Ang Prinsesa nga Baki Mopasaylo
Gusto ni Katya nga mopahigayon og drama, apan gusto ni Sonya nga mao ang mangulo!
“Magmaloloy-on kamo, maingon nga maloloy-on man ang inyong Amahan” (Lucas 6:36).
Nagdala si Katya og dakong kahon samtang migawas siya gikan sa iyang apartment building padulong sa hayag sa adlaw. Ting-init kadto, ug sulod sa pipila ka bulan, ang panahon init sa iyang siyudad sa Russia. Gibutang niya ang kahon sa usa ka bangko diin naghulat ang iyang mga higala nga si Dima ug Sonya.
“Mao kini ang tanan nga atong gikinahanglan sa atong drama!” Miingon si Katya. Iyang giablihan ang kahon ug mikuha og plastik nga korona ug mga piraso sa purple, asul, ug pula nga panapton. Gamit ang kamamugnaon, mamahimo kining nindot nga mga costume.
“Unsa nga drama ang atong himoon?” Nangutana si Dima.
Mipahiyom si Katya. “Mosugyot ko nga atong buhaton ang ‘Ang Prinsesa nga Baki’!” Mao kadto ang iyang paborito nga sugilanon. Mipahiyom si Katya samtang gihunahuna niya ang iyang kaugalingon nga maoy modala sa papel sa matahum nga Vasilisa.
Gikuha ni Sonya ang asul nga panapton gikan sa kahon ug iya kining gikupo. “Gusto ko nga mahimo si Vasilisa!” miingon siya.
“Hulat usa,” miingon si Katya. “Ideya nako kini. Nagpasabut kana nga kinahanglang ako si Vasilisa.”
“Pwede ka nga mahimong siya,” miingon si Sonya. Apan miagik-ik dayon siya. “Kon mahimo na siyang baki!”
Nagmug-ot si Katya ug gibira ang asul nga panapton gikan kang Sonya. “Apan akoa kini nga drama-drama!”
Nanghinawak si Sonya. “Walay gustong makigdula nimo kon magpahawud-hawud ka. Mas maayo ka nga baki kay sa usa ka prinsesa.”
Mibati si Katya og mga luha diha sa iyang mga mata. Gikuha niya ang iyang kahon ug midagan pasulod, pasaka sa hagdanan ngadto sa apartment sa iyang pamilya. Gilamba niya ang pultahan pagkasulod niya.
“Unsay problema?” Miingon si Mama. Mihilak si Katya.
“Gidaut ni Sonya ang tanan!” Gisultihan ni Katya si Mama sa tibuok istorya. “Miingon siya nga baki kuno ko!”
“Oy, Katyusha,” miingon si Mama. Katyusha ang angga ni Mama alang kang Katya. “Gikasubo ko. Dili na nindot ang iyang gibuhat.”
Apan dayon adunay nanuktok sa pultahan. Milakaw si Mama aron sa pagtubag niini, apan si Katya midagan ngadto sa iyang kwarto. Nakadungog siya og mga tingog, ug dayon gitawag siya ni Mama. “Gusto ka nga makig-istorya ni Sonya? Aduna siyay isulti kanimo.”
“Dili!” Misinggit si Katya.
Nakadungog na pud siya og mga tingog, ug dayon nadunggan niya nga gisirad-an ang pultahan.
“Nagtuo ko nga nagbasol si Sonya,” miingon si Mama.
“Bahala na,” miingon si Katya. Mas giduso pa niya ang iyang nawong ngadto sa iyang unlan.
Mibarug si Mama og mga usa ka minuto diha sa pultahan. “Kabalo ka, kon masuko gyud ko pag-ayo, dili nako gusto nga mopasaylo sa ubang tawo. Usahay kinahanglan nakong mohangyo sa Langitnong Amahan nga tabangan ko nga makagusto nga mopasaylo.” Dayon milakaw siya.
Sobra ra ang kasuko ni Katya aron mopasaylo. Gipasakitan ni Sonya ang iyang mga pagbati! Apan … ang pagkasuko dili pud maayong bation.
Nanghupaw siya ug miluhod kilid sa higdaanan. Nasayud si Katya nga gusto sa Langitnong Amahan nga mopasaylo siya kang Sonya. Mao kana ang sakto nga buhaton. Apan tingali gusto sa Langitnong Amahan nga mopasaylo si Katya tungod kay makatabang kini nga mas maayo usab ang bation ni Katya.
“Langitnong Amahan, palihug tabangi ko nga mopasaylo kang Sonya,” miingon siya. “Dili gayud unta nako gusto, apan dili usab nako gusto nga magpabiling nasuko.”
Gihuman niya ang iyang pag-ampo ug miginhawa og lawom. Gibati ni Katya nga misugod sa pagkawagtang ang iyang kasuko, medyo gamay lang. Makahimo siya niini. Makahimo siya sa pagpasaylo. Milakaw siya ngadto sa apartment ni Sonya ug nanuktok sa pultahan.
Si Sonya ang miabli niini ug misugod dayon sa pag-istorya. “Katya, pasayloa ko sa akong nasulti.”
“Gipasaylo ko ikaw,” miingon si Katya. “Ug pasayloa ko sa pagbawi sa tanan nako nga mga costume. Mahimo ka usab nga maayong Vasilisa. Mahimo kita nga magpuli-puli.”
Mipahiyom si Sonya. “OK. Pwede na ta nga magpraktis karon? Akong kuhaon si Dima!”
Mibalus sa pagpahiyom si Katya. “Akong kuhaon ang mga costume!”