2019
Bitaki Ake a Tia Ni Karaoaki Ibukin Kakorakorakiia Kairake
Okitobwa 2019

Bitaki Ake a Tia Ni Karaoaki Ibukin Kakorakorakiia Kairake

Iroun Unimwaane Quentin L. Cook

Man te Kooram n Abotoro n te Tengaun ma Uoman

A mwaiti riki ataeinimwaane ao ataeinnaine aika a na kaitara te kaangaanga aei ao n teimatoa ni kona ni karaoi bwaai ake e na kairiia ni kateimatoaia ni karaoi berita aika tabu ma te taratara ae korakora iaoia kairake.

Ko rabwa, Beretitenti Nelson ae tangiraki, ibukin te kairi ae kakukurei iaon taekan te kakoaua n te bwabetito ao te kaetieti are ko a tia n tuangiira bwa ti na ibuobuoki ni kakorakoraia kairake ao ni karikirakei aia konabwai aika tabu.

Imwain ae I tibwauai bitaki aikanne, ti kaota ara kakaitau ibukin te kawai ae onoti ae a tia ni karaoia membwa ni butimwaia ni karikirakea reitakinakoan Kaokan te euangkerio. N aron are e a tia Beretitenti Nelson ni baireia n te ririki ae nako, ko a tia ni katauraoiko nakon te bitaki ae bubura aika iaon kawaia!1

Ko kukurei ni kamatebwaia Nakomai, Iriirai n te mweenga.2 Ko a tia naba ni kaeka nakon bitaki n te ekaretia. Membwa n te kooram n unimwaane ao aine n te Bootaki n Aine a ikotaki ni bootaki ni karaoa te mwakuri ni kamaiu.3

Ara kakaitau e aki kona ni kabwarabwaraaki.4 Ti rangi ni kakaitau bwa a teimatoa ara kairake ni korakora ao ni kakaonimaki.

A maeka ara kairake n te tai ae kamimi ma e kaangaanga naba. Rinerine aika a tauraoi aki rangi ni bubura. Teuana te katooto: te tareboon ae bwainaki n taai aikai a katauraoi rongorongo aika rangi ni kakawaki ao ni kakorakora, n raonaki ma rongorongon te utu ao booki aika tabu. Irarikin anne, iai inanona te nanobaba, te aki raoiroi, ao te buakaka ae akea n taai aika nako.

Tamnei
Karikiram ae Boboto iaon te Mweenga
Tamnei
Aia waaki ni kakukurei Kairake

Ni buokiia ara roronrikirake ni karaoi rinerine aika eti aikai, e a tia te Ekaretia ni katauraoi teniua iango aika nano ao ni bwanin. Te moan, e a tia te karikiram ni kakorakoraaki ao ni karababaaki nakon te mweenga. Te kauoua, aia burokuraem ataei ao kairake are iai inanona waaki ni kakukurei aika kakukurei ao te rikirake bon iroum e tibwa kanakoaki n te Tabati ae nako irouia Beretitenti Russell M.Nelson, Beretitenti M. Russell Ballard, ao Mataniwi ni Kabuta. Te kateniua n iango bon bairean bitaki ni karikiia kairake bwa a na kakawaki irouia bitiobi ao taan kairiiri tabeman. E riai te taratara aei ni korakora n te tamnei ao ni buokiia ara kairake n riki bwa taanga ni buaka ni kairake are e a tia n tuangiia Beretitenti Nelson bwa a na kaaina.

Bwaai ni Kakairi Aika Irekereke

Mwakuri aikai, n raonaki ma ake a katanoataaki inanon tabeua te ririki n nako, bon bitaki aika aki irekereke. Bitaki n tatabeua nako bon mwakoron te bwai ni kakairi ae kakawaki ni kakabwaiaia Aika Itiaki ao ni katauraoia ni kaitibo ma te Atua.

Teuana mwakoron te bwai ni kakairi e irekereke ma te roro ae rikirake. A tia ara kairake n tuangaki bwa ana kabatia tabeia n roroia ni kairake—n akea te bwai ae ana karaoia kaaro ao taan kairiiri ibukiia n te bwai ae a kona kairake ni karaoia ibukiia.5

Te Katanoata

N te bong aei ao ti katanoatai bitaki n te bootaki ibukiia kairake n te uoote ao n te titeiki. N te kawai are e kabwarabwara Beretitenti Nelson, Titita Bonnie H. Cordon e na maroroakin bitaki ibukiia ataeinnaine n te tairiki aei. Ara kantaninga ibukin bitaki aika n na maroroakin ngkai bon ibukn kakorakorakiia ake iai irouia te Nakoanibonga ae te Aaron, kooram, ao beretitentii n te kooram. Bitaki aikai a kaboraoa ara mwakuri ma Reirei ao Berita aika Tabu 107:15, ae kangai warekana, “Te bitiobiriki bon te beretitentii n te nakoanibonga aei [te Aaron], ao e taui kiingin ke kariaia ma iai.”

Teuana taben te bitiobi n booki aika tabu bon tararuakiia ibonga ao n te tekateka n te kauntira ma ngaia, n reireiniia tabeia n nakoaia.6 N raonaki ma anne, te moan ni kauntira inanon te bitiobiriki e na iai tabena ae onoti ibukiia taan reirei ao te kauoman ni kauntira ibukiia riikan.

Ngaia are, ni katiteboia ma te kaotioti inanon Reirei ao Berita aika Tabu aei, Beretitentii irouia Ataeinimwaane inanon Uoote a na katokaki. A tia taari aika kakaonimaki aikai ni karaoa ae moan te raoiroi, ao ti kaota ara kakaitau ibukiia.

Bon ara kantainga bwa a na anga aia kabanea n iango ao aia taratara ae korakora nakon tabeia ataeinimwaane n te nakoanibonga ao ni buokiia n tabeia n aia kooram. A na weteaki aetuwaitia n Ataeinimwaane aika ikawai aika konabwai bwa a na buokiia kain te beretitentii n te kooram n te Nakoanibonga ae te Aaron ao bitiobiriki n tabeia.7 Bon akea ara nanououa bwa a na kona ataeinimwaane ao ataeinnaine ni kaitara te kaangaanga aei ao n teimatoa ni kona ni karaoi bwaai ake e na kairiia ni kateimatoaia ni karaoi berita aika tabu ma te taratara ae korakora iaoia kairake.

N ana banna te Uea ae kairaki mai ieta, iai taben te bitiobi ibukiia kaain te uoote ni kabane. E kakabwaiai maiuia ana karo te kairake irarikin are kakabwaiakin te kairake. Temanna te bitiobi e kunea ngke e marooro ma temanna te ataeinimwaane ae iai ana kaangaanga ma te tamnei ae tangako, e kona ni buoka te ataeinimwaane man ti ana rairannano ao ngke e buokiia ana karo bwa a na karaoia ma te tangira ao te oota. Kamaiuakin te ataeinimwaane ibukin ana utu ao e a kona rinanon ana mwakuri te bitiobi ibukin te utu ae bwanin. E a riki ngkai te ataeinimwaane bwa te nakoanibonga ae kororaoi ao te mitinare ae bwanin ana tai.

N aron are e iangoaki n te karaki aei, bitaki aikai a na:

  • Buokiia bitiobi ao aia kauntira bwa a na kabanea aia tai iaon tabeia aika moa kakawakiia nakon te roronrikirake ao ataein te Moanrinan.

  • Katuka te mwaaka ao tabeia kain te Nakoanibonga ae te Aaron bwa boton aia iango ataeinimwaane ni maiuia ao n aia kouru.

Bitaki aika a na:

  • Kabwarabwarai tabeia kaain te beretitentii n ana kooram te Nakoanibonga ae te Aaron ao te kawai ae a na ribooti iai nakon te bitiobiriki.

  • Bitaki naba aikai a na kaungaia taan kairiiri ni buokiia ao ni kairiia kaain te beretitentii n te kooram n te Nakoanibonga ae te Aaron ni kakorakora te mwaaka ao te kariaiakaki n nakoaia.

N aron ae ataaki, bitaki aikai aki kakerikaaka taben te bitiobiriki ibukiia ataeinnaine. N aron are e reirei Beretitenti Nelson, “[Taben te bitiobi] ae moan te kakawaki bon tararuakiia ataeinimwaane ao ataeinnaine n ana uoote.”8

E na kanga ara bitiobi ae tangiraki ao ni mwamwakuri ni kakoroa nanon te mwioko aei? Ngkana ko uringnga, n 2018 kooram n te Nakoanibonga ae te Merekitereka a bitaki bwa a na mwakuri riki ma Bootaki n Aine bwa aonga kooram n unimwaane ao Bootaki n Aine ni kona, iaan ana kaetieti te bitiobi, ni buokia ni karaoi mwakuri aika kakawaki ake a kabongana angiin ana tai te bitiobi. Taabe aikai a raonaki ma te mwakuri ni mitinare ao mwakuri n te tembora ao rongorongon te utu n te uoote9—n raonaki ma te mwakuri n ibuobuoki nakoia membwa.

Tamnei
Taben te bitiobi

E aki kona te bitiobi n tibwatibwai tabeua mwakuri, n aron kakorakorakin te kairake, bwa e na riki bwa te tia moti ni kabuta, n tabeakiniia ake a kainnano, ao n tararuai mwaane ao bwain te tembora. Aika a uarereke, riki, nakon ake ti a tia n atai mai imwaina. N aron are e kabwarabwara Unimwaane Jeffrey R. Holland n te ririki ae nako ngke e katanoataki te bitaki nakon te kooram n te Nakoanibonga ae te Merekitereka: “E teimatoa te bitiobi n tiku bwa te ibonga ae rietata n tararua n te uoote. Te babaire ae boou [irouia kaain te kooram n unimwaane ao te Bootaki n Aine] e na riai n tii tararua mwakurin te Nakoanibonga ae te Merekitereka ao te Bootaki n Aine n akea kantaningaakina bwa e na karaoi mwakuri ibukin kurubu akana uoua akanne.10

Ibukin te katooto, te beretitenti n te Bootaki n Aine ao te beretitenti n te kooram n unimwaane, ngke a tia ni mwiokoaki bwa a na karaoia, a kona ni karaoa tabeia ae korakora ni marooro ma ikawai—n aron te kawai naba are e kona te beretitenti n te Bootaki n Ataeinnaine ni marooro iai ma ataeinnaine. Ngkai ti te bitiobi ae kona ni beku bwa te tia moti ni kabuta, a kona naba taan kairiiri ake tabeman ni karaoa te kaotioti mai i karawa n ibuobuoki ma kakaewenako ake aki kainnanoa te tia moti ni kabuta ke n irekereke ma kamangao n aekaia nako.11

E aki nanonaki anne n ae e aki kona te ataeinnaine ke n aki riai n taetae nakon te bitiobi ke ana karo neienne. A na kabanea riki aia tai bitiobi iaoia kairake! Ma e aki nanonaki n ae a na kona aia tan kairiiri Ataeinnaine ni kaitarai kainnanoia ataeinnaine n tatabemaniia. Te bitiobiriki e tabeaianga ibukiia ataeinnaine ao ibukiia naba ataeinimwaane, ma ti kinai korakora ake a roko mairouia taan kairiiri aika korakora, a irekereke ma waaki ni kakukurei, ao n taraia Ataeinnaine aika tangira man mwakuri ma ataeinnaine, n aki anai tabeia beretitentii n te kiraati, ma a buokiia kairake ni kanakoraoia n tibwangaia aikanne.

Titita Cordon e na tibwauai bitaki riki tabeua ibukiia ataeinnaine n te tairiki aei. Ngaia ae, I katanoata, bwa beretitenti n te uoote ibukiia Ataeinnaine a na ribooti ngkai nakon te bitiobi ao n reitaki ma te bitiobi n te uoote. N taai aika nako, te mwakuri aei e kona n anganaki te kaunitra, ma n taai aika a na roko, e na riki bwa te katabeaki iroun temanna ae iai irouna kiing n tararua ibukin te uoote. Te Beretitenti n te Bootaki n Aine e na reitinako n riboti nakon te bitiobi.12

N te karinan ni kabuta ao n te titeiki, a na teimatoa beretitentii irouia Ataeinimwaane n raonira. N te karinan n te titeiki, te beretienti irouia Ataeinimwaane e na riki bwa te kauntira ae rietaata13 ao e na, ma te kauntira ae rietaata kanakoaki nakon te Bootaki n Ataeinnaine ao te Moanrinan, n riki mwakoron te Nakoanibonga ae te Aaron n ana komete te titeiki– n te Bootaki n Ataeinnaine. Taari aikai a na mwakuri ma te beretitentii n te Bootaki n Ataeinnaine n te titeiki n te komete aei. Ma te kauntira nakon te beretitenti n te titeiki bwa te tia kaira te komete aei, te komete aei e na rikirake kakawakina ibukina bwa a mwaiti burokuraem ao waaki ni kakukurei inanon aia waaki Ataei ao Kairake aika boou aika a na mena n ana karinan te titeiki.

Kauntira aika rietaata aikai, iaan ana kairiiri te beretitentii n te titeiki a kona ni buoka te bitiobi ao kooram n te Nakoanibonga ae te Aaronn n te katei ae ti tebo ma te ibuobuoki ae katauraoaki irouia kauntira aika rietaata nakoia kooram n unimwaane n te uuote.

Ngkai te bwai ae irekereke aei, te kauntira temanna ae rietaata e na ibuobuoki n taben te beretitenti n te titeiki n te Reirei n Tabati ao, ngkana e kainnanoaki, e kona ni beku iaon te Nakoanibonga ae te Aaron n ana Komete te titeiki n te Bootaki n Ataeinnaine.14

Bitaki riki tabeua a na kabwarabwaraaki riki inanon rongorongo ake a kanakoaki nakoia taan kairiiri. Bitaki aikai a raonaki ma:

  • Bootakin te komete n te bitiobiriki irouia kairake e na oneaki mwiina iroun te kauntira ni kairake n te uoote.

  • Te taeka “Miutuo” e nang aki kabonganaki ao e na riki bwa “waaki ni kakukurei n te Bootaki n Ataeinnaine,” “Waaki ni kakukurei n te kooram n te Nakoanibonga ae te Aaron,” ke “aia waaki ni kakukurei kairake” are e na karaoaki ni katoa wiiki ngkana e kona.

  • Ana kataumwane te uoote ibukin ana waaki ni kakukurei te roronrikirake e na tibwauaki n ae riai imarenaia ataeinimwaane ao ataeinanine ni kaineti ma mwaitiia te roronrikirake inanon bootaki nako. Te mwaiti ae tau e na katauraoaki ibukin ana waaki ni kakukurei te Moanrinan.

  • Ni kabane karinan—uoote, titeiki, ao ni kabuta—ti na kabongana te taeka “bootaki” irarikin te taeka ae “bootaki nako.” Naake a kaira te Bootaki n Aine ni Kabuta, Ataeinnaine, Ataeinimwaane, Moanrinan, ao bootaki n te Reirei n Tabati a na kinaaki bwa “Aobitia ni Kabuta.” Naake a kairi bootaki n ana karinan te uoote ao te titeiki a na kinaaki bwa “aobitia n te uoote” ao “aobitia n te titeiki.”15

Bitaki ake a katanoataaki n te bong aei a kona ni wakinaki n te tai are mwaanga, uoote, mwakoro, ao titeiki a tauraoi ma a riai ni karaoaki n Tianuare 1, 2020. Bitaki aikai, ngkana a ikotaki ao ni bootaki ma bitaki aika mwaiti, a tei ibukin te mwakuri n te tamnei ao n te bootaki aika a titebo ma reirei ake a na kakabwaiai ao ni kakorakoraia mwaane, aine, kairake, ao ataei, ni buokiia n tatabemaniia n ira ana banna ni katooto te Tia Kamaiu, iesu Kristo, ngkai ti waaki iaon te kawai ni berita.

Tariu ao mwaneu aika kam tangiraki, I berita ao I kakoaua bwa bitaki aika bwanin aikai, iaan ana kaetieti te beretitenti ao te burabeti ae kairaki mai ieta, Russell M. Nelson, e na anga te mwaaka nakon ao ni kakorakoraia membwa n te Ekaretia. Ara kairake a na karikirakea te onimaki iroun te Tia Kamaiu, e na kawakinaki man taian kariiri aika buakaka, ao e na tauraoi ni kaitarai kaangaangan te maiu. N aran Iesu Kristo ae tabu, amen.

Bwaai aika a na taraaki

  1. Taraa Russell M. Nelson, n “Latter-day Saint Prophet, Wife and Apostle Share Insights of Global Ministry,” Newsroom, Okitobwa 30, 2018, newsroom.ChurchofJesusChrist.org.

  2. Irarikin anne, ko a tia ni karaoi mwakuri aika onoti ni kabongana te ara ae eti n te Ekaretia n aron are e reiakinaki iroun Beretitenti Russell M. Nelson ao n uringa ara Tia Kamaiu ma te tangira ao te rau ngkana ko karaoia.

  3. “Kaain Ana Ekaretia Iesu Kristo a kanakoaki bwa a na rimoa ni ‘mwakuri n ana nne ni kureebe ibukin kamaiuan tamneia aomata’ (Reirei ao Berita aika Tabu 138:56). Te mwakuri ni kamaiu aio n ikotaki ma ana mwakuri ni mitinare te membwa, tauakiia aika tibwa rairaki, te mwakuri ni kamarurung ibukiia membwa aika aki roroko, te mwakuri n te tembora ao rongorongon te utu, ao reiakinan te euangkerio. Te bitiobiriki e kaira te mwakuri aei inanon te uoote, ao ni buokaki irouia membwa n te kauntira n te uoote” (Aeniboki 2: Babairean aron Kairan te Ekaretia, 5.0, ChurchofJesusChrist.org).

  4. Ngkai ngaira taan kairiiri, ti tangiriia membwa n Ana Ekaretia Iesu Kristo ibukiia Aika Itiaki ni Boong aika Kaitira ibukin raoiroim ao arom n riki bwa ana reirei Iesu. Ti kamoamoaia n tatabemaniia, tiina, kaaro, kairake, ao ataei aika a nakonako ni kawain te berita—ao ni karaoia ma te botumwaaka ao te kimwareirei.

  5. N 2019, te rikan ae 11 ana ririki e moanna ni kabuta te toa, ao te ataeinnaine ae 11 ana ririki ao te ataeinimwaane a karekea te beeba ni kariaia nakon te tembora. N te ririki ae nako, Beretitenti Nelson e kaewenakoia ara ataeinimwaane ao ataeinnaine bwa a na riki bwa kaain te taanga ni buaka irouia kairake bwa a na ikotiia kaain Iteraera aika a maenako n iteran te rabuna aika uoua (taraa “Hope of Israel” [worldwide devotional for youth, June 3, 2018], HopeofIsrael.ChurchofJesusChrist.org). Te kaeka e rangi ni karina.

    Mitinare aika bwanin aia tai aika a beku n te kawai ae onoti n te roro aika uarereke riki. Man Okitobwa 6, 2012, a tia ataeinimwaane n tau ni beku n aia ririki ae 18 ao ataeinnaine n aia ririki ae 19.

  6. “Taben naba te beretitenti i aon te Nakoanibonga ae te Aaron n rararuaia [tenaan] ibonga, ao n tekateka n te kauntira ma ngaia, n reireiniia tabeia n nakoaia. … Te beretitenti aei bon te bitiobi; bwa aio teuana tabena n te nakoanibonga aei” (Reirei ao Berita aika Tabu 107:87–88).

  7. Taan kairiiri aika ikawai a na atongaki naba bwa tibetieriti n te kooram n te Nakoanibonga ae te Aaron n ibuobuoki ma te burokuraem ao waaki ni kakukurei ao ni kaei bootaki n te kooram bwa e aonga te bitiobiriki ni kona ni kawari kiraati n te Bootaki n Ataeinnaine ao waaki ni kakukurei ao ni kakawariia kaain te Moanrinan. Tabeman tibetieriti a kona ni weteaki n ibuobuoki ma waaki n aron te kaembing; a kona tabeman ni weteaki n te tai ae maan ni buoka te aetuwaitia n te kooram. E na riai n tainako tao uoman mwaane aika ikawai inanon bootaki n te kooram n tatabeua nako, burokuraem, ke waaki ni kakukurei. Ngkai a na bitaki tabeia ao aia mwakuri, ti aki kantaninga te kerikaaki ni mwaitiia kairake ni mwaane ao taan ibuobuoki ni kooram n te Nakoanbonga ae te Aaron.

  8. Russell M. Nelson, “Witnesses, Aaronic Priesthood Quorums, and Young Women Classes,” Liahona, Nob. 2019, 39, a kairaki ma katuruturuaia; taraa naba Ezra Taft Benson, “To the Young Women of the Church,” Ensign, Nob. 1986, 85.

  9. Ti tuangiia naba bitiobi bwa a na kabanea riki aia tai ma kairake n ikawai aika tuai iein ma oin aia utu.

  10. Jeffrey R. Holland, general conference leadership meeting, Eberi 2018; taraa naba “Effective Ministering,” ministering.ChurchofJesusChrist.org. E reirei Unimwaane Holland mwakuri ake e aki kona te bitiobi n tibwuai a tararuaia kooram n te Nakoanibonga ae te Aaron ao ataeinnaine, bwa te tia moti ni kabuta, n tararuai mwaane ao bwain te Ekaretia, ao n tararuaia rarikin ao kainnanona. Te kooram n Unimwaane ao te beretitentii n te Bootaki n Aine ao tabeman a kona n anai tabeia kaain te moanrinan ibukin te mwakuri ni mitinare, nakoraoi te reirei n te uoote, ao n tararua ao n ibuobuoki nakoia membwa n te Ekaretia.

  11. N reitaki nakon kaangaanga aika a kainnanoi ana kiing te tia moti ni kabuta, waaki ni kamangao n aekaia nako e riai n tararuaki iroun te bitiobi ni kaineti ma tuan te Ekaretia.

  12. Te beretitenti n te titeiki n te Bootaki n Aine e na reitinako naba n riboti nakon te beretitenti n te titeiki.

  13. Kauntira n te beretitenti n aia Bootaki Ataeinimwaane n te titeiki a kona ni weteaki mairouia membwa n te titeiki ke, ngkana e kainnanoaki, e kona te kauntira ae rietaata n rinea te Ataeinnaine ao te kauntira ae rietaata nakon te Moanrinan.

  14. Te tari are e beku bwa te beretitenti n te Reirei n Tabati iai tabena ae kakawaki ibukin ana karikiram te roronrikirake iaon uoua Tabati ni katoa namwakaina.

  15. Beretitentii n te Bootaki n Aine, Ataeinnaine, Ataeinimwaane, Reirei n Tabati, ao te Moanrinan n rinan ni kabuta ao n te titeiki bon Aobitia ni Kabuta ke aobitia n te titeiki. N ana karinan te uoote, te bitioburiki a na kairiia ataeinimwaane, ngaia are te aetuwaitia n te kooram n te Nakoanibonga ae te Aaron tiaki aobitia n te uoote.