Taem Tingting I Slak, Tingbaot Wido blong Naen
Taem yumi filim se man i fogetem yumi, o i no luk yumi, yumi mas tingbaot: Jisas i bin go helpem wido ia long stret taem we hem i gat nid, mo bambae Hem i kam long yumi tu.
Samtaem, long ol taem blong laef we ol samting oli gud o nogud, yumi save filim olsem se God i no wok strong long evri dei laef blong yumi. Wanem i hapen insaed long laef blong yumi i no laef mo i no gat samting intresting long hem. I no gat tumas jenis, mo samtaem, i had blong go from wan samting taem God i kam insaed mo i jenisim situesen blong yumi. Taem mi gat ol filing ia, se ol samting i no gud tumas long laef blong mi, plante taem mi tingting long wan woman ia insaed long Niu Testeman, we i bin filim olsem tu. Insaed long ol skripja, oli no talem nem blong hem, be oli save hem nomo folem nem blong vilej blong hem, mo situesen blong mared laef blong hem.
Woman ia, hem i wido blong Naen, mo ivanjelis ia nomo, Luk, i raetemdaon gudfala stori blong hem. Long mi, hem i ripresentem stamba blong seves blong Sevya, mo wei we hem i go helpem olgeta we tingting blong olgeta i slak, mo ol pipol olbaot insaed long Sosaeti blong Hem. Stori ia i sotemaot klia poen ia se, God i save yumi mo i kea abaot yumi o nogat.
Blong talem sot merikel ia long Luk, japta 7, hem i soem Jisas we i stopem wan seremoni blong ded, mo i mekem wan merikel taem hem i mekem wan yang man we i ded, i kambak long laef. Be i gat plante moa samting biaen long taem ia. Semmak olsem wetem evri merikel, be speseli merikel ia, yumi mas save gud situesen long tetaem ia blong save andastanem wanem i bin hapen. Mi mi bin tij long Brigham Yang Yunivesiti Jerusalem Senta, mo bae mi serem sam tingting we i blong miwan abaot merikel ia.
Naen i wan smol vilej we oli stap mekem garen long hem long taem blong Jisas; hem i saed long Hil More, we i stap laen, long Is saed blong Jesrel Vale. Taon, hem i stap hemwan. Blong go long taon ia, i gat wan rod nomo we i pas i go long ples ia. Long taem blong Jisas, taon ia, bae oli tekem se hem i wan smol taon mo i pua, mo i stap nomo olsem kasem tedei. Long sam taem, long histri blong hem, taon ia i gat 34 hom mo samples 189 pipol.1 Tedei, i gat 1,500 man i stap laef long ples ia.
Luk, taem i stat blong talem stori ia, i talem se Jisas i stap long Kapaneam long dei bifo Hem i bin hilim soldia blong Ol Man Rom (luk long Luk 7:1–10). Afta, yumi lanem se “[dei afta]” (ves 11; oli ademap italik), Sevya i bin go long wan taon we oli singaotem Naen; Hem i go wetem wan bigfala grup blong ol disaepol. Pat ia i impoten tumas. Kapaneam i stap long Not pat blong Solwota blong Galili, 183 meta andanit long level blong solwota. Naen i stap samples 48 kilometa Saot Wes blong Kapaneam, we i samples 213 meta antap long level blong solwota, bae i nidim blong man i klaem strong i go antap long bigfala hil ia i go kasem Naen. Blong save wokbaot stat long Kapaneam i go kasem Naen, bae i save tekem wan o tu dei olsem. I no longtaem i pas, i tekem 10 aoa blong wan grup blong ol yangfala blong BYY Jerusalem Senta blong wokbaot folem wei ia long gudfala rod. Hemia i minim se Jisas i mas girap eli moning evriwan, o i wokbaot long naet blong kasem seremoni blong berem man ia “long dei afta.”2
Taem Kraes i stap kam kolosap long taon ia afta wan longfala wokbaot we i had, oli stap tekem wan yang man we maet i gat 20 yia olsem,3 we oli stap tekem hem antap long wan timba blong ded. Luk i talem se yangfala man ia, hem i wan boe ia nomo blong wan wido, mo sam man blong stadi oli talem se mining blong toktok long lanwis Gris, i minim se hem i no gat wan narafala pikinini moa.4 Wan bigfala grup blong ol man long vilej oli bin stap wetem wido ia long bigfala trabol taem blong famli.
I tru. Blong wan boe i ded, bae i wan nogud trabol blong eniwan, be luklukgud long wanem i minim long wido ia. ?Bae i minim wanem, long sosol saed, long saed blong spirit, long saed blong mane blong kam wan wido we i no gat wan blong karem ol samting blong hem, long taem blong Isrel bifo? Long kalja blong OlTesteman, oli bin biliv se taem hasban i ded bifo hem i kam olfala, hemia i wan saen blong jajmen blong God from sin blong man ia. From hemia, sam oli bin biliv se God i stap givim panismen long wido ia we i laef i stap. Insaed long buk blong Rut, taem Nomi i kam wido taem hem i no olfala yet, hem i talem: “I nogud yufala i stap singaot mi se ‘Nomi’, from we hem i tanem baksaed finis long mi, i mekem we bigfala trabol i kasem mi.” (Rut 1:21, Intanasonol Standet Vesen).5
Wido ia blong Naen i bin harem i soa long saed blong spirit mo long saed blong filing, be tu, hem i stap fesem hadtaem long mane—i go kasem we bae hem i save ded hanggri nomo.6 Long mared, oli bin stap givim wan woman i go long famli blong hasban blong hem i gat proteksen long saed blong mane. Sapos hasban i ded, nao wok ia i stap long solda blong boe blong hem we hem i bonem. Naoia we raet blong wido ia mo wan boe blong hem nomo ia i ded, wido ia i stap we i nomo gat wan mane i stap. Sapos boe blong hem i gat samples 20 yia, nao bae hem, hem i medel yia woman, we i laef long wan smol taon blong ol fama we i stap hemwan, mo naoia, hem i stap we hem i nomo gat samting long saed blong spirit, sosol, mo faenens.
Long stret mo smol taem ia, we ol man blong vilej oli stap tekem bodi blong boe blong woman ia i go blong oli berem hem, Jisas i kasem olgeta mo i “sore tumas long hem” (Luk 7:13). Ating, Luk i raetem toktok ia, we toktok ia i no naf blong tokbaot wanem Jisas i filim. Jisas i filim prapa nogud trabol taem ia blong wido ia. Maet wido ia i ledaon long graon floa blong haos blong hem, i stap plis long Papa long Heven, blong save se from wanem i olsem. Maet woman ia i askem kwestin long pablik se from wanem God i wantem hem blong i laef i go moa long wol ia. O maet hem i fraet tumas we bae hem i stap hemwan i stap. Yumi no save. Be yumi save nomo se Sevya i jusum blong aot long Kapaneam kwiktaem, we hemia i minim se maet Hem i wokbaot ful naet blong save kasem grup we i go berem ded bodi bifo oli haedem bodi ia long graon.
Yes, taem Jisas i luk fes blong woman ia we i fulap long krae, mo i stap wokbaot biaen long grup blong ol man, Hem i bin filim bigfala lav mo sore long woman ia—be i luk se lav mo sore blong Hem, i kam long ol filing we Hem i bin fesem finis longtaem bifo Hem i jes “hapen” blong kasem grup we i stap go long ded ia. Hem i kasem ples ia long stret taem we woman ia i gat nid.
Jisas i talem long wido ia, blong i “no krae” (ves 13.) Hem i no fraet long kastom fasin blong ol ded, nao Hem i “tajem bed,” mo “ol man oli stop.” Nao Hem i talem: “!Yang man! !Mi mi talem long yu, yu girap!”
“Nao dedman ya i girap, i sidaon, mo i stat toktok. Nao Jisas i tekem boe ya, i givim i gobak long mama blong hem” (ol ves 14–15). Olsem oltaem, grup blong ol man blong vilej mo olgeta we oli bin folem Jisas, oli sek, mo harem nogud blong olgeta i tanem i kam glad we i klin evriwan. Evriwan “i stap leftemap nem blong God, oli talem se, ‘Wan profet we i hae we i hae i kamtru finis long yumi’” (ves 16). Be merikel ia, i stap tokbaot tu fasin blong stap sevem wan sol we i harem nogud tumas. Jisas i bin savegud se wan samting i rong long woman ia—wan we, long kalja blong olgeta, oli stap lukdaon long hem. Situesen blong woman ia i askem Jisas blong i lukluk kwik long hem, iven sapos hem i mas travel i go longwe blong Hem i stap long stret taem. Hem i bin save se situesen blong wido ia, i prapa nogud, mo Hem i hariap i go. Presiden Thomas S. Monson (1927–2018) i tokbaot wan trutok we yumi no save tanem baksaed long hem: “wan dei, taem bae yumi lukbak long ol smol taem we oli jes hapen olsem nomo insaed long laef blong yumi, bambae yumi luksave se, oli no jes hapen olsem nomo.”7
Nao, taem ia i save leftemap tingting, be hem i moa bitim wan naes storian insaed long Baebol. Hem i talem stret se, i no gat mistek, be Jisas i bin save abaot wido ia we i pua, we oli fogetem hem, mo i nomo gat samting. Speseli taem yumi filim se man i fogetem yumi, o i no luk yumi, yumi mas tingbaot: Jisas i bin go helpem wido ia long stret taem we hem i gat nid, mo bambae Hem i kam long yumi tu. Antap long hemia, yumi save karem wan seken lesen aot long eksampol blong Sevya, we hem i blong go aot blong blesem olgeta narafala man raon long yufala. Insaed long ol fren blong yu, plante bambae oli gat wan slak tingting wanwan taem. Sapos yu save tokbaot “Sista Naen” mo olsem wanem Lod i bin save stret se bae tingting blong hem i slak, mo bae i gotru long hadtaem, hemia bae i mekem bigfala jenis i hapen. Tingbaot bigfala tingting blong Presiden Spencer W. Kimball (1895–1985): “God i luksave yumi, mo Hem i stap lukaot long yumi. Be, plante taem, hem i tru long ol narafala man nao we hem i ansarem ol nid blong yumi.”8
Aot long evri merikel blong Jisas long taem blong Hem long wol ia, long mi, i gat sam oli naes mo i soemaot lav mo sore olsem taem we Hem i bin givhan long wido blong Naen. Hem i soemaot se yumi impoten long Hem, mo bambae Hem i neva fogetem yumi. Yumi no save fogetem hemia.