Usa ka Sulat gikan sa usa ka Apostol

Mga kaigsoonan, ayaw gayud kalimot nga adunay duha ka impluwensya sa uniberso: ang usa nagdapit kanato sa pagpili sa matarung ug sa pagsinati sa mahangturong kalipay ug kamaya, ug ang lain nagdapit kanato sa pagpili sa kaatbang sa matarung, nga nagdala og kagul-anan ug pagmahay. Ang atong doktrina nagtudlo kanato nga ang kinabuhi usa ka pagsulay—usa ka panahon aron makita unsa nga pagdapit ang atong dawaton.

Pahinumduman ko kamo sa panagna ni Jesus kabahin sa katapusang mga adlaw nga atong gipuy-an karon: “Kay motungha ang mga mini nga Kristo ug mga mini nga propeta ug magapakitag dagkung mga ilhanan ug mga katingalahan aron sa pagpahisalaag, kon mahimo, bisan pa sa mga pinili” (Mateo 24:24). Maguol kita kon makasaksi kita sa pipila sa “mga pinili” nga nalingla, sama sa gipasidaan ni Jesus.

Imahe

trees

Bag-ohay lang mibisita ko sa usa ka gamay nga kakahoyan sa mga sequoia nga gitanom daghang katuigan na ang milabay sa campus sa Brigham Young University. Usa ka higala mipasabut kanako nga ang mga sequoia mao ang pinakadako nga mga kahoy sa kalibutan ug mahimo silang motubo sa gitas-on nga 286 pye (87 m) nga pinasagdan. Mabuhi sila og sobra sa 3,000 ka tuig.

Usa sa mga kahoy namatay ug kinahanglang putlon, nga nagbilin lamang og tuod nga mopahinumdom ni bisan kinsa nga molabay nga usa ka taas, halangdon nga kahoy kaniadto nagbarug didto. Ang espesyalista sa mga tanom [arborist] sa campus gusto nga masayud unsa ang nakapatay sa kahoy, tungod kay klaro nga ang sequoia wala mamatay sa katigulangon. Human sa pagsusi, iyang natino nga ang makaamuma nga mga gamut sa kahoy namatay gumikan sa kakulang sa tubig.

Sa unsang paagi kini nahitabo nga ang kahoy naglambo man didto sa sobra lima ka dekada? Nakadiskubre ang espesyalista sa mga tanom nga ang aquifer [napundong tubig sa ilawom sa yuta] nabalhin isip wala tuyoa nga sangputanan sa pagtukod og bag-o nga gambalay, sa silangan lang gyud sa kakahoyan.

Alang kanako usa kini ka hingpit nga analohiya mahitungod sa unsay mahitabo kon ang lig-on nga mga miyembro sa Simbahan—ang “mga pinili,” kadtong kinsa makita nga daw lig-on diha sa pagtuo—mamatay sa espirituhanong paagi.

Sama sa patay nga sequoia, kini nga mga miyembro sa Simbahan kaniadto nakadawat sa ilang espiritwal nga pag-amuma gikan sa atabay sa buhi nga tubig nga gitanyag ni Jesukristo. Apan tungod sa lain-laing mga rason, napalayo sila gikan sa tinubdan sa espirituhanong pag-amuma, ug kon wala kana nga pag-amuma ang ilang espiritu naluya, ug sila sa katapusan namatay sa espirituhanong paagi.

Unsaon nato pagsiguro nga ang atong espirituhanon nga pang-alima nga mga gamot konektado kanunay sa atabay sa buhi nga tubig?

Ang Ginoo milatid og yano, personal nga mga gawi nga magpabilin kanato nga lig-ong natukod, saktong nakasabut, ug konektado Kaniya. Ang ingon nga mga gawi, kon buhaton sa hingpit nga tumong sa kasingkasing, tinuod nga katuyoan, ug sa walay pagpakaaron-ingnon ug pagpanglimbong, nagtugot kanato nga mahimong dili matarug nga mga disipulo ni Ginoong Jesukristo.

Kining mahinungdanon nga mga gawi naglakip sa mga butang nga daw dali kaayong mataligam-an tungod sa kadaghang buluhaton sa atong kinabuhi, bisan kon kita okupado sa maayo nga mga butang sama sa pagtinguha og edukasyon, pagtrabaho aron sa pagsuporta sa pamilya, ug paglakip sa atong kaugalingon diha sa pagserbisyo sa komunidad ug sa Simbahan.

Naglakip kini sa sinserong inadlaw nga pag-ampo, tinuorayng pagpuasa, regular nga pagtuon ug pamalandong sa kasulatan ug sa mga pulong sa buhing mga propeta, paghimo sa adlawng Igpapahulay nga kahimut-an, pag-ambit sa sakramento uban sa pagpaubos ug paghinumdom kanunay sa Manluluwas, pagsimba diha sa templo kanunay kon mahimo, ug, sa katapusan, pagtabang sa mga kabus ug nanagsubo—kadtong anaa sa duol ug sa tibuok kalibutan.

Kon ang usa ka tawo mohunong sa paghimo niining yano apan importanting mga butang, ilang gipalayo ang ilang kaugalingon gikan sa atabay sa buhi nga tubig ug gitugutan si Satanas sa paglibug sa ilang panghunahuna pinaagi sa iyang walay klaro nga mga ideya, nga mobabag sa kaugatan sa pagkamatinud-anon ug mopaluya sa espiritu pinaagi sa peke nga nutrisyon. Ang sala ug kahasol sa tanlag makapalibug sa hunahuna—nga moresulta sa daghan sa paglimud sa nangaging inspirasyon ug pagpadayag ug mosangput sa pagkawagtang sa pagpamatuod sa mga kamatuoran sa ebanghelyo ni Jesukristo.

Usa ka butang nga anaa kanunay sa akong hunahuna mao ang pagkasayud nga ang mga indibidwal kinsa wala magpabilin nga nakatutok sa yanong doktrina ug ebanghelyo ni Jesukristo sa katapusan maminaw sa mini nga mga magtutudlo ug nangangkon nga mga propeta ug motuo sa kalibutanong mga pilosopiya. Kining alternatibo nga mga tingog naglakip sa:

Imahe

video game, credit card, cell phone

Litrato sa mga credit card gikan sa Getty Images

• Pagkamadanihon sa makapagarbusong bahandi.

• Mga gusto nga daw mas importante pa sa mga panginahanglan, sa ingon mopadako sa personal nga utang.

• Paglingaw-lingaw ug lulinghayaw nga makapalayo gikan sa kamaayo sa ebanghelyo.

• Mga kalihokan nga makapugong kanato sa tukma nga pagbalaan sa adlaw nga Igpapahulay.

• Mga podcast ug mga website sa internet nga miduso og mga pangutana ug pagduha-duha nga dili igo ang pagkamatinuuron sa intelektwal nga paagi aron tukma ug matinuurong mapresentar ang panglantaw sa Ginoo.

Tuguti ko sa pagsiguro nga nakasabut kamo niining importante nga punto. Dili gayud sayop ang pagpangutana o pagsusi sa atong kasaysayan, doktrina, ug mga binuhatan. Ang Pagpahiuli nagsugod sa dihang si Joseph Smith nagtinguha og tubag sa sinsero nga pangutana.

Mga ginikanan, mga lider sa auxiliary, mga magtutudlo sa Simbahan (lakip ang mga magtutudlo sa seminary ug institute), mga bishop, ug mga presidente sa stake: Kon may tawo nga moduol kaninyo nga adunay pangutana o kabalaka, palihug ayaw lang ibaliwala ang pangutana. Ayaw siya sultihi nga dili mabalaka mahitungod sa pangutana. Palihug ayaw pagduha-duha sa kamapahinunguron sa tawo ngadto sa Ginoo o sa Iyang buhat. Hinoon, tabangi ang tawo nga makakita og mga tubag sa mga pangutana.

Mabalaka ko kon makadungog ko og sinsero nga mga tawo nga nagpangutana og matinuoron nga mga pangutana mahitungod sa atong kasaysayan, doktrina, o mga binuhatan ug dayon gitratar nga daw wala silay pagtuo. Dili kana ang paagi sa Ginoo. Sama sa gisulti ni Pedro, “Kinahanglan andam kamo kanunay sa pagtubag kang bisan kinsa nga mangutana sa hinungdan sa paglaum nga anaa kaninyo” (1 Pedro 3:15).

Kinahanglang mas maayo pa ang atong mabuhat sa pagtubag sa matinuorong mga pangutana. Bisan tuod dili kita makahimo sa pagtubag sa matag pangutana mahitungod sa kalangitan o sa atong kasaysayan, doktrina, ug mga binuhatan, makahatag kita og daghang tubag ngadto niadtong matinud-anon. Kon wala kita mahibalo sa tubag, mahimo kitang magdungan sa pagsiksik sa mga tubag—usa ka giambitan nga pagsiksik nga mahimong magpaduol kanato sa usag usa ug magpaduol sa Dios. Siyempre, dili kanunay nga makakita kita og makatagbaw nga mga tubag sa atong mga pangutana. Sa ingon nga mga panahon, maayong hinumduman nga may dapit gihapon sa relihiyon alang sa hugot nga pagtuo. Usahay kita makakat-on ug makatuon ug makahibalo; ug usahay kinahanglan kita nga motuo ug mosalig ug maglaum.

Tabangi kadtong adunay mga pangutana nga makaamgo nga ang Ginoo wala magkinahanglan sa Iyang mga Santos nga mahibalo sa tanan mahitungod sa kasaysayan ug doktrina. Busa, dili kita magdahum nga ang mga ginikanan, mga lider, ug mga magtutudlo aduna sa tanang tubag sa matag pangutana. Bisan diha sa Unang Kapangulohan ug sa Korum sa Napulog Duha ka mga Apostoles, anaa kadtong managlahi kaayo og mga kaagi ug pagbansay nga nakatugot sa pagpaambit og halapad nga kasinatian atol sa among mga diskusyon ug deliberasyon.

Kon duna akoy pangutana nga dili nako matubag, kasagarang modangup ako ngadto niadtong makatabang kanako. Ang Simbahan napanalanginan og nabansay nga mga eskolar ug niadtong kinsa migahin og tibuok kinabuhi nga pagtuon, kinsa nasayud sa atong kasaysayan ug sa mga kasulatan. Kining mahunahunaon nga mga lalaki ug babaye naghatag og konteksto ug background aron mas masabtan nato ang atong sagrado nga nangagi ug ang atong kasamtangan nga mga binuhatan. Napanalanginan niining impormasyon nga ilang gihatag, mas andam na ako sa pagtinguha sa giya sa Espiritu Santo.

Ang Simbahan matinguhaon nga mahimong bukas ug matinuuron ug mimantala og bililhon nga mga kapanguhaan aron sa paghatag og bag-ong panglantaw ug pagtanyag og dugang nga konteksto sa istorya sa Pagpahiuli pinaagi sa Joseph Smith Papers nga website ug mga Gospel Topic essay diha sa ChurchofJesusChrist.org. Talagsaon kini nga panahon sa pagtuon sa kasaysayan ug doktrina sa Simbahan, uban sa abunda nga mga kapanguhaan ug mga eksperto nga naghatag og makatabang nga konteksto ug pagsabut sa atong nangagi. Pag-ampo kanunay ug sunda ang pag-aghat sa Espiritu Santo, kinsa mopadayag og espirituhanon nga mga kamatuoran.

Nabalaka ko nga ang pipila ka mga miyembro mogasto og labaw pa sa ilang kinitaan samtang mosulay sila sa pag-angkon sa unsay naangkon sa ilang mga silingan. Makahimo kita og seryoso nga sayop kon itandi nato ang atong kinabuhi niadtong adunay daghang katigayunan, nakalimot nga kadaghanan kanato miuswag na sa yuta. Palihug pagkatagbaw ug tagamtama ang mga panalangin nga nadawat na ninyo kay sa mahimong ulipon sa dili maalamong paggamit sa utang. Ayaw gayud kapakyas sa pagbayad sa inyong ikapulo, ug paghimo og ubay-ubay nga halad sa pagtabang sa kabus.

Ang uban kaninyo tingali nanghinobra ang buluhaton tungod sa daghang kalihokan, lakip na ang mga maayo. Palihug ampingi nga dili masobrahan sa buluhaton ang inyong mga anak. Palunga matag karon ug unya ang social media ug ubang makalinga sa gawas aron molingkod ug makigsulti ug motagamtam sa pakig-uban sa usag usa. Sama sa bag-o lang nakong gitudlo sa kinatibuk-ang komperensya, pagpahigayon kanunay og family council (tan-awa sa “Mga Family Council,” Liahona, Mayo 2016, 63–65).

Hinumdumi, ang Ginoo mitambag kanato sa paggahin og panahon aron “[mohilum ug moila] nga ako mao ang Dios” (Salmo 46:10; tan-awa usab sa Doktrina ug mga Pakigsaad 101:16).

Aron mahimong okupado ang mga sakop sa pamilya ug mapalayo gikan sa unsay labing importante, kanunay nga dunay tawo nga magmugna og bag-ong butang—bag-o nga app o dula, sama pananglit, nga moaghat sa batan-ong mga tawo nga magduko diha sa ilang mga smartphone imbis nga moyahat aron makakita sa matahum nga mga linalang sa talagsaong kalibutan sa Dios o gani sa usa ka tawo nga gusto nila nga mahimamat, ma-date, ug maminyo ug diin sila makabaton og usa ka relasyon sa tinuod nga kalibutan nga moresulta sa mahangturon nga mga panalangin.

Imahe

Church members in different settings

Maghisgot ko kadali mahitungod sa atong mga higala, mga silingan, ug mga kauban sa eskwelahan ug trabaho kinsa dili mga miyembro sa Simbahan. Bisan tuod seryuso natong gidawat ang mahinungdanong tahas ug sugo gikan sa Ginoo nga “Panglakaw kamo ug himoa ninyong tinun-an ang tanang kanasuran, sa pagpamautismo kanila sa ngalan sa Amahan, ug sa Anak, ug sa Espiritu Santo” (Mateo 28:19), atong gitahud ug girespeto ang kabubut-on sa tanan nga maghunahuna ug motuo—o dili motuo—sumala sa ilang pagpili.

Kon ang usa ka silingan, kauban sa trabaho, o kauban sa eskwelahan dili interesado sa pagsusi sa ebanghelyo, kinahanglang padayon natong ituyhad ang kamot sa pakighigala. Ang atong gugma alang kanila kinahanglang dili kondisyonal; kinahanglan nga kinasingkasing kini ug walay mga kondisyon.

Ang atong mga anak labing makakat-on pinaagi sa ehemplo sa mga ginikanan ug mga lider. Magmainampingon kita sa unsay atong isulti mahitungod sa uban ug giunsa nato pagtratar ang atong isigkatawo. Ug hinumdumi, aduna gayud kitay katungod nga dili mouyon, apan dili kinahanglan nga makiglalis dayon kita.

Si Jesus mitudlo, “Higugmaa ang imong silingan sama sa imong kaugalingon” (Mateo 19:19). Kon kita Iyang mga disipulo, kinahanglan kitang mosunod sa Kristiyanong kamatinahuron ug kamabination sa tanan nga atong mahimamat, lakip niadtong mipili nga mobiya sa Simbahan.

Makigtambayayong kita sa tanang tawo nga adunay maayong katuyoan sa matag maayo nga kawsa ug ilakip sila sa atong mga grupo sa mga higala ug kaubanan. Tinud-anay nato silang hangupon ngadto sa atong mga chapel ug mga kalihokan sa ward.

Ang akong apostolikanhong sulat kaninyo motapos samtang mopamatuod ko nga kon ikonsiderar ninyo og maayo ang propetikanhong tambag, inyong makaplagan ang inyong espirituhanon nga pang-alima nga mga gamut nga konektado ngadto sa “tubod sa tubig nga magatubo ngadto sa pagkakinabuhing dayon” (Juan 4:14). Dili kamo mamatay sa espirituhanong paagi sama sa matahum nga kahoyng sequoia; hinoon, mopamatuod ko nga makabaton kamo og dugang nga kalinaw, kalipay, ug kamaya sa inyong kinabuhi pinaagi sa pagdawat ni Jesukristo ug sa mga sulugoon nga Iyang gitawag ug pinaagi sa pagsunod sa Iyang plano sa ebanghelyo. Gawas kon ang mga tawo sa kanasuran mopabalik sa ilang mga kasingkasing ngadto sa Dios ug sa Iyang mga pagtulun-an ug plano, sigurado nga atong atubangon ang mga sangputanan nga gipadayag diha sa mga kasulatan.

Minahal kong mga kaigsoonan, gisangunan kita sa pag-andam sa Simbahan ug sa atong kaugalingon alang niadtong mga adlaw nga siguradong moabut kon ang mga tawo sa kalibutan mopadayon sa pagbaliwala ug dili manumbaling sa Dios nga atong Langitnong Amahan ug Iyang Pinalanggang Anak, ang Ginoo nga si Jesukristo. Ang mga kasulatan tataw sa mga sangputanan sa pagpalayo gikan sa Dios.

Kami nahigugma kaninyo. Akong pribilehiyo nga modapit sa atong Langitnong Amahan sa pagpanalangin kaninyo. Hinaut nga makaangkon kamo og kalinaw. Hinaut nga makaangkon kamo og kalipay diha sa inyong kasingkasing. Hinaut nga makaangkon kamo og kaisug nga maghinulsol kon gikinahanglan ninyo. Kon adunay nagpanghitabo sa inyong kinabuhi nga dili maayo, hinaut ang Ginoo mopanalangin kaninyo sa kaisug aron maghinulsol ug mag-usab, sugod karon. Hinaut ang Ginoo mohatag kaninyo sa kalig-on aron inyong ibaling ang inyong kasingkasing ngadto Kaniya, mohigugma Kaniya, ug moserbisyo Kaniya aron luwas kamo nga magpadayon sa mortalidad, mangandam alang niana nga adlaw nga pagagakson sa mga bukton sa atong Amahan sa Langit ug sa Iyang Hinigugmang Anak.

Isip usa ka talagsaong saksi ni Kristo, mopamatuod ako kaninyo nga nasayud ko nga si Jesus mao ang Kristo. Siya ang Anak sa Dios. Kini nga mga butang nga akong gisulti tinuod, ug manghinaut ko nga inyong dawaton ang akong sulat diha sa espiritu diin ako namulong. Mopamatuod ko nga kini ang Simbahan ni Jesukristo.

Hinaut nga ang Dios mopanalangin kaninyo, akong minahal nga kaigsoonan, samtang atong buhaton ang tanan nga atong mahimo aron mangandam alang niana nga adlaw sa diha nga ang Manluluwas ug Manunubos sa kalibutan moanhi pag-usab isip atong Ginoo ug Hari.