ma te maiu n iriko, bwa e na ataia ni kaineti ma te maiu n iriko bwa e na kanga ni buokiia ana aomata ni kaineti ma mamaaraia.” (Alma 7:10–12).
TAMNEI MAN TE TIBU AE BUA, IROUN YONGSUNG KIM, ANA ANGANANO HAVEN LIGHT
Aomata aika a raoiroi aika a mena irarikim a kona n ota n nanokawakim ni buan temanna ae ko tangiria. A reita te nanokawaki are ko namakinna. Te Tia Kamaiu e aki ti ota ma e namakina naba te nanokawaki are iroum are bon ti ngkoe ae ko namakinna. Ao E kororaoi kinakim irouna. E ataa nanom.
Kaoa te Tamnei ae Raoiroi
Te Tia Kamaiu e kona n ataia bwa tera ae ko kona ni karaoia man baike ko kona ni karaoi are te kabanea n tamaroa ibukim n te tai are ko kaoa iai te Tamnei ae Raoiroi bwa e na anganiko te rau ma ni kakabwaiako. E ataia bwa tera te kabanea n tamaroa ibukim bwa ko na karaoia. N tabetai bon te tataro. N tabetai kabebetean temanna. I kina temanna te aine ae a tia ni mate buna are iai aorakina ae kona ni karika te mwauku are e namakinna bwa e na kawara temanna te aine ae e a tia naba ni mate buna. I aki mena irarikia, ma I ataia n akea au nanokokoraki bwa te Uea e kaira temanna ana reirei ae kakaonimaki bwa e na tabeakina raona temanna ao n anne are e buokia iai ni kauoman.
A mwaiti kawai are e kona iai te Tia Kamaiu ni buokia naake a nanokawaki, ni kaineti ma kainnanoia. Ma ko na bon aki nanokokoraki bwa E kona ao e na bon karaoi baikanne n te kawai ae te kabanea n te tamaroa ibukia naake a maraki ao naake irarikia. Te bwai ae aki bitaki n te tai are te Atua e kamaiuia aomata man te nanokawaki bon namakina te nanorinano i matana n airon te teei. Te katoto ae tamaroa ni mwaakan te nanorinano e reke man maiun Iobi (taraa Iobi 1:20–22). Teuana riki te bwai ae aki bitaki, are iai naba iroun Iobi, bon te onimaki ae nene ni mwaakan mangautin te Tia Kamaiu. (taraa Iobi 19:26).
Ti na bane ni maungauti, ni ikotaki ma naake ti tangiria ake a tia ni mate. Te manga kaitiboaki ma ngaia tiaki n te tamnei ma n te rabwata ae aki kona ni mate ke ni kara ke n rootaki n te aoraki.
Ngke e kaoti te Tia Kamaiu nakoia Ana Abotoro imwin Mangautina, E aki ti kakorakoraia n nanokawakia ma e kakorakoraira naba ngaira ni kabane ake ti na namakina te nanokawaki. E kakorakoraia ma ni kakorakoraira n aei:
“E mena te rau iroumi. …
“Kam na tarai baiu ma waeu, bwa boni Ngai: kam na ringai, ao tarai; bwa akea irikon te tamnei ao rina, n ai aron aika kam nori irou ngkai” (Ruka 24:36, 39).
Te uea e kona ni kaungaira bwa ti na ukora mwaakan te kainaomataki man nanokawakira ni kawai ake a na rangi ni ibuobuoki nakoira. Ti kona n rineia bwa ti na beku ibukia tabemwang ibukin te Uea. Ti kona ni kaota ara koaua iroun te Tia Kamaiu, n Ana euangkerio, ni kaokan Ana Ekaretia, ao ni Mangautina. Ti kona ni kawakin Ana tua nako.
Ni kabane rinerine akanne a na kaoa te Tamnei ae Raoiroi. Bon te Tamnei ae Raoiroi are e kona n anganira te rau ni kaineti ma kainnanora. Ao man ana kairiri te Tamnei, ti kona ni karekea ara koaua n te Mangauti ao te taratara ae itiaki n te manga kaitiboaki ae mimitong ae imwaira. I namakina te rau anne ngke I taraa atibun ruanimaten temanna ae I kinaa—temanna ae I ataia bwa I kona n taua i baiu n taai aika a na roko. N te atatai anne, I aki ti kainaomataki man te nanokawaki ma I onrake naba n te ingainga.
Ngke arona bwa e ikawai te teei anne, e na manga kainnanoa te kainaomata ma kakaitai aika a kaokoro. Tao e na kataaki bwa e na kakaonimaki nakon te Atua ribuakon kakatai n te rabwata ma te tamnei ake a kaoti nakoia aomata ni kabane. E ngae ngke te rabwata bon te karikibwai ae tamaroa, kateimatoana bon te kakatai are e kataira ngaira ni kabane. Aomata ni kabane a na bon bane n ribuakon te aoraki ao korakoran te kairikaki.
“Ko na Nanorinano”
Mwaakan te kainaomataki man katakira e a tia ni kateaki ao e tauraoi. E mwakuri naba aei n te kainaomataki man te kakatai are e roko man maten temanna ae tangiraki. N ai aron te kainaomataki are tiaki n tainako bwa e na maiu temanna, te kainaomataki man kakatai ake tabeua bon aki kanakoaia. E kona te Uea n aki anga te rau ni karokoa te tai are ti karikirakea iai te onimaki bwa ti na karaoi rinerine aika a na uota mwaakan te Mwakuri ni Kamaiu bwa e na mwakuri ni maiura. E aki karaoa aei ibukina bwa e aki tabeakinira ma ibukin ana tangira ibukira.
Te kairi ibukin karekean mwaakan te uea ni kamaiu man kakaitara n te maiu e reke iroun Thomas B.Marsh, are bon te Beretitenti n te Kooram n te Tengaun ma Uoman. E kataki n ae korakora, ao E ataia te Uea bwa e na mwaiti riki katakina. Aio bon te reirei nakoina are N na anaia ibukiu ao n angani ngkami: “Ko na nanorinano; ao te Uea ae Atuam e na kairiko ni baina, ao n anganiko kaekaan am tataro” (Reirei ao Berita aika Tabu 112:10).
TAMNEI MAN UEAN TE TATARO, ANA ANGANANO HAVEN LIGHT
Te Uea n tainako e tangiria ni kairira nakon te kainaomataki n te tai are ti karaoa ae raoiroi. Anne e kainnanoa te rairannano. Ao anne e raonaki n te nanorinano. Akea te nanokokoraki bwa te kawai nakon te kainaomataki e kainnanoa te nanorinano n tainako bwa e aonga te Uea ni kona ni kairira ni baina nakon taabo ike E tangiria bwa e na uotira rinanon ara kaangaanga ao nakon te katabuaki.
Kakatai a kona ni karekea te un ma bwarannano. Te nanorinano are ti kainnanoia bwa e aonga te Uea ni karira ni baina e roko man te onimaki. E roko man te onimaki bwa e maiu te Atua, bwa E tangirira, ao bwa baike E tangiri—e ngae ngke a mamatoa—n tainako bon baika a tamaroa ibukira.
Te Tia Kamaiu e kaota nakoira te nanorinano anne. Ko a tia ni wareka arona ngke E tataro n te Onaroka are Ketetemwane ngke E maraki man te kakatai ibukira are e riaon ara kona n ota ke n rinanona, ke ibukiu bwa N na kabwarabwaraa. Ko uringa Ana tataro: “Tamau, ngkana e riai i Roum, ao ko na uota nako te mangko aei mai Rou: ma akea au taeka, ma e na, tauaki am taeka.” (Ruka 22:42).
E ataia man onimakina Tamana are i Karawa, Eroim ae kakannato. E ataia bwa Tamana e korakora ao akea tokin ana akoi. Te Nati ae Tangiraki e bubuti n taeka aika nanorinano—n aron te teei ae uarereke—mwaakan te kainaomataki bwa e na buokaki.
Kaungai mani Kabebetei Nanomi
Te Tama e aki kainaomata te Nati man kanakoan te kakatai. Ibukira ao E aki karaoa anne, ma E kariaia bwa te Tia Kamaiu e na kabanea ana mition are E roko bwa e na karaoia. Ma ti kona ni karekea te unganano ao te rau n te ibuobuoki are e katauraoia te Tama:
“Ao e kaoti te anera mai karawa nakoina, ni kakorakora.
“Ao e bati n rawawata nanona ao E kakorakora ana tataro: ao maonona ai aron timtim n raraa aika bubura, aika bwaka i aontano.
“Ao ngke E teirake man ana tataro, ao E roko irouia ana reirei, ao E noria bwa a matu n nanokawaki,
“Ao e taku nakoia, Kam aera ngkai kam matu? teirake ao tataro, bwa kam na aki rin n te kaririaki (Ruka 22:43–46).
Te Tia Kamaiu e tataro ibukin te kainaomataki. Are E anganaki bon tiaki kanakoan te kakatai ma te kakorakora bwa e na tokanikai iaona ma te mimitong.
Ana tua nakoia Ana Abotoro, ake a bon kataaki naba, bon te kairi ibukira. Ti kona ni motikia bwa ti na iria. Ti kona ni motikia bwa ti na teirake ao n tataro ma te onimaki ao te nanorinano ae korakora. Ao ti kona n ira naba ana wewete are n ana boki Mareko: “Tei rake, ti a nako” (Mareko 14:42).
Man aei, e a reke reireiam ibukin te tokanikai iaon ana kakatai te maiu aei n te aro n rabwata ao n tamnei. Ko na kainnanoa ana ibuobuoki te Atua imwin karaoan am kabanea ni kona ibon ibukim. Ngaia are teirake ao nako, ma karekea moa Ana ibuobuoki, n ae tawe n are kona, n aki tataninga te kaangaanga bwa e na wewetea te kainaomataki.
I kaota au koaua mai nanou bwa E maiu te Atua te Tama ao e tangirira. I ataa anne. E kororaoi Ana babaire ni kakukurei, ao bon te babaire ibukin te kukurei. E a tia ni mangauti Iesu Kristo, ai uana ma ngaira imwin te mate. E maraki bwa E aongo ni kona ni buokira n katakira nako. E mate ibukin ara bure ao aia bure ni kabane natin Tamara are i Karawa bwa ti aonga ni kainaomataki man te mate ao te bure.
I ataia bwa n ana Ekaretia Iesu Kristo, te Tamnei ae Raoiroi e kona n roko ni anganira te rau ao ni kaitiakira ngkai ti iriria te Matita. Ko bia karekea Ana rau ao ana ibuobuoki n taai ni kainnano, rinanon ni kabane kakatai ma kaangaanga ni maium.