Gigiyahan ngadto ni Monica

Imahe

woman standing on balcony watching other woman at window

Paghulagway pinaagi ni Stan Fellows

Sa dihang nagpuyo ko sa São Paulo, Brazil, nakaila nako ang usa ka espesyal nga babaye nga ginganlan og Graça. Siya usa ka matahum ug mabination nga babaye ug usa ka higala ngadto sa tanan.

Si Graça mao ang akong kompanyon sa visiting teaching. Siya inahan sa tulo ka anak, nagtrabaho og part-time, ug walay sakyanan o telepono, apan walay usa niini ang nakapugong kaniya sa pagserbisyo.

Gikan sa akong balkonahe, makita nako ang usa lang ka bintana sa iyang balay. Kon siya makalugar, si Graça mobutang og pula nga piraso sa panapton niana nga bintana sa pagpahibalo nga siya andam na nga mobisita. Siya wala gayud mangita og ikapamalibad nga dili moserbisyo. Kanunay kong naghunahuna mahitungod sa pagpahibalo ni Graca ug sa iyang talagsaong ehemplo sa matinud-anon ug yanong pagserbisyo.

Usa ka kasinatian ang importante kaayo sa akong hunahuna. Nag-andam ug nag-ampo mi sa dili pa mobisita sa usa sa among mga sister. Samtang nagpadulong sa iyang balay, nakaamgo mi nga nagpadulong mi sa lahi nga balay sa usa ka sister! Gitudlo mi sa pagbisita niini nga sister, usa ka dili kaayo aktibo nga inahan sa duha ka gagmay nga mga bata, apan wala kami magplano nga mobisita kaniya nianang adlawa. Tungod kay diha na mi, nanuktok mi, apan walay mitubag.

Nakahukom mi nga mopadayon ug maghulat. Ang sister, nga si Monica, sa katapusan miabut ug misulti namo nga siya busy. Nakamatikod mi nga siya gikapoy ug kahilakon. Sa dihang miingon mi nga ania mi aron motabang, gipasulod mi niya. Ang iyang bata naghilak, mao nga gisultihan namo siya nga atimanon ang bata ug maghulat kami. Sa dihang si Monica misaka sa taas, mitrabaho mi, nanglimpyo sa pipila ka kwarto ug mipilo sa mga sinina nga among nakita.

Sa dihang si Monica nakakita unsa ka nindot tan-awon sa iyang balay, nagsugod siya sa paghilak, mibukas sa iyang kasingkasing ngari namo, ug mipakigbahin sa iyang pipila ka mga hagit. Misaad mi sa pagtabang kaniya, ug kami nakigsulti sa presidente sa Relief Society mahitungod sa iyang mga hagit. Pagkasunod Dominggo, si Monica misimba.

Si Monica nahimong aktibo, malipayon nga sister, ug nagpadayon mi sa pagpangalagad ngadto kaniya uban sa gugma ug pagpangga. Anaa gihapon ang sama nga mga hagit, apan siya nakahimo na sa pagdawat niini uban sa mas dako nga pagtuo ug kaisug tungod sa iyang pagkaaktibo sa Simbahan.

Mapasalamaton kaayo ko sa ehemplo ni Graça samtang kami nagserbisyo. Nag-ampo mi alang sa giya, ug ang Dios migiya namo ngadto ni Monica.