Te Kakaewenako n te Tembora
Iroun Titita Joy D. Jones
Beretitenti ni Kabuta n te Moanrinan
“Ao a na rairi nanoia naati nakon tamaia” (Reirei ao Berita aika Tabu 2:2).
N te Tabati teuana Ngai ma au kauntira ti ira te bootaki n te Tabati. Ti anga reirei iaon te tembora ao bwaai aika onoti aika riki ikekei. Imwiin te bootaki, te ataeinimwaane ae 12-ana ririki ae arana Colby e kawarai ao e iobai ma ngai. Ti maroroakina taekan te tembora. Imwiina i kaewenakoa bwa e na karekea aran temana n te utu ae na uotia nakon te tembora.
Te tai ae uarereke imwiina, I karekea te reta mairoun Colby. Aio te bwai ae tuangai Colby:
“I okira mweengau ao I kunea te ara ae boou. E oti imwiina bwa Ngaia bon au kateniman n tibutoru!
“Tabeua te tai imwiina I nakon te tembora ao I bwabetitoaki ibukina. Bon te tai ae rangin n onoti bukina bwa tariu ae e ikawai riki e bwabetitoai ao tamau e kamatoaai ibukina.
“I namakina te nano n tangira inanou are e uota te rau. I namakinna bwa te bwai ae I karaoia ibukin tibu te mwaane e bon rangin n tamaroa bukina bwa e kona ngkai n nakon te aba n uea ae te tiretio ni maeka ma ana utu. Ibukin te bong anne ni kabane, I namakina ae tamaroa inanou.
“I kunea naba bwa akea ae ataia bwa antai aia karo au kateniman n tibutoru, bwa iaonga n atai araia ao n anai nakon te tembora naba”
Colby bon te banna ni katooto ae nakoraoi! Tai tabe bwa rorora ngkoe, ko kona n riki bwa te banna ni katooto nakoia am utu ao raoraom. Ko kona n tibwaua te euangkerio ma aomata ni kabane aika kam kinaia—riki am bakatibu!