E Riai bwa N na Reitanako au Wareware?
Te ririki ae e nako I rinea te boki man te tabo n tangoboki ae rongorongon te ataeinnaine ae karaoa te blog. I taku bwa e bae ni kaunga te boki ibukina bwa te aomata are karakinana bon titebo rorona ma ngai, ao tinau bon te tia karaoa te blog. Ngaia are I taku bwa bon te boki ae I kona n irekereke ma ngaia.
I a tibwa tabe ni wareki tabeua iteraniba man te boki ngke te ataeinnaine e taetae naba ni manrerea aran te Uea. E aki raoiroi nanou imwiin warekan te mwakoro anne. Ma I teimatoa ni warekia, ni kantaningaia bwa bon te bwai ae tii tetaina. I wareki tabeua riki iteraniba, ao e a manga taekinna riki.
I nako n tuanga tinau te bwai are I a tia ni kunea. I aki ataia ngkana I riai n reitinako ni wareka te boki ke n aki. Tinau e tuangai bwa bon au rinerine. Ma e kariaia ae e aki bati n raoiroi bwa N na reitinako ni warekia ngkana te ataeinnaine e taekinii bwaai aika ti atai bwa a kairua. Tinau e taku bwa e aki tamaroa ngkana neiei e manrerea aran te Uea.
I taku bwa I kona n nooria ngkana e mwaiti riki inanona, ngaia are I raibaea te boki. I kunea bwa te ataeinnaine aei e aki toki ni manrerea aran te Uea. I baireia bwa N na kaoka te boki nakon te tabo n tangoboki n aki manga warekia riki.
I namakina te nanokawaki bwa te tia korokaraki n te boki e manrerea aran te Uea. Ma imwiin kaokan te boki nakon te tabo n tangoboki, I namakina te kukurei bwa I karaoa te babaire ae eti. I ataia bwa I ira “Au Kainibaire n te Euankerio” man au boki n Onimakinan te Atua are e kangai, “N na tii wareki ao ni matakuakini bwaai ake e kukurei iai Tamau are i Karawa.” I ataia bwa ti tii kantaningaaki bwa ti na kabongana aran Tamara are i Karawa ao Iesu ma te rau ao te karinerine.