Wan Invitesen blong Rikardo
Martin Apolo Cordova
Paraná, Brasil
Pikja i kam long Katy Dockrill
Taem mi harem se i gat wan aktiviti blong Jos, oltaem mi stap invaetem 10 pipol we oli no memba blong Jos blong oli kam. Mi mekem hemia blong plante yia. Mi mekem ol invitesen mo putum invitesen long wan waet envlop mo prea blong Spirit i lidim mi. Afta, mi pasem ol invitesen i go. Evri 10 ia oli no kam oltaem, be sapos i gat wan i kam, mi filim se mi gat sakses.
Sam yia i pas, mi bin rere long ten invitesen blong kam long wan faeasaed blong ol mared kapol. Mi givim naen invitesen long ol pipol long wok, mo mi gat wan i stap. Mi no save huia blong givim i go long hem. Sam minit afta, Rikardo, wan we i stap salem ol samting, i pas long fored blong tebol blong mi. Mi filim blong invaetem hem, nomata we hem i bin talem no finis long wan nara fren we i bin invaetem hem long jos blong hem. Mi no ting se Rikardo bae i gat intres.
Taem Rikardo i pas long fored blong tebol blong mi bakegen taem hem i stap go aot, mi filim blong askem hem bakegen. Be, hem i aot kwiktaem mekem mi no gat janis blong toktok long hem. Mi prea se bae Rikardo i kambak bakegen sapos i tru se mi mas givim invitesen ia long hem.
Afta we mi finis blong prea, Rikardo i kambak blong askem wan kwestin long mi. Afta long hemia, mi talem: “Rikardo, Jos blong mi i gat wan aktiviti blong ol mared kapol. Bae mifala i serem ol eksperiens abaot hao blong laef hapi evri dei. Afta hemia i gat wan smol danis. Sapos mi invaetem yu, ?bambae yu kam?
“!Yes, i oraet nomo!” Rikardo i talem. Be ansa blong hem i no winim tingting blong mi.
Nao mi tingting: “Mi mekem pat blong mi.”
Waef blong mi mo mi i go eli long aktiviti blong welkamem ol pipol taem oli stap kam. Nao, mi luk Rikardo wetem waef blong hem, Rejina. Mi presentem tufala long waef blong mi mo ol narawan we oli bin kam. Ful naet, i luk olsem Rikardo mo Rejina, tufala i stap gat wan gud taem. Mi bin sapraes taem tufala i talem se bae oli kam long jos long Sandei blong lanem moa.
Rikardo, Rejina mo tufala pikinini blong tufala oli bin lanem moa. Long en, tufala i joenem Jos. Afta long hemia, tufala i bin sil long tempol. Wan taem, Rikardo i bin talem long mi se hem mo waef blong hem i bin stap tokbaot divos, be afta, Lod i bin lidim Rikardo i go long ofis blong mi.
Stat long taem ia, mi bin askem God blong i fogivim mi, from we mi bin tingting se Rikardo bae i no wantem akseptem invitesen blong mi. Mi bin lanem se hem i impoten blong invaetem evriwan. Yumi neva save se huia bae i akseptem.